2 Thessalonians 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Abooluganda, tubeegayiridde, ku bidda ku kujja kwa Mukama waffe Yezu Kristu naffe okumukuŋŋaanirako,

2muleke kutya mangu ago mu mitima na kubuguumirira olw'okulabikirwa omwoyo, oba ebigambo ebyogerwa, oba ebbaluwa gye bagamba mbu yava waffe, nga bigamba nti olunaku lw'Omukama lutuuse.

3Baleme kubawubisa; kubanga lwo okutuuka walisookawo kwabulira ddiini n'okulabika kw'omubi, ow'okuzikirira,

4awakanya era eyeepankira ku buli kyonna ekiyitibwa Katonda oba ekisinzibwa; alyewaŋŋamya mu Kiggwa kya Katonda, ne yeeyita Katonda.

5Temujjukira nti bwe nali nkyali ewammwe eyo, nabagamba bwe ntyo?

6Mumanyi nti waliwo ekikyamuziyizza okutuusa lw'alyolekebwa mu kadde ke.

7Obugwenyufu bwekisizza, naye bwatandika dda okukola; oyo akyakwatiridde ajja kukola atyo okutuusa lw'aliggyibwawo.

8Omubi olwo alirabika, naye Omukama alimuzikiriza n'omukka gw'akamwa ke, n'amusaanyaawo n'okulabika kwe n'amajja ge.

9Okujja kw'omubi kulirabika n'ebikolwa bya Sitaani eby'amaanyi ko n'obubonero n'ebyewuunyo ebigingeginge,

10na buli kubuzaabuza kubi ku abo ab'okuzikirira kubanga bagaana okwagala amazima balyoke balokoke.

11Katonda kyava abasindikira okubuzibwabuzibwa okw'amaanyi bakkirize ekitali kituufu,

12olwo abo bonna balyoke basalirwe omusango abo abatakkiriza mazima, wabula abasanyukira mu butali butuukirivu.

13Wamma bulijjo tuteekwa okwebaza Katonda ku lwammwe, abooluganda Omukama b'ayagala, kubanga Katonda yabalonda mu kusookera ddala mulokoke nga mutukuzibwa Mwoyo n'olw'okuba nga mwakkiriza amazima.

14Mu Vangili yaffe mwe yabayitira ku kino, mulyoke mugabane ku kitiibwa kya Mukama waffe Yezu Kristu.

15Kale nno abooluganda, mugume, munywerere ku kye tuzze tubawa, bye twabayigiriza n'akamwa oba mu bbaluwa yaffe.

16Mukama waffe Yezu Kristu ne Katonda Kitaffe eyatwagala, mu neema ye eyatuleetera ekikubagizo ekitaggwaawo n'essuubi eddungi,

17babagumye emitima, baginyweze mu buli ngeri ya mulimu mulungi na buli kigambo.

← Chapter 1 Jump to: Chapter 3 →