Zephaniah 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Mwekuŋŋaanye, mwekuŋŋaanye, mmwe eggwanga eritaswala,

2nga temunnagoberwa eri ng'ebisusunku ebikuŋŋunsibwa, ng'obusungu bw'Omukama obwesera tebunnabajjira, ng'olunaku lw'obusungu bw'Omukama terunnabajjira.

3Mwenna abateefu ab'omu nsi, munoonye Omukama, mmwe abakola ky'alagira. Munoonye obutuukirivu, munoonye obwetoowaze; oboolyawo mulifuna we mwewogoma ku lunaku lw'obusungu bw'Omukama.

4Kubanga Gaza alyabulirwa, ne Asukeloni kirirekebwa ttayo; Asudodi balimuleka mukalu mu ttuntu; Ekuroni kirisimbulwawo.

5Zibasanze mmwe abasula ku lubalama lw'ennyanja, mmwe eggwanga ly'Abakereti! Ekigambo ky'Omukama kiri ku mmwe, mmwe Kanaani ensi y'Abafilisitiini nti: “Nzija kukuzikiriza okutuusa nga tewasigadde akusulamu.”

6Ggwe olubalama lw'ennyanja, olifuuka malundiro, bisaawe bya balunzi na bisibo bya ndiga.

7Olubalama lulifuuka lwa baasigalawo mu nnyumba ya Yuda; eyo gye balisanga amalundiro. Akawungeezi baligalamiranga mu nnyumba z'omu Asukeloni; Omukama Katonda waabwe agenda kubalabirira; alikomyawo abasibe baabwe.

8“Nawulira okujolonga kwa Mowabu, n'okuvuma kw'Abammoni, abaavuma abantu bange ne beewaanira ku nsi yaabwe.

9Kale nno, mazima nze nga ndi mulamu,” Omukama w'Amagye, Katonda wa Yisirayeli, y'agamba: “Mowabu aliba nga Sodoma, n'Abammoni nga Gomorra; ensi ey'omwennyango n'entuumu z'omusenyu, ey'eddungu emirembe gyonna. Abaasigalawo mu bantu bange baliginyagulula; abaasigalira mu bantu bange balibezza.

10Ekyo kye kiribatuukirira olw'okwekuza kwabwe, kubanga baavuma n'okwewaanira ku bantu b'Omukama w'Amagye.

11Omukama alibabeerera ntiisa, kubanga alitoowaza balubaale bonna ab'ensi; balimusinza buli omu mu kifo kye, byonna ebizinga by'amawanga.

12“Nammwe Abakuusi, mulittibwa n'ekitala kyange.”

13Aligololera omukono gwe ku mambuka n'azikiriza Assuri; Nineve alikireka matongo, nga kikalu ng'eddungu.

14Amagana galigalamira omwo mu kyo, na buli kisolo kyonna; ekiwuugulu eky'amatu ne nnamunnungu birisulanga ku mpagi zaakyo, ekiwuugulu kiriwulugumiranga mu ddirisa, ne nnamuŋŋoona alikaabiranga mu mulyango, kubanga enzizi z'entolookyo ziribikkulibwa.

15Ky'ekyo ekibuga eky'amasanyu, ekyetuuliranga entende, ekyerowoozangako nti: “Nze ndiwo, era teri mulala.” Laba bwe kifuuse amatongo, enfo y'ebisolo! Buli ayitawo afuuwa kiwa, n'akuba mu ngalo.

← Chapter 1 Jump to: Chapter 3 →