1 Timothy 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo, ’ba Kristo Yesuni ti pele Mungu ama Papiri pi ma azita ma e’yosi Kristo Yesu asi teza amaniri beri,

2Timoteo, mva mani adaru a’ita ma aliari vu: ’Yeta anzutiri pi, yiki pie, asi anzuru pie, engazu Mungu Ata vu azini Kristo Yesu Opi amaniri vu.

3Mani ndra muria Makedoniaaria, ekile mani azile mi dri ovuzu Efesoa ’danirile, mi ma azi ani ’ba azini ma tia yi ma imba imbata nduni ku,

4yi ma ’ba asisile e’yo oluza o’dukole toko toko ’diyi ma dria, a’bianzi ma ru olazu dekokoru ’dini ku; e’yo ’dinile ’diyi fe ’bani agata gazu, aga e’yo Munguni ma ta mbazu a’itasiri ra; curu’do ma e’yo azi ’dinile indi.

5Te azita nde ma kalati asizuri eri leta efupi asi alaruri pi, ma alia, asisile onyiruri pie, a’ita lokiri kokoruri pieri’i.

6Te ’ba azini yini yi oja aria kalaa e’yo ’diyi kuzu, yi oja yi e’yo toko toko ’diyi o’yozu;

7yi ka tro e ovuzu ’ba azita imbapi ’diyiru ti, yi vani e’vo yini ’yoleri ku, nini vini e’yo yini olule okposiri ku indi.

8Te ama ni azita ovu onyiru, ’ba ka ’ye erisi ekile azita ndeni lelerile,

9emini e’yo runa ’dini kini azita ovuni azizaru ’ba kililiru ’diyi ma e’yosi ku, te ’ba azita kokoru ’diyi pi ma e’yosi, ’ba saaru ’diyi pie, ’ba Mungu gapi si ’diyi pie, ’ba e’yo ezapi ’diyi pie, ’ba alatara kokoru ’diyi pie, ’ba Mungu ma ru o’dapi ’diyi pie, ’ba yi atini ’dipi ’diyi pie, ’ba yi andrini ’dipi ’diyi pie, ’ba ’ba ’dipi ’diyi pie,

10’ba ali o’bapi ’diyi pie, agupi ali o’bapi agupi agyisi ’diyi pie, ’ba ’ba obipi jipi ati’baru ’diyi pie, ’ba inzo lipi ’diyi pie, ’ba oyo sopi inzosi ’diyi pie, kani ’ba e’yo azini-ka ngoni ti ’--imbata adaruni ogale siri ’yepi ’diyi pie dria;

11ekile e’yo baru diza be Mungu inzizarurini, ovupi fezaru ma dri tani mbazurile.

12Ma awa’difo fe ’ba okpo fepi ma driri dri, ’di Kristo Yesu Opi amaniri’i, erini ndra ma a’ile ovuni adam, erini ma ’bale azi ini ma aza kozurisi,

13ma ka ndra ovu okorisi ’ba Mungu ma ru o’dapiri, azini ’ba ’ba Inzapiri, azini ’ba ’ba ’yepi eganasiri ti; ma isu yiki mani eri ’yele aniakosi azini a’itaakosirisi,

14te ’yeta anzutiri Opi amanini aga tu a’ita be azini leta avasi ovupi Kristo Yesu ma aliari be.

15E’yo ’yoza ’diri eri adaru, azini eri fu dri ’ba driani a’izu asi alusi, kini Kristo Yesu emu nyakua ’ba ezapi ’diyi opazu. Te ’ba ezapi ’diyi ma eselia ’ba ezapi agapi turi ma’i;

16te e’yo mani yiki isuzu rari ’di, Yesu Kristo ma ece ani asi teza ini dria ma alia oko, eceta fezu ’ba ngapi eri a’ipi kpere idri ’dani ’daniri vu ’diyi dri beni.

17Te inzita pi diza be ma ovu Opi ovupi ’dani ’dani, ecopi drapi ku, ’bani ndrele ku, Mungu aluni vu ’dani ewule ewule. Amena.

18Ma fe azita ’diri ku mi dri, mva: mani Timoteo, ekile e’yo ondriza yini ondrile mi ma e’yosi driorile, ’dini e’yo nde ’diyisi mi ma ’di ’adi onyiru ani beni,

19a’ita pi ta mbazu asisile onyiru be. Te ’ba azini, yini asisile ’diri ’bale yi vu rerisi, oguru yini a’itaniri ’de yia ra;

20Humenayo pi ovu ’ba ’diyi ma eselia Alegezanda be, ’ba mani fele kule Satani dri, yi ma ovu imbazaru yi kazu Mungu ma ru o’dazu ku ’diyi.

Jump to: Chapter 2 →