Habakkuk 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Nzija kuyimirira we nkuumira, nzija kwesimba waggulu ku kigo, neetegereze ndabe ky'aŋŋamba ne ky'anaddamu okwemulugunya kwange.

2Awo Omukama n'annyanukula: “Wandiika ky'olabye mu kulabikirwa, kirage bulungi ku kayinja, anaaba akisomye adduke nakyo.

3Kubanga ky'olabye mu kulabikirwa kirinda kadde kaakyo; kyanguwa okutuuka ku nkomerero era tekiibe kya bulimba. Ne bwe kirinzalinza, ggwe kirinde; kwo okujja kijja kujja, tekiirwe.

4Laba, atali wa mwoyo mutereevu aligwa, sso omutuukirivu aliba mulamu olw'okukkiriza kwe.”

5Mazima, omwenge gwa nkwe; omwekuza atiiratiira buli kaseera. Oyo mu mululu mugazi ng'amagombe; tamatira ng'olumbe, yeekuŋŋaanyiza amawanga gonna, yeewundulira abantu bonna.

6Bonna bano tebaasituke, ne bamukiina nga bayisa engero nti: “Zimusanze atuuma ebitali bibye, ne yeegaggawaza ng'atwala emisingo!” Kino anaakikola kutuusa wa?

7Abakubanja tebaasituke nno mangu, tebaazuukuke ne bakukuba entengero? Olwo ojja kufuuka munyago gwabwe.

8Kubanga wanyagulula amawanga nkumu, n'abantu bonna abasigaddewo balikunyagulula; kubanga wayiwa omusaayi gw'abantu, n'okola obulabe ku nsi n'ebibuga na bonna ababisulamu.

9Zimusanze atuumira ennyumba ye obugagga obulyakule, awanike waggulu ekisu kye, yeewonye okutuukibwako akabenje.

10Wateesa ebiswaza ennyumba yo, bwe watta abantu abangi, n'ossa obulamu bwo mu kabi.

11Kubanga n'amayinja galiyima ku kisenge ne galeekaana, n'emikiikiro giriyima mu musekese ne gyanukula.

12Zimusanze azimbira ekibuga ku kuyiwa omusaayi, n'akuba ekibuga ng'ayita mu kukola obubi.

13Laba, ekyo tekivudde wa Mukama w'Amagye, nti abantu kye beekooyeza si kirala wabula muliro, nti n'amawanga gateganira bwereere?

14Kubanga ensi egenda kujjula okumanya ekitiibwa kya Katonda, ng'amazzi bwe gajjuza ennyanja.

15Zimusanze oyo awa mikwano gye ekyokunywa, n'abafukiramu obusungu bwe okutuusa nga batamidde, alyoke atunuulire obwereere bwabwe.

16Mulijjula nsonyi sso si kitiibwa. Kati naawe nywa otagale! Ekikompe mu ddyo w'Omukama kijja kukutuukako, olwo ensonyi ziribikka ekitiibwa kyo.

17Kubanga obukambwe bw'olaze Lebanoni bulikubuutikira, n'okuzikirira kw'ebisolo kulikutiisa. Kubanga oyiye omusaayi gw'abantu, okoze n'obulabe ku nsi n'ebibuga na bonna ababisulamu.

18Ekifaananyi ekyole kigasa ki ng'omukozi waakyo akikoze, oba ekifaananyi ekisaanuuse eri omuyigisa w'obulimba? Lwaki akikola asuubirira mu ky'akoze, lwaki akola ebifaananyi bya balubaale ebitayinza kwogera?

19Zimusanze oyo agamba ekiti nti: “Zuukuka!” n'ejjinja likasiru nti: “Vva mu tulo.” Lisobola okuyigiriza? Liiryo likwatiridde zaabu ne ffeeza, naye mu lyo temuli mukka gwa bulamu.

20Ye Omukama ali mu Kiggwa kye ekitukuvu; ensi yonna esiriikirire mu maaso ge.

← Chapter 1 Jump to: Chapter 3 →