Isaiah 3

Krio (Krio Fɔs Oli Baybul)

← Chapter 2 Jump to: Chapter 4 →

1PAPA GƆD, we na PAPA GƆD Ɔlmayti, de pul kɔmɔt Jerusɛlɛm ɛn Juda, dɛn sɔplay ɛn dɛn sɔpɔt, di it we dɛn fɔ it, ɛn di wata we dɛn fɔ drink,

2di pawaful man ɛn di soja, di jɔj ɛn di prɔfɛt, di luk grɔn man ɛn di bigman,

3di kapten fɔ fifti soja man, ɛn di man we gɛt ay rank, di advaysa ɛn di kɔni kɔni majikman ɛn di man we sabi ple wit mɛrɛsin.

4Ɛn a go mek yɔŋ bɔbɔ dɛn tɔn di bigman dɛn, ɛn lili pikin go rul dɛm.

5Ɛn pipul dɛn go tek advantej pan dɛn dɛnsɛf, ɛn pan dɛn kɔmpin ɛn pan dɛn neba; dɛn yɔŋ wan dɛm go fityay big wan dɛm ɛn di yuslɛs man go fityay di bigman.

6We wan man go grip in brɔda nain papa os, se, “Yu gɛt kot fɔ wɛr; yu go bi wi lida, ɛn di broko os go de ɔnda yu pawa”;

7da de de, i go tɔk se “A nɔ go mɛn una o: bred ɔ klos sɛf nɔ de na mi os; una nɔ go mek mi lida fɔ di pipul.”

8Jerusɛlɛm dɔn bɔk in fut, ɛn Juda dɔn fɔdɔm; bikɔs di tin we dɛn de tɔk, ɛn di tin we dɛn de du, de agens PAPA GƆD, dɛn nɔ de rɛspɛkt di pawa pan in glori.

9Di pashal we dɛn pashal go pul dɛn sikrit na do, dɛn de anawns dɛn sin lɛk Sɔdɔm, dɛn nɔ de ayd am sɛf. Swɛ go fɔdɔm pan dɛm! Bikɔs dɛn dɔn bay denja pak am pan dɛnsɛf.

10Tɛl dɛn wan we de waka tret se ɔltin go fayn fɔ dɛn, bikɔs dɛn go it wetin dɛn plant

11swɛ go fɔdɔm pan dɛm, dɛn wikɛd pipul. I go bad fɔ dɛm, bikɔs na wetin dɛn du dɛn go tɔn gi dɛm bak.

12Mi pipul dɛn na pikin dɛn de mek mi pipul dɛn sɔfa so, ɛn na uman dɛn de rul dɛm. E mi pipul dɛm, na una lida dɛn de mislid una ɛn miks ɔp di rod we una fɔ pas na layf.

13PAPA GƆD dɔn rɛdi fɔ di kes, I dɔn tinap fɔ jɔj in pipul dɛm.

14PAPA GƆD go kot wit di edman dɛn ɛn di bigman dɛm fɔ in pipul; “Na una dɔn tif ɔltin na di greps gadin, di tin dɛn we una tif na di po pipul dɛn an, de na una os dɛn.

15PAPA GƆD Ɔlmayti se, wetin una min we una de mek mi pipul dɛn sɔfa so, ɛn we una de tek advantej pan po pipul?”

16PAPA GƆD se: Bikɔs di uman dɛn na Zayɔn prawd ɛn de lɔŋ dɛn nɛk we dɛn de waka, de luk fɔ man fɔ lidɔm wit, dɛn de spot chɛp chɛp we dɛn de waka, ɛn di baŋuls dɛn de nak na dɛn fut;

17PAPA GƆD go put siknɛs pan Zayɔn in gyal pikin dɛn ed, ɛn PAPA GƆD go mek dɛn nekɛd.

18Da de de, PAPA GƆD go pul di fayn fayn baŋuls kɔmɔt na dɛn fut, di ɛdban we dɛn de put rawnd dɛn ed, ɛn di kɔrɔnɛt dɛm;

19di chen dɛm, di breslɛt ɛn di skaf dɛn;

20di ɛnkincha, di baŋuls we dɛn de wɛr ɔp dɛn an, di sash, di pafyum bɔks dɛn ɛn di tin dɛn we pɔsin kin wɛr ɔp in an fɔ protɛkshɔn;

21riŋ we gɛt dizayn, ɛn nos riŋ dɛn,

22di klos dɛn fɔ wɛr fɔ fɛstival, di gawn dɛm, di lɔŋ kot dɛm, ɛn di anbag dɛm;

23klos dɛn we dɛn mek wit les, di klos dɛn we dɛn tek linin mek, di tɔban ɛn di vel dɛm.

24Bifo una gɛt pafyum, na bad bad sɛnt una go de gɛt; bifo una gɛt gadul, na rop go de; bifo una gɛt ia we mek fayn fayn wan, na bɔled dɛn go gɛt bifo dɛn gɛt dɛn dia dia klos, na saklɔth dɛn go tay; bifo dɛn fayn, na shem dɛn go shem.

25Na sɔd go kil una man dɛn ɛn una pawaful fɛtman dɛn go day na wa.

26Ɛn in get dɛn go kray de munin; in go sidɔm na grɔn lɛk udat dɔn lɔs ɔltin na layf.

← Chapter 2 Jump to: Chapter 4 →