1 Peter 5

Kurukh (पुना गच्छरना NT (BSI))

← Chapter 4 Jump to:

1निम्है मझी ता सेयान आलर गे, आर ही लेक्खा संगे सेयान आलन, अरा मसीस सारचका सस्ती गुट्टी ही गोवाह, अरा दहदर मन्ना महबा नू मेस्र'ऊ र'अना एंग्है रिझ्रत'अना ईद र'ई का:

2धर्मेसी निम्है ख़ेक्खा नू सोंपचका आसी खोंड़हन ख़ापा, एकदा निम्है मझी नू र'ई। अरा ईरू-ख़ूजुर लेक्खा सुसर नना। ढेवा ढेवा ती मला, लिकिन धर्मेस नीम नना गे बेद्दना लेक्खा सौंसे जीया ती अदन नना। मलदौ अर्ज'आ गे मला, लिकिन कोड़हे रिझ गने आ सुसर आबोन नना।

3अरा निम्है ख़ेक्खा नू ऎरा ख़ॊजा गे चीतारका आलर ही मइय्याँ नीम आकुस ननू लेक्खा अमा र'आ, लिकिन बॆस नमुना मनरकी आरिन कड़हाब'आ।

4नीम एन्ने ननोर होले, इकला मुध महरस दहदर मनोस, आ बारी नीम तंग्है बिल्चनन मल अम्बना महबा अरा मईन ही मुकुटन ख़क्खोर।

5अन्नेम अना जॊंख़ारो! नीम सेयान आलर ही आकुस नू निमन चि'आ। अरा नीम ओर्मर लुदऊ मनरकी ओर्त ओर्त गे सुसर नना। एन्देरगेका नेम्हा पुथी एन्ने ब'ई का, “धर्मेस फुलई मनुर ही बिड़दो मन्दस, लिकिन आस लुदऊ र'उर ही मइय्याँ सोग्गे ऎरदस।”

6औंगे नीम निमन धर्मेसी सवंगिय ख़ेक्खा किय्या लुदऊ मना ती र'आ, होले ठौका बेड़ा नू आस निमन मइय्याँ चॊद'ओस।

7निम्है उर्मी घोख गुट्ठिन आस गे चिलघ'आ, एन्देगेका आस गे निम्है सोच र'ई।

8चिहुंक र'आ, अरा एज्रका र'आ। निम्है कोहाँ बैरी नाद मुर्ना लकड़ा लेक्खा इदिन बेद्दा कुद्दी का नॆकन चर्रोन मॊख़ोन।

9निम्है पत्त'अना नू बड़ियर मना ती आसी बिड़दो नू जुझर'आ। एन्देरगेका नीम अक्कर का, सौंसे ख़ॆख़ेल नू ता निम्है मसी भई बहिनर हूँ निम्है लेक्खम सस्ती सार'आ लगनर।

10अक्कु उर्मी दसा नू उर्मी रकम ही संगरा ननुस धर्मेस निमन मसी येसुस नू ता निम्है पत्त'अना ही चड्डे तंग्है मल मुंज्रना महबा नू मीख़ियस। नीम जोक्क घड़ी सस्ती सारका ख़ॊख़ा आस तानिम निमन पोकता ननोस, अरा बड़ियर ननोस, अरा सवंग चि'ओस ती बड़ियर इज्जत'ओस।

11आस गे सवंग हुल्लो ती हुल्लो गूटी र'अन नेकअन। आमेन।

12ऎन निमा गे ई चिठिन सीलासी संगरा ती सन्नी रूपे नू लिखचकन ती तइय्दन। आसिन ऎन ओन्टा पत्त'अना जॊगे भई अख़दन। निमन रिझ्रत'आ गे अरा ईदिम धर्मेसी मानिम मया एन्ने गोवाह तेंगा गे ऎन इदन लिखचका र'अदन। औंगे ई मया नू नीम बड़ियर बन्चका र'आ।

13निम्है गने चज्जरका र'अना बाबुलॊन ही कलीसिया हूँ निमन मोंजरा ननी। अन्नेम एंग्है ख़द्द लेक्खा चोन्हा ही मरकुस निमन मोंजरा नन्दस।

14कोड़हे चोन्हा ही चोंखा गने ओर्त ओर्तारिन मोंजरा नना। मसीस नू र'ऊ निमा ओर्मर गे कोड़े मनन नेकअन।

← Chapter 4 Jump to: