Jonah 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1E’yo Yehovani nga eca Yona vu pale iririsi kini,

2Mi enga, mi mu Nineve aku amboru ’daria, mi olu eri tia oluta mani azile mi tiari.

3’Dini Yona enga di ra, mu Ninevea Yehovani ’yolerile. Te Nineveni aku amboru tu, ’bani ani acizu alenia o’du na ’dipiri.

4Ka’dinile Yona e’do di fizu aku ma alesi acizu o’du alu, Eri oyu o’duko urusi kini, Ace nga o’du kali su, Nineveni nga dri ja ra!

5’Ba Ninevea ’diyi nga ani Mungu a’i ra; yi azi nyaka ’dazu, yi nga di koliba osu yi ma ruaa, e’dozu ’ba ’warasi kpere cazu ’ba nyiri vu indi.

6E’yoni ku kpere opi Nineveari ma bilia ra, eri nga di enga ogua erini opiniri ma driarisi, nga bongo ini tru i ma ruaarisi ra, nga koliba su, nga ri va ofuta ma alia.

7Eri nga e’yo kuza eku Nineve ma eselia dria, azita opi pini ’ba ’wara eri ma palaa ’diyi berisi, kini: ’Ba dria alu alu ma o’bi afa azini ma aji aluni ku, kani ’ba agupiru, kani anyapani, kani tini, kani kabiloni; yi ma nya nyaka ku, ma mvu yi ku indi;

8te yi dria ma su koliba yi ma ruaa, ’ba piyi anyapa pie dria, yi ma wu Mungu vu asi driasi; adaru yi alu alu ma oja yi e’yo onzi yini kuzu, e’yo eganaru yini ’yele yi ma drisiri kuzu indi.

9A’di nini, kani Mungu ngani i oja, ngani i ma asi omvi dika ku, i ma aoko vepi okporuri kuzu, ama ma ja dri ani ku beni yani?

10Mungu ndre ’yeta yini, yini yi ojazu geri yini onziri kuzu ra te Mungu nga di asi omvi, nga e’yo onzi nde erini ’yole kini i nga ’ye yi vu rari ’ye ku.

← Chapter 2 Jump to: Chapter 4 →