1 John 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Awˬ hkuiˉ puiˍ htaˇ ka‸ cawˬ taˍ ve, co ha te‸ piˇ lawˬ ve tawˇ hkawˇ awˬ lawn ngaˬ hui nawˬ hui hta‸ bvuh‸ laˇ ve yoˬ. Tawˇ hkawˇ oˇ ve hta‸ ngaˬ hui gʼa kaˇ leh, mehˆ shiˍ htawˇ gʼa mawˬ peuˬ ve yoˬ. Tawˇ hkawˇ oˇ ve hta‸ ngaˬ hui hkʼa deh‸ nyi leh, gʼa htawˇ gʼa yuˬ nyi jaw peuˬ ve yoˬ.

2Co ha te‸ ve oˇ ve hkʼa tawˍ lehˆ tawˆ la ve hta‸ ngaˬ hui gʼa mawˬ leh, oˇ ve awˬ lawn shaˉ hkiˆ hkanˍ ve yoˬ. Peuˬ leh, Awˬ pa geh cawˬ ve co ti‸ ha ti‸ teˇ ceuˬ yawˇ ngaˬ hui hta‸ hpeu‸ maˍ laˇ leh, ngaˬ hui nawˬ hui hta‸ kʼaw‸ kʼaoˍ maˍ laˇ ve yoˬ.

3Nawˬ hui htawˇ ngaˬ hui geh awˬ chawˇ gʼa te da‸ tuˬ, ngaˬ hui gʼa mawˬ gʼa kaˇ peuˬ ve teˇ hpaˍ nawˬ hui hta‸ kʼaoˍ maˍ laˇ ve yoˬ. Ngaˬ hui awˬ chawˇ te da‸ ve lehˬ, Awˬ pa leh yawˇ ve Yaˇ hpu Yeˍsuˆ Hkri‸ geh awˬ chawˇ te da‸ ve teˇ ceuˬ hpeh‸ ve yoˬ.

4Ngaˬ hui ha lehˬ ve biˇ la tuˬ, awˬ lawn chi teˇ hpaˍ nawˬ hui hta‸ bvuh‸ feu laˇ ve yoˬ.

5Yawˇ geh ngaˬ hui gʼa kaˇ leh nawˬ hui hta‸ kʼaoˍ maˍ laˇ ve yawˇ ve tawˇ hkawˇ lehˬ chi hkʼe yoˬ. Gʼuiˬsha lehˬ awˬ gʼeuˆ hpeh‸ leh, yawˇ awˬ hkʼaw lo naˆ ho‸ ve a ciˉ ka‸ maˇ cawˬ.

6Ngaˬ hui yawˇ geh awˬ chawˇ te da‸ chehˇ ve yoˬ teh‸ kʼoˆ ve htawˇ, naˆ ho‸ ve awˬ hkʼaw lo chehˇ taˍ ve kʼo, ngaˬ hui heˍ chehˇ leh, hteˇ ve cawˇ ve hta‸ maˇ te.

7Ya‸ hkʼaˇ Gʼuiˬsha lehˬ, awˬ gʼeuˆ awˬ hkʼaw lo chehˇ ve hkʼe ngaˬ hui htawˇ awˬ gʼeuˆ awˬ hkʼaw lo chehˇ taˍ ve kʼo, ngaˬ hui teˇ gʼaˇ leh teˇ gʼaˇ awˬ chawˇ te da‸ tuˬ yoˬ. Chi hkʼoˆ ka‸, yawˇ ve Yaˇ hpu Yeˍsuˆ Hkri‸ ve awˬ suhˍ lehˬ, ngaˬ hui ve venˇbaˆ teˇ ceuˬ le le hta‸ tsuhˇ baˬ laˇ chehˇ ve yoˬ.

8Ngaˬ hui venˇbaˆ maˇ cawˬ teh‸ kʼoˆ ve kʼo, ngaˬ hui a shu yawˇ awˬ to hta‸ heˍ leh, ngaˬ hui awˬ hkʼaw lo hteˇ ve cawˇ ve teˇ ceuˬ maˇ cawˬ.

9Ngaˬ hui a shu yawˇ ve venˇbaˆ teˇ hpaˍ hta‸ hpeu‸ maˍ ve kʼo, ngaˬ hui ve venˇ baˆ hta‸ hpehˇ hkʼa laˇ leh maˇ hteˇ maˇ cawˇ ve hkʼa peu-eˬ hta‸ tsuhˇ baˬ laˇ tuˬ, yawˇ ka ti‸ yeˬ leh hteˇ ve cawˇ ve yoˬ.

10Ngaˬ hui venˇbaˆ maˇ te jaw teh‸ kʼoˆ ve kʼo, Gʼuiˬsha hta‸ ngaˬ hui heˍ paˍ meh piˇ leh, yawˇ ve tawˇ hkawˇ ngaˬ hui awˬ hkʼaw lo maˇ cawˬ ve yoˬ.

Jump to: Chapter 2 →