1 Peter 5

Lugbara (E’yo Siza Alatararu Munguniri BIBLIA)

← Chapter 4 Jump to:

1Ma matu ’ba ’ba atalauru emi eselia ’diyi vu, ma’i atalauni indi, ma ’ba ecandiza Kristoni ma e’yo eti nzepi, azini ’ba ti ecipi diza ngapi i e’dapiri ma aliari’i.

2Emi ma oce kabilo Munguni ovupi emi eselia ’diyi, yi ma e’yo nezu, ’bani emi omilerisi ku te emi asini lelerisi, Munguni lelerile; yi ocezu silingisi ku te asi avarusi;

3emi ma ovu lopiru ’ba fele emi dri ’diyi ma drilia Ku, te emi ma ovu ecetaru kabilo nde I’diyi ma milia,

4’Dini, ’Ba kabilo ocepi agapi rari ka nga e’da ra, emi nga ekilaza dizani onyupi kuri isu ra.

5’Dinile, emi karileru ’diyi, emi ma inzi ’ba atalauru ’diyi. Emi dria ma Isu asi e’yere, ovuzu ani emi eselia asi lafu kokorusi, a’disiku Munguni ’ba asi afu be ’diyi ma dri aru, te eri ’yeta anzutiri fe ’ba asi afu kokoru ’diyi dri.

6Emi ma ovu ani asi afu kokoruri be dri okporu Munguniri ma etia, eri ma ’ba ani emi uru ewunirini ecaria.

7Emi ma ku e’yo asi otiza fepi emi dri ’diyi dria eri ma dria, a’disiku eri ma asini e’yo emini egale amborurisi.

8Emi ma ovu asisile e’yere be, emi ma ovu mile be. Ari’bo emini ’ba asu supiri eri ad kamile, awu be ’ba ndazu nyazu.

9Te emi ma oga eri, emi ma so pa kirikiri a’ita emini ma alia, a’disiku emi ni ra candi eminile trotro ’diyi adri emi adripi wudriku rua ’diyi ecandi indi.

10Emi ka ovu ecandizaru were ’bo, Mungu ’yeta anzutiri driani, emi omvepi fizu diza erini ’dani ’dani Kristo ma aliari vuri ma ngulupini nga emi ede fudri ci, fezu emini pa sozu kirikiri, emi ’bazu okporu.

11Okpo opiru ma ovu eri vu ’dani ’dani. Amena.

12Ma ega Silivano ovu adripi asi adaru beri; ma si ani waraga were emi dri eri ma dria, matu ’bazu, e’yo,eti nzezu kini ’diri ’yeta anzutiri Munguni adaruri’i; emi ma so pa eri ma alia kirikiri.

13’Ba ovupi Babulonia ovupi pezaru emi be tualu ’diyi zi emi ci ci; ma mvi Marako zi emi ci ci indi.

14Emi zi emi emi eselia o’dezu leta avasirisi. Asi anzuru ma ovu emi ovupi Kristo ma alia ’diyi be dria.

← Chapter 4 Jump to: