Joel 1

Luganda (BIBU1) (BIBULIYA ENTUKUVU)

Jump to: Chapter 2 →

1Ekigambo ky'Omukama ekyajja eri Yoweli mutabani wa Petuweli.

2Abakadde, muwulire kino, nammwe mwenna abasula mu nsi mutege amatu; ekiri nga kino kyali kiguddewo mu budde bwammwe, oba mu bbanga lya bajjajjammwe?

3Mukinyumize abaana bammwe, n'abaana bammwe bakinyumize abaana baabwe, ate n'abaana baabwe bakinyumize ezzadde eririddirira.

4Akaacaaka kye kaalekawo enzige enkulu yakyirya, enzige enkulu kye yalekawo lusejjera yakirya, ne lusejjera kye yalekawo ejjanzi ly'akirya.

5Abatamiivu, muzuukuke, mukaabe; mukube ebiwoobe mwenna abanywi b'omwenge, olw'evviini ensu, anti bagibaggye mu kamwa.

6Anti eggwanga lizinze ensi yange, ery'amaanyi, eritabalika, lirina amannyo ng'ag'empologoma, amagego gaalyo ga mpologoma nkazi.

7Ennimiro yange ey'emizabbibu ligifudde matongo, n'emiti gyange egy'emikunyu ligiwawaagudde. Lisusumbuddeko ekikuta ne likisuula eri, amatabi ne ligaleka nga meeru.

8Kaaba ng'omuwala embeerera eyeesibye ekikutiya, akaabira musajja we gwe yafumbirwa mu buto.

9Ebitone by'obuwunga n'eby'okuyiwa bikutuddwako mu Kiggwa ky'Omukama; bakabona abaweereza b'Omukama bakaaba.

10Ennimiro zisigadde matongo; ettaka likaaba kubanga eŋŋano ezikiridde, evviini ensu tekyali, n'omuzigo gukeeye.

11Abalimi muwuniikirire; abakozi mu mizabbibu mukube ebiwoobe; mukaabire eŋŋano ne sayiri; kubanga amakungula mu nnimiro gazikiridde.

12Emizabbibu gikaze n'oliva ziwotose; enkomamawanga, enkindu n'amapeera; emiti gyonna mu nnimiro gikaze, ddala essanyu likomye mu baana b'abantu.

13Mwesibe ebikutiya, mukaabe, mmwe bakabona; mukube ebiwoobe, mmwe abaweereza ku mwaliiro. Muyingire, musule mu bikutiya, mmwe abaweereza ba Katonda wange, kubanga ebitone eby'obuwunga n'ebitone eby'okuyiwa bikomezeddwa mu Kiggwa kya Katonda wammwe.

14Mulangirire ekisiibo ekitukuvu, muyite olukuŋŋaana olw'ekitiibwa, mukunge abakadde, na bonna abasula mu nsi, mubakuŋŋaanyize mu nnyumba y'Omukama, mulaajanire Omukama.

15Kitalo eky'olunaku olwo! Kubanga olunaku lw'Omukama luli kumpi; lulijja ng'okuzikirira okuva eri Ow'obuyinza.

16Emmere tetuggyiddwa mu maaso, n'essanyu n'okujaguza okuva mu nnyumba ya Katonda waffe?

17Entontogolo z'emikunyu ziwotokedde mu mafunfugu, amawanika gaayabizibwa, ebyagi ne bimenyebwawo, kubanga eŋŋano eweddewo.

18Ensolo nga zikaaba! Amagana g'ente gatangatanga kubanga tegakyalina malundiro, n'amagana g'endiga gabonaabona.

19Ayi Mukama, ggwe nkubira omulanga, kubanga omuliro gulidde amalundiro mu lukoola, n'oluyiira ne lwokya emiti gyonna mu ttale.

20N'ebisolo eby'ettale birookeeralookera ggwe, kubanga emyala gy'amazzi gikalidde, n'omuliro gumazeewo amalundiro mu lukoola.

Jump to: Chapter 2 →