Nahum 3

Luganda (BIBU1) (BIBULIYA ENTUKUVU)

← Chapter 2 Jump to:

1Zikusanze ggwe ekibuga eky'omusaayi, ekijjudde obulimba, ekijjudde obunyazi, eky'okwaya okutaliiko kkomo.

2Okwesooza kw'obuswanyu, okugolongotana kwa nnamuziga, embalaasi eziguluka n'okupaapiira kw'ebigaali.

3Abeebagazi abatala, ebitala ebimyamyansa, amafumu agatemagana! Obuvune bungi n'entuumu z'abafudde; emirambo okutali kkomo, bagenda beesittala ku mirambo!

4Byonna ebyo lwa bwenzi obuyitirivu obw'obwamalaaya, mulungi, asikiriza, naye ow'eddogo ekkambwe, eyazingako amawanga n'obwamalaaya bwe, n'ebika by'abantu n'eddogo lye.

5“Nkuli bukiika,” Omukama w'Amagye y'agamba, “ndisitulira emivuluya gyo ku maaso go, ndeke amawanga geerolere obwereere bwo, n'obwakabaka mbulage ensonyi zo.

6Nzija kukukasukira ebijama, nkuyise na bunyoomi, ofuuke eky'okwerolera.

7Buli alikulaba alikudduka, n'agamba nti: ‘Nineve azikiridde! Ani anaamukaabira? Mmunoonyeze wa anaamukubagiza?’ ”

8Ggwe mulungi okukira No-Amoni, atudde ku Kiyira, amazzi nga gamwebunguludde, bbugwe we nga ye nnyanja, n'amazzi nga kye kisenge kye?

9Kuusi ne Misiri be baali amaanyi ge, agataliiko kkomo; Puti ne Libya be bamu ku baali banywanyi be.

10Kyokka naye yagenda mu busibe, yatwalibwa mu buwaŋŋanguse. Amabujje ge baagaseseggulira mu buli masaŋŋanzira. Abakungu be baabakubako akalulu, n'abaami be bonna baasibibwa ku mpingu.

11Naawe nno ojja kutamiira; olyekweka, olinoonya obwewogomo okudduka omulabe.

12Ebigo byo byonna biri nga mikunyu, okuli ebibala ebisooka okutuuka, oluginyeenyaako ne bigwa mu kamwa k'abirya.

13Tunuulira eggye lyo, bonna bakazi! Emiryango gy'ensi yo gyonna miggulire abalabe bo; omuliro gusenkenyezza emiyingo gyayo.

14Weekimire amazzi olw'okuzindibwa, nyweza ebigo byo; kkirira mu ttosi, samba ebbumba, kwata akatiba.

15Eyo omuliro gulikusenkenyezaayo, ekitala kirikutemerayo, kirikuvunjaga ng'enzige. Yala ng'enzige! Yala ng'enseenene!

16Wayongera obungi bwa b'osuubulagana nabo n'obasinza n'emmunyeenye ez'eggulu. Enzige zanjuluza ebiwaawaatiro byazo ne zibuuka.

17Abakuumi bo bali ng'enseenene, abakungu bo bali ng'ebikuukuulu by'enzige, ezigwa ku lukomera ku lunaku olunnyogovu, enjuba bw'evaayo, ne zibuuka; tewali amanyi gye ziraga.

18Kabaka wa Assuri, abasumba bo beebase, abaami bo bagandadde. Abantu bo babunye emiwabo ku nsozi, tewali abakuŋŋaanya.

19Obuvune bwo tebuliiko kuddirira, ekiwundu kyo kya maanyi. Buli awulira ebikufaako, akuba mu ngalo ku ggwe; ggwe ate ani atatuukibwangako bukambwe bwo obutaliiko kigero?

← Chapter 2 Jump to: