Titus 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Ggwe nno yigiriza ebyo ebituukana n'enjigiriza ennamu.

2Kubirizanga abasajja abakulu babe bantu abamanyi okwefuga, ab'ekitiibwa, abantubalamu, abalamu mu kukkiriza, mu kwagala ne mu bugumiikiriza.

3Era bw'otyo ne ku bakazi abakulu, babe ba kitiibwa mu neeyisa yaabwe, abatasala bigambo, nga si bafugwa mwenge, wabula abayigiriza ekirungi;

4olwo basobole okuyigiriza abakazi abakyali abato okwagala babbaabwe n'okwagala abaana baabwe;

5babe abantubalamu, abatukuvu, abakozi b'emirimu awaka, ab'ekisa, abagondera babbaabwe, ekigambo kya Katonda kireme kwogerwako bubi.

6Era bw'otyo bw'oba okubiriza n'abasajja abakyali abato okumanya okwefuga.

7Mu byonna beera ekyokulabirako eky'ebikolwa ebirungi. Ng'oyigiriza beera ow'ebirowoozo ebiruŋŋamu era ebigumu,

8ow'ebigambo ebiramu ebitasobola kuvunaanibwa; olwo abo abakuwakanya baswale olw'obutaba na kibi kye bayinza kutwogerako.

9Abaddu bakubirize okugonderanga bakama baabwe, nga bagezaako okubasanyusa mu buli kintu, nga tebabaanukula,

10abateetoolatoola, wabula balage obwesigwa obulungi obwa namaddala, balyoke mu buli ngeri baweese enjigiriza ya Katonda Mulokozi waffe ekifaananyi ekirungi.

11Anti eneema ya Katonda yalabika ereetere abantu bonna okulokoka.

12Etuyigiriza okwegaana buli kikaafiiri n'amaddu g'ensi, tubeere abamanyi okwefuga, ab'empisa, abatuukirivu era abasomi mu nsi eno,

13nga bwe tulinda essuubi ery'omukisa n'okulabika kwa Katonda waffe omukulu era Omulokozi Kristu Yezu,

14eyeewaayo olw'okubeera ffe alyoke atununule mu buli bubi bwonna, ate yeetukulize abantu ababe ku bubwe, abatakabanira okukola ekirungi.

15Bino nno by'oba oyogera; kubiriza, komako n'obuyinza bwonna. Wabulewo n'omu akunyooma.

← Chapter 1 Jump to: Chapter 3 →