1 Timothy 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1E’yo ’yoza ’diri ovu adaru: ’Ba azini ka azi kanisa andrizuri ndru, eri ’ba i asi azi onyiru ma dria.

2E’yo ’dirisi ’ba ’ba andripiri ma ovu ’ba e’yoni ndele ku, ovupi oku be alu, asi e’yere be, asisile anzuru ’Ibe, ’ba acipi kililiru, omu a’ipi avasi wa’diru, ’ba ’ba imbapi onyiru,

3’ba atipi ewasi ku, ’ba ’ba copi Ikuri’i; te eri ma ovu ’ba e’yere, ’ba awapi mbele ku, ’ba ava ’bapi silingi ma dria kuri’i.

4Eri ma ce ’ba eri vile joa ’diyi dri onyiru, anzi erini ma eri e’yo erini inzita be e’yo driasi;

5te ’ba azini ka ni jo ini ma dri ecezu ku, eri nga kanisa Munguni agei te ngoni ngoni ya?

6Eri ma ovu ’ba fipi o’diruri ku, eri kazu ovuzu afusi erini ngazu ani e’dezu e’yo liza ’ba asu supirini ma alia ku;

7azini eri ma ovu ’ba ’ba ovupi amveleru ’diyini eri ma e’yo eti nzele onyiruri’i, eri kazu e’dezu o’data kani emba ’ba asu supirini ma alia ku.

8’Dinile ’ba azi ma aza kopi ’diyi ma ovu inzita be, ma ovu andre iri be ku, ’ba ewa mvupi tu ’diyi’i ku, ’ba orodri ndrupi geri onzisi ’diyi’i ku;

9’ba e’yo ziza vale ku a’itaniri ma ta mbapi asisile alaru be ’diyi.

10’Ba ma o’bi ’ba ’diyi oko raka te e’yo ka yi nde ku, yi ma fi azi ’ba aza kozuri ma alia ndo.

11’Dinile oku yini ma ovu inzita be, ma ovu asu be ku, mile be yi agei tezu e’yo driasi, asi adaru be e’yo driasi.

12’Ba azi ma aza kopi ’diyi ma ovu oku be ale, anzi yini pi ma dri ecezu onyiru ’ba aku yinia ’diyi be;

13te ’ba aza kopi azi ngapi onyiru ’bo ’diyi isu inzita onyiru yi ma ngulupi dri, azini asi teza amboru a’ita nde ovupi Kristo Yesu ma aliari ma alia.

14Ma e’yo ’diri si mi vu mani egaria ace were ma nga mu mi vu,

15te ma ka ma dri ici ’dani, mi ma ni ani geri ecopi onyiru ’bani ani ovuzu jo Munguni ma aliari beni, ’di kanisa Mungu idrirurini, pati idiaferu azini jo eti e’yo adaruniri’i.

16’Ba econi agata gazaru e’yo ’dirisi ku, e’yo zizaru vale ku adriza ’bani ani Mungu inzizuriniri ovu amboru ada: Eri e’da i rua ma alia, ece eri ’ba kililiru Orindisi, malaika ndre eri ra, olu e’yo erini suru ndu ndu ma eselia, a’i eri nyakua, ’du eri uru diza ma alia.

← Chapter 2 Jump to: Chapter 4 →