1 Peter 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Kristoni candi isule ruasirile, emi ede emi asisile ’dinileri be, ekile ’bani yi edele afa ombani berile, a’disiku ’ba candi isupi ruasi ’bori eri ku e’yo onzi ’bo;

2emi ma fe ewu acepi emini ovuria rua ma aliari ma joloko li ’bani ’yezu ku, te e’yo Munguni leleri ’yezu.

3A’disiku ewu ndra agapi ’bori fu dri ama dri ’bo e’yo ’ba jururu ’diyini leleri ’yezu: acizu e’yo saaru ’yezu, li ruani pie, ewa mvuzuri pie, ongo tuzuri pie, atizu ewasiri pie, wura toko toko inzizu azitani lele kuri pie.

4E’yo ’dirisi ’ba yi osu tu emini nzule yi be tualu e’yo ’yele saaru onzikanyaru aga driari ’yezu kurisi, yi o’da ani emi onzi;

5te yi nga e’yo yini ola ’ba ovupi edezaru ngonde ’ba idriru ’diyi pi ma e’yo lizu ’ba drazaru ’diyi beri ma drilia.

6E’yo ’disi yi olu ndra e’yo bari ’ba E odrapi ’bo ’diyi vu, e’yo yini ma ovu lizaru ekile ’ba ovupi rua ma alia, ’diyile, te yi ma ovu ani idriru ekile Munguni ovule idrirurile, orindi mal alia.

7Te e’yo dria ma asiza eri ovu ogogo; emi ma ovu ani asi e’yere be azini emi ma te emi agei mile be: Mungu zizu.

8Te aga dria, leta emini emi lezu emi eseliari ma ovu avaru ’dani, te leta eri azi onzi karakarau a’bu ra.

9Emi ma a’i emi wa’diru emi eselia letasi, onoza kokoru.

10Ekile ’ba dria alu aluni afa feza a’ilerile, emi ma ko ani emi aza emi eselia, ekile ’ba ’yeta anzutiri Munguni ndu ndu ’diyi ma agei tepi onyiru’diyile:

11’ba azini ka e’yo olu ra, eri ma olu ekile Munguni e’yo ’yoza felerile; ’ba azini ka ’ba ma aza ko, eri ma ’ye ekile Munguni okponi felerile; ’dinile ru Munguni ma ovu dizaru Yesu Kristosi e’yo dria ma alia. Diza ma ovu eri vu okpo opiniri be ’dani ’dani. Amena.

12’Ba mani le1e ’diyi, emi ma osu o’bita ecapi aciru emi eselia emi o’bizurisi ku, ekile e’yo azini ndu ’ye i emi vuni.

13Te emi ma ovu ayikosi emini ti ecile Kristo be candi erini ma aliarisi, ka’dinile indi diza erini ka nga i e’da ra emi ma ovu ani ayiko amboru agapi turi be.

14Yi ka drinza fe emi dri ru Kristonisi, emi ovu drilebaru, a’disiku Orindi dizani azini Mungunirini rile emi driarisi.

15Te emi eselia ’ba aluni ma isu candi erini ’ba ’dilerisi ku, kani erini afa ogulerisi ku, kani erini e’yo onzi ’yelerisi ku, kani erini file e’yo ’ba azinini ma alia aka apadrirusi ku;

16te ’ba azini ka candi isu erini ovule ’ba Kristonirisi, eri ma ovu drinzasi ku, te eri ma inzi Munguni ru ’diri ma e’yosi.

17Te ewu e’dozu e’yo lizu jo Munguni ma aliari eca ’bo; te e’yo liza ka e’do amasi oko, ’ba e’yo baru Munguniri a’ipi ku ’diyi ma e’yoni nga asi ngoni ya?

18Te ’Ba kililiru ka i pa ewaru, ka’dini ’ba Mungu inzipi ku, e’yo ’yepiri nga i e’da ngoa

19Awa’dini, ’ba candi isupi ekile Munguni lelerile ’diyi ma fe orindi yini ta mbazu ’Ba ’ba ’Bapi asi adaru beri vu, yi ma ’ye ani e’yo onyiru ’dani.

← Chapter 3 Jump to: Chapter 5 →