Jonah 4

Lugbara (E’yo Siza Alatararu Munguniri BIBLIA)

← Chapter 3 Jump to:

1Te e’yo nde feni ayiko Yona dri aluni ku, eri ovu ani aokosi tu.

2Eri zi Yehova tia kini, Ma zi mi tia, Yehova la! de ma ovu ma vile angua ma ’yoni ndra ’dini ku ya? Ma ’ye ndra bani apa mbe1e Tarasisia ani ’da; a’disiku ma ni ra mi Mungu asi ndriza e’ini, yiki aleru turi’i be; aoko nyani mi mbe1e ku, te mi yiki be amboru, mi adri mi asi omvi e’yo onzi kuzu ra.

3Ka’dinile Yehova la! ma zi mi tia, mi nze di idri mani curu’do ra; a’disiku mani drazuri ba, aga mani ovuzu idriruri ra.

4Yehova nga di ’yo eri La, Aokoni mi nyazu ’diniri onyiru ya?

5E’yo ’disi Yona nga di fu akuasi amve, nga ri va aku ma kala etuni efurialeruria, nga boroko si i dri ’daa, nga ri va endrinia, de nga ndreni e’yoni nga i ’ye aku amboru nderia ngoni yari ku.

6Yehova Mungu nga di nzu ede, eri fe erini razu Yona ma dria uru, ovuzu di endriru eri ma dri dri beni, azani kozu ocoko erini onzikanyarori ma alia. E’yo ’disi Yona nga di ovu ayikosi tu nzu ma e’yosi ani.

7Te drusi ’dini anguni atiria Mungu nga eriaka ede, eriaka nde nga di nzu nde mbe ra, onyu ani ra,

8Eri nga eca ’dini, etu ka ca uru a’iyoru ’bo, Mungu ede oli aciru engapi woko etuni efurialeruria, etu nga di Yona ma dri ve, kpere icimakoroni eri ’beria, eri le te di i ma dra ra, ’yo ra, Mani drazuri ba aga mani ovuzu idriruri ra.

9Te Mungu nga di ’yo Yona tia, Aokoni mi nyazu e’yo nzunisiri onyiru ya? Eri kini, Mani ovuzu aokosi kpere mani drazu kairi ba.

10Yehova nga ’yo ra, Te mi ovu yikisi e’yo nzunisi ra, mini azini ngale kuri, mi feni vini erini idizuni ku; afa nde idi mbele ini alusi, ja dri vini mbele ini alu azirisi.

11Ka’dinile ma ka ovu yikisi Nineve aku amboruri vu, onzi ya? Aku nde ma alia ’ba yi ovu alifu turu alu drini kali iri, ’ba ecopi yi ma dri ndiri pi ma esele copi dri ejiri be ku ’diyi; azini alenia anyapa tu.

← Chapter 3 Jump to: