Titus 3

Luganda (BIBU1) (BIBULIYA ENTUKUVU)

← Chapter 2 Jump to:

1Bajjukize okugondera abaami n'abali mu buyinza, okuba abawulize, abeetegefu okukola buli kirungi,

2nga tebawaayiriza, tebayombayomba, bateefu, ab'eggonjebwa eri buli muntu.

3Olumu naffe twali basiru, nga tetuwulira, nga tuwubisiddwa, nga tufuuse baddu ba bika ebitali bimu ebya maddu n'amasanyu; mu bulamu bwaffe nga tuli ba kitimatima na buggya; nga tukyayiddwa ate naffe nga tukyawaganye;

4naye ekisa n'okwagala kwa Katonda Mukama waffe bwe byalabika,

5n'atulokola, si lwa kubeera bikolwa byaffe bye twali tukoze eby'obutuukirivu, naye lwa kubeera kisa kye, ng'ayita mu kunaazibwa okw'okuzaalibwa ogwokubiri n'okuzzibwa obuggya mu Mwoyo Mutuukirivu,

6gwe yatuyiira mu bungi ng'ayita mu Yezu Kristu Mulokozi waffe;

7eneema ye ng'emaze okutufuula abatuukirivu, tulyoke tufuuke basika abalina essuubi ery'obulamu obutaggwaawo.

8Ekyogerwa kino kya mazima. Njagala bino obikkaatirize, abo abakkirizza Katonda bafeeyo ku kukola ebikolwa ebirungi; ebintu ebyo birungi era biyamba abantu.

9Naye weewale endasano ez'ekisiru, n'okunonooza endyo, okuyomba n'okukaayana ku Tteeka, kubanga bino tebiganyula era temuli kantu.

10Omuntu aleeta enjawukana ng'omaze okumulabula ogusooka n'ogwokubiri, mulekere ddala.

11Manya nti ow'engeri eyo mukyamu era mwonoonyi, yeesalidde yekka omusango.

12Nga mmaze okukusindikira Aritema oba Tukiko, sala gonna onsisinkane e Nikopoli, kubanga nsazeewo obudde obw'obutiti okubumala eyo.

13Fuba nnyo okuyamba Zena munnamateeka ne Apollo mu lugendo lwabwe, era laba nga tebajula kantu.

14Abantu baffe balina okuyiga okukola emirimo emirungi, basobole okudduukirira mu bwetaavu obwa mangu, baleme kubeera ntagasa.

15Bonna be ndi nabo eno bakutumidde. Ndabira abo abatwagala mu kukkiriza. Eneema ebeere nammwe mwenna.

← Chapter 2 Jump to: