1 Peter 3

Kurukh (पुना गच्छरना NT (BSI))

← Chapter 2 Jump to: Chapter 4 →

1अन्नेम अना मुक्‍कारो! नीम हूँ तम्है तम्‍है मॆतर ही आकुस नू र'आ। होले आर ती नेकईम धर्मेसी कत्थन मल पत्त'उर र'अना ती हूँ, नीम आर गे धर्मेसी पत्त नू तेंगना ती मला लिकिन नीम निम्है दौ उज्‍जना ओक्‍कना ती आरिन धर्मेस तरा किर्रत'आ ओंगोर दने।

2आर निम्है नेम्हा उज्जनन अरा नीम आर गे चि'अना मईन आबोन ऎरोर ख़ने, आर धर्मेस तरा किर्रा ओंगोर दने।

3बिनयारना खोपा मुलरना, अरा सोना ही सिंगार, अरा नापे नापे किचरी गुट्ठी ती अत्तना कुन्दरना ही बहरी ता सिंगार ही पत्त नू अमा सोच'आ।

4लिकिन निम्है सिंगार गा निम्है भितरी उज्जना ही सिंगार र'अना र'ई। नीम निमन लुदऊ अरा सल जिया ती सिंगार'आ। ईदिम मल नठारना सिंगार हवे, अरा धर्मेसी ऎरना नू कोड़हे मान ही र'ई।

5ई लेक्‍खम चिरान नू धर्मेस नू असरा उइय्का नेम्हा मुक्‍कर हूँ तम्‍है मॆतर ही आकुस नू र'आ लगियर ती तमन सिंगर'आ लगियर।

6ई लेक्खम सारा तंग्है मॆतस अब्राहमसिन उर्बा ब'आलिया ती आसी पॆसकन पॆस्र'आ लगिया। अरा नीम हूँ एन्‍द्रा मानिम र'ई अदिन बिगर इल्‍चका ननोर होले, नीम अदही ख़द्द मनोर।

7अन्नेम अना मॆतारो! नीम निम्है मुक्‍का गने ठौका बुझ्रना अरा अदही मइय्याँ ता सोच गने उज्‍जा। अरा मुक्‍कारिन निम्है ती पयहा आल अख़'आ ती अरा निम्है गने मल मुंज्रना उज्‍जना ही धर्मेसी सोग्‍गेन ख़क्‍खका अख़'आ ती आरिन मईन नना। नीम एन्ने ननोर होले, नीम सान्ति जिया ती र'ओर अरा बड़ियर गोहरार'आ ओंग्दर।

8छेद्द नू आन्‍दन, नीम ओर्मर ओन्टे जिया ओर्त ओर्तर ही पत्त नू सोच नू र'आ, ओर्मारिन भईर लेक्‍खा चोन्हा नना, सोग्‍गे ईरू अरा लुदऊ जिया मना।

9नीम मलदौ ही ऊजी मलदौ अमा नना, केबना ही ऊजी अमा केबा, लिकिन ऊजी नू बरकत दिम नना। एन्नेम नीम ननोर होले धर्मेस निमन बरकत ननोस, इदगेम नीम मॆख़्रका र'अदर।

10एन्‍देरगेका नेम्हा पुथी नू एन्ने लिख्रकी र'ई का, “नॆ खुस ती उज्‍जा गे बेद्ददस अरा दौ उल्‍ला गुट्ठिन ऎरा बेद्ददस, आस मलदौ मल ब'अना र'ई, अरा आस मल ठकना र'ई।

11अरा आस मलदौ ती तरकूटी र'अरकी दौ नन्ना र'ई। अरा आस कोड़ेन बेद्ददस ती अइय्यम उज्जना ऎकना र'ई।

12एन्‍देरगेका उर्बासी ख़न्न उजगो आलर ही मइय्याँ टक टकने ऎरते र'ई, अरा आसी ख़ेबदा आर ही गोहरारना नू ओड़चकी र'ई। लिकिन उर्बस मलदौ ननुर ती मुहिन बिड़दो नन्दस।”

13नीम दौ नन्ना गे कोड़हे पत्तारदर होले, नॆ निमा गे मलदौ ननोस?

14लिकिन नीम दौ नन्ना चड्डे दुक्‍खे चॊद्दर होले, नीम धर्मेस ती आसीस ख़क्‍खोर। नेम्हा पुथी नू लिक्खरका लेक्खा नना का, “नीम आर ही इल्चताना गुट्ठी गे अमके एल्‍चा अरा अमके धुकपुकर'आ।”

15लिकिन नीम मसीसिन निम्‍है उज्जना नू उर्बस ब'अरकी इंझ्ररकी आसिन मईन नना। अरा नेकईम मसीसी मइय्याँ ता निम्है असरा ही पत्त नू इन्द्रिइम मेन्नर होले, आर गे अदही पत्त नू बुझुरत'आ गे सगरो सपड़ारका र'आ।

16लिकिन लुदऊ जिया अरा मईन गने इदन नना। अरा निम्‍है लखनन निमन उइय्या। ख़ने मसीस नू निमा गे र'अना बॆस जज्जना ओक्कना ही बिड़दो नू मलदौ सोच ती कछनख्र'उर तम्है हींड़ना कत्था ही पत्त नू लज्‍जे मॊंख़ोर।

17मलदौ ननरकी दुक्खे चॊदना ती, धर्मेसी मने ईदिम होले, दौ नन्ना ती दुक्‍खे चॊदना कोड़हे बॆस र'ई।

18इवंगेका मसीस नन्नर ही पाप गुट्ठी गे ओंग्होल लेका केच्चस केरस। आस धर्मेसी ऎरना नू उजगो रहचस, लिकिन आस निमन धर्मेस गुसन अंड़सत'आ गे धर्मेसी ऎरना नू उजगो मलकर गे केच्‍चस। आस कया ती गा पिटतारस, लिकिन बॊलतस नू उज्‍जतारस।

19अउर हूँ आस बॊलतस ती केरस ती गुड़रका बॊलता गुट्ठी गे दौ कत्‍था मेन्ताचस।

20अबड़ा बॊलता गुट्ठी ईर हिकनर का, एका ओर्तर चिरान नू नूहसी परिया नू आस कोहाँ डोंगा कमना उल्ला गुट्ठी नू धर्मेस कोड़हे कयास गने पाब ऎरा लगियस ख़ने, आसी पॆसकन मल पॆस्रर। आ कोहाँ डोंगा नू जोक्कोर लेका आठ आलर लेका बया बहड़ी ती बछरर।

21ई अम्मु अक्कु निमन नाड़र'ऊ नॊड़रना ही चिन्हा हवे। ई नॊड़रना मॆद ही कस्‍सन ओथ्र'आ गे मला, लिकिन आद धर्मेसी मुन्दहारे मानिम लखना गने नन्ना गच्छरना हवे। ई नॊड़रना इदन ईद'ई का, येसु मसीसी उज्‍जा चो'अना ही चड्डे निमा गे नाड़रना ख़क्ख्रकी र'ई।

22मसीस मेर्ख़ा नू केरस ती कोड़हे मईन ही अड्डा धर्मेसी तीना पक्खे ओक्का र'अदस। अरा उर्मी मेर्ख़ा पैकर अरा अदिया गुट्ठी अरा सवंग गुट्ठी आसी आकुस ही किय्या र'ई।

← Chapter 2 Jump to: Chapter 4 →