Colossians 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te ma le emi ma ni a’di mani ’dile emi ma e’yosi, ’ba Laodikiaa ’diyi pie, ’ba dria ma rua ndrepi milesi ku ’diyi pieri ovu amboru tu.

2Yi ma omi yi asi ani yini ovuria ecizaru tualu leta avasirisi, yi ma isu lonyi e’yo vaza asi adarusirini dria, yi ma ni ani e’yo vale ku zizaru Munguniri, ’di Kristo’i.

3Eri ma alia lonyi ondua pini nita be ’diyi dria ovu zizaru.

4Ma ’yo e’yo ’diri, ’ba aluni kazu emi icizu e’yo ’yole lokiriru ti aluzasirisi ku.

5Te ma ka tro ovu emi be ruasi ku ti, ma ovu emi be tualu orindisi, ovuzu ayikosi acita emini kililiruri pi ndrezu, pa soza kirikiri a’ita emini Kristoni a’izuri ma aliari be.

6E’yo ’disi ekile emini Kristo Yesu Opini a’ilerile, emi ma aci eri ma alia ’dinile,

7pa sozu kirikiri pati ola okporu berile, ovuzu eri ma alia jo sile okpo berile, ovuzu okporu a’ita nde ma alia, ekile yini emi imbalerile, ovuzu awa’difo be tre aga ra.

8Emi te emi agei ’ba azini kazu emi bizu ati’boru ondua ’banisi azini lokiri tokorurisi ku, imbata ’bani idrileri ma vuti bizu, azita nyakunile te e’yo Kristonile ku.

9A’disiku e’yo dria gapi Mungu ma alia tre erini ovuzu Mungururi oja i rua ’baniru, ovu dria Kristo ma alia;

10te eri ma alia emi ga tre e’yo ndesi ’bo indi, eri ovu opi nyaza pi ma driru okpo be dria.

11Te eri ma alia yi fe emi dri agele liza ’bani lile drisi kuri, eri agele liza Kristoni e’yo ruani truzuri’i;

12’dini yi sa emi tualu eri be baputizi ma alia, fe vini emini engazu eri ma alia tualu 3 eri be indi, emini Mungu eri engapi ’ba draza ma eseliari ma okpo a’ilerisi.

13Te emini de ovuria drazaru ezata eminisi azini rua agele lizaako eminisi, eri ’ba ndra emi idriro tualu eri be, te eri wu ezata amani dria;

14eri ini e’yo siza ama ogapi azita ndu ndusi ama dri arupiri, eri ’du eri geriasi ra, eri di eri pari alaza ma ruaa.

15Eri nde opi nyaza ’diyi pi teketeke, okpo azini ’diyi be, eri fe yi e’dazu mgboru, eri isu inzita amboru erini yi ndele pari alazasirisi.

16E’yo ’dirisi ’ba aluni ma li e’yo emini nyaka ma e’yosi ku, kani afa mvuzasi, kani o’du omunisi, kani mba o’dirusi, kani o’du sabatonisi dria ku indi.

17E’yo ’diyi yi e’yo ngapi ecapi ’diyi ma endrilendri; te rua nde eri Kristoniri’i.

18’Ba aluni ma eza geri emini afa feza orodriruri isuzuri inzosi ku, lezu emi ma ovu afu kokoru tu malaika inzizu’i, pa sozu eceta erini ndreleri ma alia, i ipizu afusi toko asisile drozu e’yo ruani ma driarisi,

19te yi ecini yi Dri be ku, de drini okpo fe rua dria drini, te ruani i eciria tualu falako pisi isu be, eri zo ani Munguni eri ezolenirisi.

20Ka’dini emi ka dra Kristo be azita nyakuni vu ’bo, emi ovu azita ma palaa ekile ’ba ovupi idriru e’yo nyakuni vu ’diyile a’disi ya?

21Kini, Mi bi ku, Mi ’bi ajini ku, Mi elo ruani ku

22(te afa ’diyi dria nga dri ja ra ’bani ’yeria yi be ’boria), yi e’yo azile azita ’bani vusi azini imbata ’bani vusi ’diyi.

23E’yo ’diyi ka tro yi e’da ekile onduale inzita ceniri pi ma e’yosi, asisile afu kokoruri Pie, e’yo ruani gazuri pie ada, te yi ovuni orodriru li ruani ogazu aluni ku.

← Chapter 1 Jump to: Chapter 3 →