1 Peter 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Petero, ’ba Yesu Kristoni ti peleri, ’Ba yi erepi ani’baru angu Pontoari pi ma alia ’diyi vu, Galatia pie, Kapadokia pie, Asia pie, Bitunia pie,

2yi ’ba opezaru Mungu Atani nile drio, Orindini ’bale alatararu, yini e’yo erizu, Yesu Kristoni i ma ari oyazu ani yi ma dria ’diyi: ’Yeta anzutiri pi ma ga tre emi vu asi anzuru be.

3Ru Mungu Opi amani Yesu Kristo ma Atani ma ovu inzizaru, erini ama tile dika yiki ini amborusi, amani e’yo teza idriniri isuzu engata Yesu Kristoni ’ba draza ma eseliarisi,

4amani vini awuruso dri japi ku, ondi kokoru, onyupi ku, tani mbazaru ’bua emi driri tezu.

5A’ita eminisi okpo Munguniri emi agei te, emini ani pata ovupi ngonde i ecezu ewu asizuriari isuzu.

6E’yo nde ’dirisi, e’yo ka le eca ewaru, emi ka tro candi isu obeta ndu ndusi ewu were curu’dorisi ti, te emi ovu ayikosi ambo,

7a’ita emini ovupi o’bizaru ’bo, ovupi aje be amboru mele o’bile acisi raka te i ezapi ndori agapi rari ma e’da i afa inzitaru, dizaru, ru iduzaru, o’du Yesu Kristoni i ecezurisi.

8Te emi eri le avasi ra, ’de ndra emi ndreni eri ku; azini emi ka tro eri ndre curu’do ku ti, emi a’i eri ra, emi ovu ani ayikosi erisi ayiko amboru ’bani ecole e’yoni ’yole tisi ku dizaru turi be,

9emini de e’yo asiza a’ita eminirini biria, ’di pata orindi emini pazuri’i.

10Nabi ’yeta anzutiri ngapi ecapi emi vuri ma e’yo ondripi drio ’diyi ozi ndra pata ’diri ma e’yo tu, etini ndruzu;

11yi ndru kani Orindi Kristoni ovupi yi ma alia candi Kristoni pi ma e’yo eti nzepi oko, diza ecapi vutiniari pieri ece e’yo ’diri a’di ma e’yosi ya, kani ewu ngorisi yani.

12Eri ovu ecezaru yi dri kini yi koni ndra yi ma ngulupi ma aza e’yo nde ’diyisi ku, te yi ko emi ma aza; ’ba e’yo bari olupi emi dri Orindi Alatararu ti epele ’buarisi ’diyi olu e’yo ’diyi emi dri curu’do ’bo; malaika le e’yo ’diyi lu avasi.

13E’yo ’dirisi emi ma ombe asisile emini kirikiri, emi ma ovu mile be emi agei tezu, emi ma ’ba emi asi ’yeta anzutiri Munguni ngapi ecapi emi vu o’du Yesu Kristoni i ecezurisiri ma dria, asi tezasi dria.

14Emi ma ovu ekile anzi e’yo eripi ’diyile, emi ma ede emi e’dazu ekile ndra oko emini ’yele lisi aniako eminisirile ku,

15te ekile ’ba emi omvepirini ovule alatararurile, emi ma ovu alatararu indi adriza emini ma alia dria;

16erini ovule sizarurisi kini, Emi ma ovu alatararu mani ovule alatararunsi.

17Te emi ka ’ba ’ba opepi ku te ’ba alu alu ma e’yo lipi azi erini vusiri omve Ataru, emi ma ovu urisi ewu emini ovuzu ani’boru ’doarisi,

18emini niria kini yi onzeni ndra emi adriza toko emi a’bipini imbaleri ma aliasi afa yi ezapi ra kani dahabuni, kani meleni ’diyisi ku,

19te ari aje be amboru Kristonirisi, ekile kabilomva ezata kokoru azini nyebile kokoruri ma arisirile.

20Ni ndra eri drio, de nga nyaku eti ’bani i ku, te ece eri ewu vile asizu ’dorisi, emi ma e’yosi.

21Erisi emi ovu a’itasi Mungu eri engapi ’ba draza eselia diza fepi eri driri vu, a’ita emini pi asi, ’baza emini be ma ovu ani Mungu vu.

22’Dinile emini orindi emini ’baria alatararu ’bo, emini e’yo adaruri erilerisi ovuzu ani adripi vu ale lokiri kokorurisi, emi ma le emi emi eselia avasi asi driasi.

23Emi ovu, osizaru o’diru ’bo, ori ecopi mazaru- risi ku te ori ecopi mazaru kurisi, ’di e’yo Munguni ovupi idriru, adripi ’dani ’daniri’i.

24Te ’Ba rua ari beri dria ovu asele azini rua ndriza erini dria ovu ase fule. Ase onyu ra, te funi lu ra,

25te e’yo ’yoza Opiniri nga ovu ’dani ’dani. Te e’yo ’yoza ’diri eri e’yo bari ’bani olule emi tia ’bori’i.

Jump to: Chapter 2 →