Isaiah 65

Krio (Krio Fɔs Oli Baybul)

← Chapter 64 Jump to: Chapter 66 →

1A bin rɛdi fɔ lɛ dɛn wan dɛn we nɔ aks fɔ mi, fɛn fɛn mi; A bin dɔn rɛdi fɔ lɛ dɛn wan dɛn we nɔ luk fɔ mi, fɛn mi. A bin se, “Luk mi na ya, luk mi na ya,” to di neshɔn we nɔ de pre to mi.

2Ol de, a de opin mi an to pipul dɛn we dɔn tɔn dɛn bak pan mi, pipul dɛn we de du di tin dɛn we gud, bɔt de fala wetin dɛn at tɛl dɛm;

3pipul dɛn we de provok mi bifo mi fes, ɔltɛm, de mek sakrifays na dɛn gadin dɛm ɛn de bɔn insɛns pantap blɔk;

4pipul dɛn we de sidɔm pantap dɛn grev ɛn pas di nɛt na sikrit ples dɛm; de it ɔg bif, ɛn na sup we dɛn tek dɛn bad bad tin dɛn we PAPA GƆD nɔ lɛk de na dɛn pɔt ɛn pan dɛm.

5Pipul dɛn we de se, “Kip to yusɛf, nɔ kam nia mi, bikɔs a tu oli fɔ yu.” Dɛn tin ya na smok na mi nos ol, ɛn faya we de bɔn ol de.

6A de tɛl yu, i rayt bifo mi: “I nɔ go sɛt mɔt, bɔt a go tɔn am gi dɛn, yɛs, a go tɔn am gi dɛm na dɛn buzɔm,

7dɛn sin ɛn dɛn papa dɛn sin togɛda, bikɔs dɛn bɔn insɛns na dɛn mawnten ɛn fityay mi na dɛn il, A go mɛnshɔ di pe fɔ di tin dɛn we dɛn bin dɔn du put na dɛn buzɔm. Na so PAPA GƆD se.

8Na dis PAPA GƆD se: “Lɛk we wayn de na bɔnch greps ɛn dɛn kin se, “Nɔ pwɛl am, bikɔs blɛsin de pan am,’ na so a go du fɔseka mi wokman, ɛn nɔ nyakanyaka dɛn ɔl.

9A go briŋ Jekɔb in pikin pikin dɛm ɛn di wan dɛn na di Juda fambul we go gɛt mi mawnten, kam na di wan dɛn we pik go gɛt am, ɛn na mi wokman dɛn go tap de.

10Sharɔn go tɔn say we ship ɛn got de it gras ɛn Eko vali go tɔn ples fɔ kaw fɔ lidɔm fɔ mi pipul dɛn we dɔn de fɛn mi.

11Bɔt una we dɔn fɔsek PAPA GƆD, we dɔn fɔgɛt mi oli mawten, we sɛt tebul fɔ Tumara Jɛntri ɛn ful kɔp dɛn wit dɛm miksɔp wayn fɔ Dɛstini;

12A go mek, fɔ lɛ dɛn kil una, bi yu dɛstini, ɛn una ɔl go gri lɛ dɛn kil una; bikɔs, wɛn a bin kɔl una, una nɔ bin ansa, we a bin tɔk, una nɔ bin lisin, bɔt una du bad bad tin dɛn na mi yay, ɛn pik fɔ du tin dɛn we a nɔ go gladi fɔ.”

13Fɔseka dat, na dis Papa Gɔd we na Gɔd se: “A de tɛl una, mi wokman dɛn go it, bɔt una go de aŋri wan; biliv mi, mi wokman dɛm go gɛt tin fɔ drink, bɔt una go tɔsti; mi wokman dɛn go de gladi, bɔt dɛn go mek una shem;

14A de tɛl una, mi wokman dɛn go siŋ bikɔ dɛn at gladi, bɔt una go ala de kray fɔseka di pen we de na una at, ɛn una go kray fɔseka di pen na una spirit.

15Una nem go lɛf to mi pipul we a dɔn pik, fɔ tek kɔs pɔsin, ɛn Papa Gɔd we na Gɔd go kil una; bɔt I go kɔl in wokman dɛn difrɛn nem.

16So dat ɛnibɔdi we blɛs insɛf na di land go tek di Gɔd we de waka tret, blɛs insɛf ɛn ɛnibɔdi we de swɛ na di land go swɛ to di Gɔd we de waka tret; bikɔs a dɔn fɔgɛt di trɔbul dɛn we dɔn pas ɛn dɛn dɔn ayd pan mi.

17A mek nyu skay ɛn nyu wɔl; ɛn nɔbɔdi nɔ go mɛmba di fɔstɛm tin dɛm ɔ ivin kam na dɛn maynd.

18Bɔt una gladi ɛn mek gladi gladi sote go bikɔs ɔf wetin a mek; bikɔs, a de tɛl una, a go mek Jerusɛlɛm ples fɔ gladi gladi, ɛn in pipul dɛm go bi pipul dɛn we gladi ɔltɛm.

19A go gladi fɔ Jerusɛlɛm, ɛn gladi fɔ mi pipul dɛm; no mɔ dɛn nɔ go yɛri kray kray ɛn brokat kray insay de.

20Pipul de rɔn wata na yay, ɛn trɔbul kray; fɔ lɛ pikin liv fɔ tu tri de ɛn day ɔ lɛ ol pɔsin day bifo in tɛm, nɔ go bi insay de igen, bikɔs pikin go ol ɔndrɛd ia bifo i day ɛn dɛn go si di wan we day bifo i ol ɔndrɛd se, i gɛt swɛ.

21Dɛn go bil os ɛn tap pan dɛm; dɛn go plant greps fam ɛn it di frut.

22Dɛn nɔ go bil, ɔda pɔsin go tap de; dɛn nɔ go plant, ɔda pɔsin go it; bikɔs, na lɛk aw tik de te na wɔl, na so mi pipul dɛn go liv lɔŋ, ɛn mi pipul dɛn we a dɔn pik go ɛnjɔy wetin dɛn wok fɔ, fɔ lɔng.

23Dɛn nɔ go lebɔ fɔ natin, ɔ bɔn pikin we go briŋ waala; bikɔs dɛn go bi sid dɛm we PAPA GƆD dɔn blɛs, dɛn ɛn dɛn pikin dɛm.

24Bifo dɛn de pre to mi, a go dɔn ansa, as dɛn de tɔk so, a dɔn yɛri.

25Di wulf ɛn di ship pikin go it togɛda, di layɔn go it dray gras lɛk kaw; ɛn na dɔti go bi snek in it. Dɛn nɔ go wund ɔ kil nɔbɔdi na ɔl mi oli mawten dɛm. Na so PAPA GƆD se.”

← Chapter 64 Jump to: Chapter 66 →