Habakkuk 3

Luganda (BIBU1) (BIBULIYA ENTUKUVU)

← Chapter 2 Jump to:

1Essaala ya Abakkuku omulanzi. Mu ddoboozi lya kukungubaga.

2Ayi Mukama, nawulira ku ttutumu lyo, Mpuniikirira, ayi Mukama, olw'ebyo by'okola; biddemu ne mu nnaku zaffe; bimanyise ne mu budde bwaffe; ng'osunguwadde, jjukira okusaasira.

3Omukama yajja ng'ava e Temani, Omutuukirivu ng'ava ku lusozi Parani. Ekitiibwa kye kyabikka eggulu, n'ettendo lye ne lijjuza ensi.

4Okutangalijja kwe kwali ng'okw'emisana, ebimyanso nga bimyansa mu mikono gye, omwo nga mwe mukwekeddwa obuyinza bwe.

5Olumbe lumukulembeddemu, kawumpuli ng'ajja agoberera mu bigere bye.

6Yayimirira, n'ayuuguumya ensi; yatunula, n'akankanya amawanga. Ensozi ez'edda ne zimulunguka, obusozi obwa ddi na ddi ne bubutama. Amakubo ge ga mirembe gyonna.

7Nalaba weema za Kusani nga ziri mu nnaku, ebisulo by'e Midiyaani nga bijugumira.

8Ayi Mukama, wali osunguwalidde migga? Wali onyiigidde ngezi? Wali okambuwalidde nnyanja, lwe weebagala ku mbalaasi zo, ku bigaali byo eby'obuwanguzi?

9Wabikkula omusaale gwo, n'ossa obusaale bungi ku kaguwa Ettaka walyasaamu emigga,

10ensozi zaakulaba ne zenyoola olw'obulumi; amazzi ag'omujjuzi ne gayitawo, eddubi ne liyira, ne lisitula amayengo gaalyo.

11Enjuba n'omwezi byasigala mu bisulo byabyo, byadduka nga birabye okutemagana kw'obusaale bwo, n'okutangalijja kw'effumu lyo erimyamyansa.

12Mu busungu watambula wonna mu nsi, mu buswandi walinnyirira amawanga.

13Wavaayo okuwonya abantu bo, okulokola omusiige wo. Wakuba omutwe gw'ennyumba y'omubi, n'omwambula okuva ku mutwe okutuuka ku bigere.

14Wafumita n'effumu lyo omukulu w'abatabaazi be, abajja nga kibuyaga okutubunya emiwabo, nga basanyuka ng'abakavvulira omunaku gye yeewogomedde.

15Wasambirira ennyanja n'embalaasi zo; n'osiikuula eddubi ery'amazzi amangi.

16Nawulira, omutima gwange ne gunkuba, emimwa ne ginkankana ku lw'eddoboozi; amagumba gange ne gavunda, n'entegetege ne zinfamba. Naye nzija kulinda n'obugumiikiriza olunaku olw'obuyinike olulijjira eggwanga eryo eritulumba.

17Newandibadde ng'omukunyu tegutojjedde, ne ku mizabbibu nga tekuli bibala, n'oliva nazo nga tezibaze, n'ennimiro nga teziwadde mmere, ne mu kisibo ne bwe mutaliba ndiga, ne mu magana nga temuli nte,

18era nze ndisanyukira mu Mukama, ndijaguliza mu Katonda mulokozi wange.

19Omukama Katonda ge maanyi gange, ebigere byange abifuula ng'eby'ennangaazi, ansobozesa okwambuka mu nsozi. Eri omuyimbisa: lwa ku bivuga eby'enkoba.

← Chapter 2 Jump to: