1 Peter 2

Kurukh (पुना गच्छरना NT (BSI))

← Chapter 1 Jump to: Chapter 3 →

1औंगे नीम उर्मी रकम ही मलदौ अरा उर्मी ठकना अरा उतुरमाड़ना गुट्ठी अरा इस्‍गहा गुट्ठी अरा उर्मी मलदौ कछनख्रना गुट्ठी ती निमन तरकूटी उइय्या।

2अरा पुना कुन्‍द्रका ख़द्दर दुदही गे तरसारनर अदही लेक्‍खा नीम हूँ सुध बॊलता ही दुदही गे तरसारना नू र'आ, होले आद ती नीम निम्है नाड़रना नू पूरा परद'ओर।

3एन्देरगेका नीम अगमाचका र'अदर का नेम्हा पुथी नू बाचका लेक्खा “उर्बस एवंदा बॆस र'अस”।

4नीम गा मसीस गुसन बर'आ, एकास धर्मेसी मन्दिर ही उज्जना पखना हिकदस। आस आलर ती तरकूटी नन्तारकादस, लिकिन धर्मेस ती चाजरका अरा आस ती कोड़हे मईन ख़क्ख्रका र'अस।

5नीम हूँ उज्‍जना पखना गुट्ठी लेक्‍खा र'अदर का धर्मेसी बॊलता कमना धर्मेसी एड़पा कम्रनुम कादर। अरा नीम आसी नेम्‍हा नैग खोंड़हा हूँ हिकदर। अरा येसु मसीस एन्देर नंजकादस अदही चड्डे नीम बॊलता दाँड़े गुट्ठिन अरगदर, एकदा धर्मेसिन पत्तार'ई।

6एन्देरगेका नेम्‍हा पुथी नू एन्ने लिख्रकी र'ई का, “ऎरा, ऎन येरुसलॆम नू ओन्‍टा चाजरका अरा कोड़हे मईन ही कोंड़ा पखनन उइय्‍दन, नॆ आसी मइय्याँ पत्त'ई आस इकला हूँ मल लजर'ओस।”

7आसिन पत्त'ऊ निमा गे आ पखना कोड़हे मईन ही र'ई। लिकिन आसिन मल पत्त'उर गे नेम्‍हा पुथी एन्ने ब'ई का, “एड़पा कम'उर एका पखनन अनभनियाँ बाचर ती ताँड़चका चिच्काचर आदिम कोंड़ा ही कुक्कु पखना मंजा।”

8अरा अउरिम नेम्हा पुथी ब'ई का, “आस आलर गे मूड़ना ही पखना अरा आर गे थोथमारना ही चचड़ी र'अदस।” आर धर्मेसी कत्थन मल पॆस्रना ती मूड़नर। ईदिम आर गे धर्मेसी मने रहचा।

9लिकिन नीम गा ओन्टा चज्‍जिका जंईपुंई, अरा ओन्टा बॆल नैग ख़ोंड़हा, अरा ओन्टा नेम्‍हा जाती, अरा धर्मेसी तंग्‍है आलर हिकदर। नॆ निमन ऊख़ा ती ओथ्रस ती तंग्है अजगुत लौकारना बिल्‍ली नू मीख़ियस ओन्द्रस, आसी कोहाँ नलख गुट्ठिन आलर गे तेंगा गेम नीम एन्ने मन्रकादर।

10मुन्द नीम धर्मेसी आल एन्ने मल अखतारकर, लिकिन अक्‍कु गा नीम धर्मेसी आलर हिकदर। मुन्द नीम धर्मेसी सोग्‍गेन मल ख़क्खकर, लिकिन अक्‍कु गा आसी सोग्गेन ख़क्खकर।

11अना चोन्हा आलारो, नीम ख़ॆख़ेल नू जोक्का उल्ला गे र'उर अरा बहरीतर लेक्खा र'अदर। औंगे ऎन निमन आनदन का नीम मॆद ही रिझ रंग गुट्ठी ती तरकूटी र'आ, एकदा निम्है बॊलता ही बिड़दो अरबा-नख्र'ई।

12मल पत्त'उर ही मझी नू निम्‍है उज्‍जना ओक्‍कना बॆस र'अना र'ई। औंगे आर निमन मलदौ ननू ब'अनर ती बदी नन्नर ती हूँ, निम्‍है दौ नलख गुट्ठिन ऎरोर ती धर्मेस आलारिन नेंवई नना गे बरना उल्ला नू असिन महबा ननोर।

13नीम उर्बासी पॆसकन पॆस्र'उर र'अना ती आलर गे चीरका ओन्टे ओन्टे अदिया ही तबे नू र'आ। उर्मी ती कोड़हे अदिया उइय्यू बॆलस गे,

14अरा मलदौ ननुर गे डंडे चि'आ गे अरा दौ ननुर ही ओहमा नना गे बॆलस तरती उइरका राजीख़ापुर ही हूँ तबे नू र'आ।

15एन्देरगेका नीम निम्‍है दौ नलख ती लूर मलका आलर ही मलदौ कत्‍था कछनख्रनन मुढ़'आ गे धर्मेस बेद्ददस।

16नीम छछिन्‍द आलर लेक्‍खा उज्जा। लिकिन नीम गा धर्मेसी बिट्ठी ननू जॊंख़ र'अदर, औंगे निम्है छछिन्द आबोन मलदौ नना गे अमा बउर'आ।

17ओर्मारिन मईन नना। पत्त'ऊ भईर गने चोन्‍हा नना। धर्मेसिन एल्‍चा। बॆलासिन मईन नना।

18अना बिट्ठी ननू जॊंख़ारो, नीम निम्है उर्बारिन कोड़हे मईन ननरकी आर ही तबे नू र'आ। दौ अरा लुदऊ उर्बर गे लेका मला लिकिन कुचरहा उर्बर ही तबे नू हूँ र'आ,

19एन्‍देरगेका नीकईम तंग्है उज्जना नू धर्मेसी मने ईद एन्ने अख़ना ती बिगर नेंवई ती कोड़हे सस्‍ती चोद्दस ती कलपारदस होले, आस धर्मेसिन खुसमारतादस।

20नीम इन्द्रिइम गलती नन्दर ती अदगे ख़क्खना दंडेन सहदर होले, आद ती निमा एन्देर हूँ नफा मल मनो। लिकिन नीम दौ नलख नंजका ही चड्डे सस्ती सारदर, अरा अदिन नीम कयास ती सहदर होले, आद धर्मेसिन खुसमारत'ई।

21इदगेम नीम मॆंख्रका हूँ र'अदर। एन्‍देरगेका मसीस हूँ निमा गे सस्‍ती सारचस ती नीम आसी उज्जना ओक्कना लेक्‍खा उज्जा ऎका गे निमा गे ओन्टा चिन्हा आबोन अम्बका केरकादस।

22आस पाप मल नंजस अरा आस इकला हूँ मल ठगचस।

23आस केबेर मोक्‍खस ती मल केप्‍पस, अरा दुक्‍खे चोद'अरकी नॆकन हूँ मल धिराब'आ लगियस। लिकिन आस गा तंगन मानी गने नेंवई ननू धर्मेसी ख़ेक्खा नू सोंपचस चिच्चस।

24आस नम्‍है पाप गुट्ठिन तंग्‍है मॆद नू चेड्डस ती क्रुस नू अरगियस, एकत्रु नाम पाप नन्नन अम्बदत ती उजगो उज्जना उज्जा ओंग्दत। अरा आसी लौर मोक्का ती नीम उजगारका र'अदर।

25मानिम नू मुन्द नीम बेहड़ारका भेंडो लेक्‍खा रहचकर, लिकिन अक्‍कु निम्‍‍है जिया गुट्ठी ही ख़ापुस अरा ईरु-ख़ूजुस मसीस गुसन किर्रका बरचका र'अदर।

← Chapter 1 Jump to: Chapter 3 →