Nahum 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Ebigere biibyo ku nsozi eby'oyo alangirira amawulire ag'essanyu, alangirira eddembe. Yuda, kuza embaga zo enkulu, bye weetema bituukirize, kubanga ababi tebaliddayo kukulumba, baasaanyiziddwawo ddala.

2Anaakuseseggula wuuyo ajja okulumba; kuuma ekigo, weekalirize ekkubo, weesibe onywere, weekembe n'amaanyi gonna.

3Omukama ajja kuzzaawo ettendo lya Yakobo libeere ng'erya Yisirayeli, newandibadde ng'abanyazi baabinyagulula, ne boonoona n'emizabbibu gyabwe.

4Engabo z'abazira be mmyufu, abatabaazi beekapise mu kasaayi. Ebyuma ku bigaali bye bimyamyansa; ku lunaku lwe bitegekerwa olutalo, n'abeebagazi beetala.

5Mu nguudo ebigaali biyirimuka, bidduka bidda eno bidda eri mu makubo; bifaanana ng'ebitawuliro by'omuliro, biyitiŋŋana ng'ebimyanso.

6Ayitayo abagabe be, basirittuka nga bagenda; bafubutuka balaga eri bbugwe; manvuuli ey'okubasiikiriza n'essibwawo.

7Emiryango gy'emigga gigguddwa; olubiri lutekemuse.

8Eyassibwawo ayambuddwa, atwaliddwa; abazaana be basindogoma ng'amayiba, beekuba mu bifuba.

9Nineve ali ng'ekidiba ky'amazzi, amazzi gaakyo gakulukuta gagenda; “Muyimirire! Muyimirire!” Naye teri akomawo.

10Munyage zaabu, munyage ffeeza; obugagga tebuliiko kkomo, eby'obugagga okuva mu mawanika ge gonna.

11Kirekeddwa matongo, kyayiddwa, kizikiriziddwa! Omutima gutekemuse; entegetege zifambye; ebyenda bikankana; amaaso gonna gabapeeruuse.

12Enfo y'empologoma eri ludda wa, n'empuku y'ebyana by'empologoma, ensajja n'enkazi n'ebyana byazo gye ziraga awatali azikangako?

13Empologoma yakwata ebinaamala obwana bwayo, n'etugira ne ginnaayo enkazi, n'ejjuza empuku yaazo n'omuyiggo, n'enfo yaazo n'ebitaaguju.

14“Nkuli bukiika,” y'agamba Omukama w'Amagye, “ebigaali byo nzija kubyokya bittunke omuliro; n'ekitala kijja kukavvula obuwologoma bwo. Nzija kukusalako omuyiggo gwo ku nsi; eddoboozi ly'ababaka bo terikyaddayo kuwulirwa.”

← Chapter 1 Jump to: Chapter 3 →