Isaiah 8

Krio (Krio Fɔs Oli Baybul)

← Chapter 7 Jump to: Chapter 9 →

1Nain PAPA GƆD tɛl mi se, “Tek wan tablɛt ɛn rayt di laŋwej we ɔlman no. “Dis blant, Maa-shalal-ashbaz.”

2Ɛn a bin gɛt witnɛs dɛn we kin tɔk tru, we na Yuraya we na man we de mek sakrifays fɔ pipul sin, ɛn Zɛkaraya we na Jɛbɛrɛchia in bɔypikin, fɔ tɔk fɔ mi.

3Nain a lidɔm wit mi wɛf we na di prɔfɛtɛs, ɛn i gɛt bɛlɛ ɛn bɔn bɔypikin. Nain PAPA GƆD tɛl mi se, “Gi di pikin nem Maa-shalal-ashbaz;

4bikɔs bifo di pikin bigin kɔl, ‘Papa’ ɔ ‘Mama,’ Asiria dɛn kiŋ in man dɛn go dɔn tek ɔl Damaskɔs in jɛntri ɛn Sameria in gud gud tin dɛn go.

5PAPA GƆD tɔk to mi bak se;

6“Bikɔs dɛn pipul ya nɔ gri tek Shiloa in wata we de rɔn saful saful, ɛn na bifo Rizin ɛn Rɛmalaya in bɔypikin dɛn de trimbul;

7fɔseka dat, PAPA GƆD go mek da big ɛn pawaful Riva in wata kɔba dɛn, dat na di kiŋ na Asiria ɛn ɔl wetin i de tek blɔf ɛn mek nem. I go ovaflo ɔl dɛn gɔta ɛn ɔl dɛn sho dɛn,

8ɛn i go rɔn oba go insay Juda, i go jɛs de ovaflo ɛn go swɛl te rich pipul dɛn nɛk; ɛn in wiŋ dɛm we i prɛd, go fulɔp di land frɔm kɔna to kɔna, E Imanyuɛl.”

9Una put unasɛf dɔŋ, una dɛn pipul dɛn ya, ɛn mek una at pwɛl; una dɛn kɔntri dɛn we de fa, una yɛri o; tay una ɔja tayt fɔ di shɔk; tay una ɔja tayt fɔ di shɔk.

10Una ɛŋed o, bɔt i nɔ go min natin; una tɔk wetin una fil, na fɔ natin, bikɔs PAPA GƆD de wit wi.

11Na PAPA GƆD tɔk so to mi ɛn in an bin de traŋa wan pan mi, ɛn i wɔn mi se mek a nɔ biev di we we dɛn pipul dɛn ya de biev. I se,

12“Nɔ kɔl ɔl wetin dɛn pipul ya kɔl, ‘sikrit plan fɔ du bad’ se na sikrit plan fɔ du bad, ɛn nɔ fred wetin dɛn de fred, ɛn lɛ natin nɔ shek una at.

13Bɔt na PAPA GƆD Ɔlmayti una fɔ si se oli; lɛ i bi se na im una de fred ɛn na im nɔmɔ fɔ una trimbul.

14Ɛn i go tɔn oli ples, ɛn di ston we go ɔfɛnd pipul dɛn, ɛn di big ston we go mek di tu os dɛn na Izrɛl bɔk dɛn fut ɛn fɔdɔm, ɛn go bi trap fɔ di pipul dɛn na Jerusɛlɛm.

15Ɛn bɔku go bɔk dɛn fut pan am; dɛn go fɔdɔm ɛn dɛn prayd go dɔn; dɛn go sɛt trap fɔ dɛn ɛn kech dɛn.

16Tay ɛn kip di mɛsej, ɛn tich mi lanin bɔy dɛn fɔ kip tayt wan na dɛn at.

17A go wet fɔ PAPA GƆD we de ayd in fes pan Jekɔb in pipul, ɛn a go abop pan am.

18So mi ɛn di pikin dɛn we PAPA GƆD dɔn gi mi, na sayn ɛn wɔnin na Izrɛl, we PAPA GƆD Ɔlmayti we tap na Mawnt Zayɔn, de gi.

19Ɛn wɛn dɛn tɛl una se, “Go to dɛn lukgrɔn man ɛn dɛn majik man dɛn we de mek swit mɔt to una, de rid fasfas ɛn kwayɛt wan we yu nɔ de ɔndastand,” di pipul dɛn nɔ fɔ tɔk to dɛn Gɔd? Dɛm fɔ tɔk to dayman fɔseka pipul dɛn we gɛt layf?

20Fɔ di wan dɛn we dɔn yɛri mi tichin ɛn mi mɛsej fɔ no wetin fɔ du! Fɔ tru, di wan dɛn we de tink fɔ tɔk to dayman, nɔ go si do klin.

21Dɛn go pas insay di land wit bad bad pwɛl at ɛn aŋri; we dɛn aŋri, dɛn kin vɛks bad bad wan ɛn kin kɔs dɛn kiŋ dɛn ɛn dɛn Gɔd, ɛn dɛn kin es dɛn fes ɔp;

22ɛn dɛn go luk na grɔn, bɔt na pwɛl at ɛn daknɛs dɛn go si, we na bad bad pen; we go put dɛn insay tik tik daknɛs.

← Chapter 7 Jump to: Chapter 9 →