2 Peter 3

Luganda (BIBU1) (BIBULIYA ENTUKUVU)

← Chapter 2 Jump to:

1Abaagalwa, eno ye bbaluwa eyookubiri gye mbawandiikidde; mu zombi ŋŋenderedde kukakamula birowoozo byammwe ebyesimbu nga mbajjukiza

2nti mwandijjukidde ebyo ebyayogerwa edda abalanzi abatuukirivu, n'ebiragiro by'Omukama era Omulokozi Abatume bammwe bye baabawa.

3Ekisookera ddala, mutegeere nga mu nnaku ez'oluvannyuma walijjayo abaduuze, abajjirira okuduula, abagoberera amaddu gaabwe gokka,

4nga bagamba nti: “Bye yasuubiza nti ajja biruwa? Bajjajja kasooka bagalamira byonna bikyali nga bwe byali ku masooka g'okutondebwa.”

5Mu bugenderevu beerabira nti eggulu lyabaawo dda Katonda lwe yayogera ekigambo, n'ensi n'ekolebwa n'amazzi ng'eggyibwa mu mazzi;

6era nti ensi eyo eyaliwo yabikkibwa mu mujjuzi n'amazzi ago n'ezikirira.

7N'ekigambo ekyo kyennyini, eggulu n'ensi ebiriwo kati byazzibwawo ne kibikuuma okutuusa lwe biryokebwa omuliro ku lunaku olw'okulamulibwa n'okuzikirira kw'abantu abatatya Katonda.

8Abaagalwa, waliwo ekigambo kiikino kimu kye mutasaanye kwerabira, nti ew'Omukama olunaku olumu luli ng'emyaka olukumi, n'emyaka olukumi giri ng'olunaku olumu.

9Omukama bw'asuubiza, talwa kutuukiriza ky'asuubizza, ng'abamu bwe bamuvunaana nti aludde. Wabula akyakwatiriddeko olw'okubeera mmwe nga tayagala wabeerewo bazikirira, wabula nti bonna batuuke ku kwenenya.

10Lwo olunaku lw'Omukama lulijja ng'omubbi; olwo eggulu liriggwaawo mu kubwatuka, ebintu eggulu mwe lyakolebwa ne bisaanuuka mu muliro; ensi na byonna ebigiriko birisirikka.

11Oba byonna bino biriseebengerera, mmwe abantu nga kibagwanidde okuyisa obulamu obutukuvu, obw'ekisomi,

12nga mulinda mutyo era nga bwe mwanguyaako okutuuka kw'olunaku lw'Omukama, eggulu lwe liryaka ne liseebengerera ne bye lyakolwamu lwe birisaanuuka olw'omuliro.

13Tulinda eggulu eriggya n'ensi empya omuli obutukuvu, nga bwe yatusuubiza.

14Awo nno, abaagalwa, nga bwe mulinda ebyo, mufube abasange mu ddembe nga temuliiko bbala na musango.

15Mukama waffe okugira ng'akyakwatiriddeko, mukitwale ng'omukisa gwammwe okulokoka. N'owooluganda omwagalwa Pawulo bw'atyo bwe yabawandiikira mu magezi ge yaweebwa,

16ebyo n'abyogerako, era nga bw'abyogerako mu bbaluwa ze zonna. Mu bbaluwa ezo osangamu oluusi ebizibu okutegeera, abatali bayigirize n'abatali banywevu bye batabulatabula ne beereetera okuzikirira, nga bwe bakola Ebiwandiiko ebirala.

17Awo nno, mmwe abaagalwa, mutegedde nga bukyali; mwerinde, muleme kutwalirizibwa bukyamu bw'abantu omutali mpisa ne muva awammwe we munyweredde.

18Naye mweyongere mu neema ne mu kumanya Mukama waffe era Omulokozi Yezu Kristu. Aweebwe ekitiibwa, kaakano n'okutuusa ku lunaku olw'emirembe egitaliggwaawo. Amiina.

← Chapter 2 Jump to: