Nahum 1

Luganda (BIBU1) (BIBULIYA ENTUKUVU)

Jump to: Chapter 2 →

1Obubaka ku Nineve. Ekitabo ky'okulabikirwa kwa Nakumu ow'e Elukosi.

2Omukama Katonda wa buggya, awoolera eggwanga; Omukama awoolera eggwanga, wa busungu; Omukama awoolera eggwanga ku bamukyawa, asibira obusungu abalabe be.

3Omukama tasunguwala mangu, wa buyinza bungi; Omukama talireka mubi nga tabonerezeddwa. Ekkubo lye liri mu kibuyaga ne mu kikunta, ebire ye nfuufu y'ebigere bye.

4Aboggolera ennyanja n'agikaliza, n'emigga gyonna agikaza. Basani ne Karumeli biyongobedde, n'ebimuli bya Lebanoni biwotose.

5Ensozi ziyuuguuma w'ali, n'obusozi buseebengerera; enkulungo y'ensi ekankana mu maaso ge, ensi na bonna abagisulamu.

6Ani aligumira obuswandi bwe, alyaŋŋanga obusungu bwe obwesera? Obusungu bwe buyiiyiddwa ng'omuliro; enjazi zisesegguka mu maaso ge.

7Omukama mulungi, obuddukiro ku lunaku olw'akabi; afaayo ku abo abasuubira mu ye.

8N'omujjuzi ogwaladde alisaanyaawo ababi, aliwondera abalabe be okubatuusiza ddala mu nzikiza.

9Nkwe ki ze musalira Omukama? Ajja kutuusa ku nkomerero. Ennaku teesituke buto.

10Balyegombeza mu maggwa, ng'abatamiivu abatamidde omwenge gwabwe, balisenkenyezebwa ne baggwaawo ng'essubi ekkalu.

11Mu ggwe mwavaamu eyali asalira Omukama enkwe, eyali alowooleza Omukama akabi, eyali ateesa ebibi.

12Omukama Katonda kino ky'agamba: “Ne bwe baliba ba maanyi era nga bangi, balikutulwako ne babulawo. Nakulabya ennaku, kyokka siriddamu kuzikulabya.

13Kale nno nzija kumenya ekikoligo kyabwe nkikwambule, n'enjegere zo nzikukutuleko.”

14Omukama awadde ku ggwe ekiragiro nti: “Toliba na zadde lya kusikira linnya lyo; nzija kuzikiriza ebifaananyi bya balubaale ebyole n'ebisaanuuse ebiri mu kiggwa kya lubaale wo; nzija kusima entaana yo, kubanga oweebuuse.”

Jump to: Chapter 2 →