Habakkuk 1

Luganda (BIBU1) (BIBULIYA ENTUKUVU)

Jump to: Chapter 2 →

1Obubaka Abakkuku bwe yafuna.

2Ayi Mukama, nnaatuusa wa okuwanjaga onnyambe, naye ggwe nga towulira, oba okuleekaana gy'oli nti: “Obukambwe!” naye ggwe nga tolokola?

3Lwaki ondeka okulaba ebikyamu, lwaki ogumiikiriza obugwenyufu? Okwonoona n'obukambwe bye ndaba, Empaka ze ziriwo, n'ennyombo zisituse.

4Etteeka kyeriva liggwa amaanyi, n'obwenkanya tebuvaayo. Anti ababi babuutikidde abatuukirivu, obwenkanya bwe butyo ne butyoboolwa.

5“Mutunuulire amawanga mulabe, mwewuunye, muwuniikirire. Kubanga nkola ekikolwa mu budde bwammwe kye mutandikkirizza nga kibanyumiziddwa.

6Kuba ŋŋenda okusitula Abakaludeya, eggwanga eribuubuuka, ekkambwe, eriyita wonna ku nsi, litwale ebisulo ebitali byalyo.

7Lya ntiisa, likuba encukwe, be beewa etteeka n'obuyinza.

8Embalaasi zaabwe ziwenyuka okukira engo; bakambwe okukira emisege gy'ekiro; abeebagazi baabwe bajja buteesagga; abeebagazi baabwe bava bunaayira; babuuka ng'empungu ng'ekwakkula okulya.

9Bonna bajjirira bukambwe; amaaso gaabwe gali ng'empewo ey'ebuvanjuba, bakuŋŋaanya abasibe ng'omusenyu.

10Banyooma bakabaka, bakongoola abakungu, basekerera buli kigo; batuuma embibiro ne babikwata.

11Bayitawo luwunguko nga mpewo ne beeyongerayo. Bazzi ba misango, amaanyi gaabwe ye lubaale waabwe.”

12Kazzi, ayi Mukama, toli wa mirembe na mirembe, ayi Katonda wange, Omutuukirivu, atafa? Ayi Mukama, wabateekawo balamule; ayi Lwazi, wabassaawo babonereze.

13Amaaso go matukuvu nnyo okugatunuza ku kibi, togumiikiriza kikyamu. Lwaki ate otunuulira ab'enkwe? Lwaki osirika ng'ababi bamira bugobo ababasinga obutuukirivu?

14Abantu wabakola ng'ebyennyanja mu nnyanja, ng'ebyewalula ebitalina abikulira.

15Bonna abasikayo n'eddobo, abakwasa mu kiragala kye, n'abakuŋŋaanya mu katimba ke; awo n'asanyuka n'asagambiza.

16N'olw'ekyo atambirira ekiragala kye, n'anyookeza akatimba ke obubaani, kubanga mu byo mw'aggya obulamu obw'ekigagga, n'ekyokulya kye ekyassava.

17Kyanaavanga afukumula akatimba ke bulijjo, n'azikiriza amawanga awatali kusaasira ennaku zonna?

Jump to: Chapter 2 →