Joel 1

Luganda (Luganda Bible 2003) (LB03)

Jump to: Chapter 2 →

1Buno bwe bubaka Mukama bwe yawa Yoweeli, mutabani wa Petweli.

2Muwulire kino mmwe abakadde, mutege amatu mmwe mwenna abatuuze b'omu Buyudaaya. Kino kyali kibaddewo mu mirembe gyammwe? Oba mu mirembe gya bajjajjammwe?

3Mubuulireko abaana bammwe, bo bakibuulireko be bazaala nabo bakibuulireko ab'omulembe oguddirira.

4Ebibinja n'ebibinja by'enzige bizinze ebirime. Ebirekeddwawo ekibinja ekimu, ekibinja ekirala kibiwemmense.

5Mmwe abatamiivu, muzuukuke, mukaabe amaziga. Mmwe abanywi b'omwenge, mukungubage, kubanga emizabbibu omukolebwa omwenge ogubawoomera, gizikiriziddwa!

6Eggye ly'enzige lizinze ensi yange. Za maanyi era nnyingi nnyo tezibalika. Amannyo gaazo masongovu, era moogi ng'ag'empologoma.

7Zizikirizza emizabbibu gyange, zigisasambuddeko ebikuta, amatabi gaagyo gafuuse meeru.

8Mukungubage ng'omuwala eyeesibye ekikutiya, okukungubagira omusajja gw'abadde agenda okufumbirwa.

9Bakabona abaweereza ba Mukama bakungubaga, kubanga tewakyali mmere ya mpeke era n'ebyokunywa, ebiweebwayo mu Ssinzizo lya Mukama!

10Ennimiro zizise, ensi ewuubadde, kubanga eŋŋaano ezikiriziddwa, emizabbibu gikaze, n'emiti emizayiti giwotose.

11Mmwe abalimi munakuwale, mmwe abalabirira emizabbibu, mukungubage. Kubanga eŋŋaano ne bbaale, n'ebirala byonna ebikungulwa bizikiridde.

12Emizabbibu giwotose, emitiini giyongobedde, omukomamawanga n'olukindu n'emiti emirala gyonna egy'ebibala, gikaze.

13Mmwe bakabona, mwesibe ebikutiya mukungubage. Mmwe abaweereza ku alutaari, mukube ebiwoobe. Mmwe abaweereza ba Katonda wange, muyingire mu Ssinzizo, musule nga mwambadde ebikutiya, kubanga emmere ey'empeke era n'ebyokunywa, ebiweebwayo mu Ssinzizo lya Katonda wammwe, tebikyaleetebwa.

14Mulangirire okusiiba, muyite olukuŋŋaana. Mukuŋŋaanye abakulembeze n'abantu bonna ab'omu Buyudaaya. Bajje mu Ssinzizo lya Mukama, Katonda wammwe, mumukaabirire.

15Olunaku lwa Mukama lunaatera okutuuka. Lwe lunaku lwa Mukama, Omuyinzawaabyonna, lw'alireeterako okuzikirira! Olunaku olwo nga lwa ntiisa!

16Ebirime byaffe bizikiriziddwa nga ffe tutunula. Essanyu n'okujaguza biweddewo mu Ssinzizo lya Katonda waffe.

17Ensigo zifiira mu ttaka ekkalu. Amawanika galekeddwawo, amaterekero goonoonese, kubanga tewakyali mmere ya mpeke eterekebwa.

18Ensolo zisinda, ente zisobeddwa, kubanga tezikyalina muddo. N'amagana g'endiga nago gabonaabona.

19Ayi Mukama, nkukaabirira ggwe, kubanga omuddo ogw'omu ttale n'emiti egy'omu nnimiro bikaze, biri ng'ebyokeddwa omuliro.

20N'ensolo ez'omu ttale zikukaabirira, kubanga emigga gikalidde amazzi, n'omuliro gwokezza omuddo ogw'omu ttale.

Jump to: Chapter 2 →