Colossians 4

Lugbara (E’yo Siza Alatararu Munguniri BIBLIA)

← Chapter 3 Jump to:

1Emi ’ba opiru ati’ba ma drilia ’diyi, emi fe afa kililiru azini ’yeke ati’ba emini dri, emini nile emi indi ovu Opi be ’buarisi.

2Emi ma fe emi asi Mungu zizu ’dani, ovuzu mile be Mungu ziza nde ma alia awa’difo be;

3emi ma zi Mungu ama dri indi, eri ma zi otile e’yo oluzuri ama dri, ma ma olu ani e’yo vale ku zizaru Kristoni mani ovuzu ani ombezaru arujoari beni,

4ma ma e’da eri kilili, ekile erini ovule azizaru ma dri e’yo oluzurile.

5Emi aci onduasi ’ba ovupi amveleru ’diyi ma milia, emi fe etu ma aga emi dria pirini ku.

6E’yo ’yoza emini ma ovu etuzu ’yeta anzutiri be ekile afa alupi a’isirile, emi ma ni ani e’yo omvizu ’ba alu alu ma tia ’yeke.

7Tukiko adripi mani lele tu, ’ba azi ma aza kopi asi adarisi, ovupi ma be ati’bo aziru Opi ma aliari nga e’yo mani olu emi tia dria.

8Ma pe eri ti emi vu pila e’yo ’disi, emi ma ni ani e’yo amani, azini eri ma omi emi asi indi,

9Onesimo be tualu, eri adripi asi adaru be mani lele tu, ovupi ’ba emini ma azi aluri’i. Yi nga e’yo dria i ’yepi ’doari olu emi ria ra.

10Arisitariko ovupi arujoa ma beri pi zi emi ci ci, Marako Baranaba ma amvipi ma mvi pie (yi azi e’yo erini emi dri ’bo-eri ka eca emi vu ra emi a’i eri),

11Yesu omvele Yusito’iri pie. ’Ba agele liza be ’diyi ma eselia, ’ba ’diyi a’dule nga suru Munguni ma azi ma be tualu, yi ’ba ma asi omipi ’diyi.

12Epafra ati’bo Kristo Yesuni, ’ba emini ma azi aluri zi emi ci ci; eri o’bi okposi emi aza kozu, Mungu zizu emisi etuzu, emi ma so pa ani kirikiri ovuzu fudri ci a’ita be e’yo Munguni leleri ma alia dria.

13Te ma ovu ’ba e’yo erini ma eti nzepiri kini, eri ’ye azi amboru tu emi ma e’yosi, azini vini ’ba ovupi Laodikiaa ’diyi pi ma, e’yosi, Hierapolia ’diyi be.

14Luka ojou Ide turi pi zi emi ci ci Dema be.

15Emi ma zi adripi ovupi Laodikiaa ’diyi pi ci ci, Numfa pie, kanisa ovupi jo erini ma aliari pie.

16Yi ka waraga ’diri la emi eselia ’bo, emi ma fe yi ma la eri kanisa ’ba Laodikiaa ’diyini ma alia indi; azini emi ma la vini waraga engapi Laodikiaari indi.

17Te emi ma ’yo Arikipo ma ria kini, Mi ndre mi ma ’ye azi Opini fele mi driri de dria kililiru.

18’Di zita mani, mani sile ma ngulupi ma drisiri, ma’i Paulo. Emi ega anziriku mani ma e’yo fo! ’Yeta anzutiri ma ovu emi be.

← Chapter 3 Jump to: