1 John 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Ngaˬ ha‸ ve yaˇ teˇ hpaˍ-oˬ, nawˬ hui venˇbaˆ maˇ gʼa te tuˬ awˬ lawn chi teˇ hpaˍ ngaˬ nawˬ hui hta‸ bvuh‸ laˇ ve yoˬ. Ya‸ hkʼaˇ, teˇ gʼaˇ gʼaˇ venˇbaˆ te ve kʼo, ngaˬ hui hta‸ ga laˇ shehˍ hpaˇ teˇ gʼaˇ lehˬ Awˬ pa geh chehˇ taˍ ve yoˬ. Yawˇ lehˬ, hteˇ ve cawˇ ve awˬ shehˍ hpaˇ Yeˍsuˆ Hkri‸ yoˬ.

2Ngaˬ hui ve venˇbaˆ hta‸ hpehˇ hkʼa laˇ tuˬ awˬ pon, yawˇ lehˬ tanˇ tuˬ hpeh‸ ve yoˬ. Ya‸ hkʼaˇ, ngaˬ hui awˬ pon ceh tiˉ maˇ heˆ. Miˬguiˬ yaˇ hkʼa peu-eˬ awˬ pon htawˇ hpeh‸ ve yoˬ.

3Ngaˬ hui lehˬ, yawˇ piˇ taˍ ve tawˇ hkawˇ hta‸ na yuˬ leh te ve kʼo, ngaˬ hui yawˇ hta‸ shiˍ ve yoˬ teh‸ hkʼa deh‸ deh‸ gʼa shiˍ ve yoˬ.

4Ngaˬ yawˇ hta‸ shiˍ ve yoˬ teh‸ chaw teˇ gʼaˇ gʼaˇ kʼoˆ ve htawˇ, yawˇ piˇ taˍ ve tawˇ hkawˇ hta‸ chaw oˇ ve teˇ gʼaˇ maˇ na yuˬ ve kʼo, yawˇ lehˬ chaw heˍ paˍ hpeh‸ leh, hteˇ ve cawˇ ve teˇ ceuˬ yawˇ awˬ hkʼaw lo maˇ cawˬ.

5Ya‸ hkʼaˇ, Yeˍsuˆ Hkri‸ ve tawˇ hkawˇ hta‸ na yuˬ leh te ve chaw hkʼaˬ ve teˇ gʼaˇ maˇ kʼoˆ, Gʼuiˬsha hta‸ ha‸ ve teˇ ceuˬ yawˇ awˬ hkʼaw lo awˬ tehˬ awˬ na biˇ la peuˬ. Ngaˬ hui yawˇ awˬ hkʼaw lo chehˇ ve hta‸ ngaˬ hui chi hkʼe gʼa shiˍ ve yoˬ.

6Ngaˬ yawˇ awˬ hkʼaw lo chehˇ ve yoˬ teh‸ kʼoˆ ve chaw lehˬ, Yeˍsuˆ te ve hkʼe yawˇ htawˇ te cawˇ ve yoˬ.

7Ha‸ ve chaw teˇ hpaˍ-oˬ, tawˇ piˇ ve awˬ suhˉ teˇ hkawˇ ngaˬ nawˬ hui hta‸ bvuh‸ laˇ ve maˇ heˆ. Awˬ hkuiˉ puiˍ htaˇ ka‸ nawˬ hui hta‸ piˇ leh, nawˬ hui geh cawˬ taˍ ve tawˇ awˬ piˍ hpeh‸ ve yoˬ. Piˇ taˍ ve tawˇ awˬ piˍ oˇ ve lehˬ, nawˬ hui gʼa kaˇ jaw peuˬ ve tawˇ hpeh‸ ve yoˬ.

8Ya‸ hkʼaˇ htawˇ, tawˇ piˇ taˍ ve awˬ suhˉ teˇ hkawˇ ngaˬ nawˬ hui hta‸ bvuh‸ laˇ ve yoˬ. Tawˇ chi teˇ hkawˇ lehˬ, yawˇ awˬ hkʼaw lo ka‸, nawˬ hui awˬ hkʼaw lo ka‸, hteˇ ve cawˇ ve yoˬ. Awˬ lawn kʼo, naˆ ho‸ ve teˇ ceuˬ lehˬ mehˉ kʼai chehˇ leh, hteˇ ve cawˇ ve awˬ gʼeuˆ lehˬ chi beu‸ ka‸ ba tawˆ la chehˇ ve yoˬ.

9Awˬ gʼeuˆ awˬ hkʼaw lo ngaˬ chehˇ ve yoˬ teh‸ chaw teˇ gʼaˇ gʼaˇ kʼoˆ ve htawˇ, yawˇ ve awˬ viˉ awˬ nyi hta‸ canˇ chehˇ ve kʼo, yawˇ lehˬ chi beu‸ hkʼa gaˬ naˆ ho‸ ve awˬ hkʼaw lo chehˇ taˍ sheˍ ve yoˬ.

10A shu yawˇ ve awˬ viˉ awˬ nyi hta‸ ha‸ ve chaw teˇ gʼaˇ lehˬ, awˬ gʼeuˆ awˬ hkʼaw lo chehˇ taˍ leh, awˬ gʼeuˆ awˬ hkʼaw lo hkui htiˇ poˬ kuiˬ maˇ cawˬ.

11A shu yawˇ ve awˬ viˉ awˬ nyi hta‸ canˇ ve chaw teˇ gʼaˇ lehˬ, naˆ ho‸ ve awˬ hkʼaw lo chehˇ taˍ leh, naˆ ho‸ ve awˬ hkʼaw lo toˇ kʼai chehˇ ve yoˬ. Naˆ ho‸ ve oˇ ve lehˬ, yawˇ hta‸ mehˆ cuˉ piˇ lawˬ ve pa taw, yawˇ hkʼaˬ lo kʼai chehˇ ve hta‸ yawˇ maˇ shiˍ.

12Ha‸ ve yaˇ teˇ hpaˍ-oˬ, Yeˍsuˆ ve awˬ meh hta‸ pa taw nawˬ hui ve venˇbaˆ hpehˇ hkʼa peuˬ. Chi hta‸ pa taw, ngaˬ nawˬ hui hta‸ li‸ bvuh‸ laˇ ve yoˬ.

13Awˬ pa teˇ hpaˍ-oˬ, awˬ hkuiˉ puiˍ htaˇ ka‸ cawˬ chehˇ taˍ ve teˇ gʼaˇ hta‸ nawˬ hui shiˍ taˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ. Chaw haˉ paˍ teˇ hpaˍ-oˬ, haiˬ ve awˬ shehˍ hpaˇ hta‸ nawˬ hui gʼaˇ peuˬ ve pa taw, ngaˬ nawˬ hui hta‸ li‸ bvuh‸ laˇ ve yoˬ. Yaˇ ehˉ teˇ hpaˍ-oˬ, Awˬ pa Gʼuiˬsha hta‸ nawˬ hui shiˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ.

14Awˬ pa teˇ hpaˍ-oˬ, awˬ hkuiˉ puiˍ htaˇ ka‸ cawˬ chehˇ taˍ ve teˇ gʼaˇ hta‸ nawˬ hui shiˍ taˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ. Chaw haˉ paˍ teˇ hpaˍ-oˬ, nawˬ hui awˬ gʼaˇ uiˍ leh Gʼuiˬsha ve tawˇ hkawˇ nawˬ hui awˬ hkʼaw lo cawˬ taˍ leh, haiˬ ve awˬ shehˍ hpaˇ hta‸ nawˬ hui gʼaˇ peuˬ ve pa taw ngaˬ nawˬ hui hta‸ li‸ bvuh‸ laˇ ve yoˬ.

15Miˬguiˬ hta‸ maˇ kʼoˆ, miˬguiˬ hkʼoˆ cawˬ ve awˬ ceuˬ teˇ hpaˍ hta‸ maˇ kʼoˆ, taˇ ha‸ loˬ. Chaw teˇ gʼaˇ gʼaˇ miˬguiˬ hta‸ ha‸ ve kʼo, Awˬ pa Gʼuiˬsha hta‸ ha‸ ve teˇ ceuˬ yawˇ awˬ hkʼaw lo maˇ cawˬ.

16Awˬ lawn kʼo, miˬguiˬ hkʼoˆ cawˬ ve awˬ ceuˬ hkʼa peu-eˬ, awˬ suhˍ awˬ shaˍ a loˍ te gaˇ ve maˇ kʼoˆ, mehˆ shiˍ mawˬ leh heuˆ gaˇ ve maˇ kʼoˆ, hpu shi mawˇ jeˬ hta‸ pa taw nyi ma uiˍ ve maˇ kʼoˆ, Awˬ pa Gʼuiˬsha lo tawˆ la ve maˇ heˆ. Miˬguiˬ lo tawˆ la ve yoˬ.

17Miˬguiˬ leh miˬguiˬ hta‸ caˉ da‸ ve sheˉ lai ve teˇ hpaˍ lehˬ, mehˉ kʼai chehˇ ve yoˬ. Ya‸ hkʼaˇ, Gʼuiˬsha ve a loˍ hta‸ te ve chaw teˇ gʼaˇ lehˬ, co co taiˍ taiˍ te‸ chehˇ tuˬ yoˬ.

18Ha‸ ve yaˇ teˇ hpaˍ-oˬ, chi beu‸ lehˬ awˬ leh meuˇ ve awˬ yanˇ hpeh‸ ve yoˬ. Hkri‸ ve canˇ paˍ lonˉ tawˆ la tuˬ yoˬ teh‸, nawˬ hui gʼa kaˇ ve hkʼe, chi beu‸ ka‸ Hkri‸ ve canˇ paˍ lonˉ laiˉ gʼaˇ tawˆ la peuˬ. Hkʼe te leh, chi beu‸ lehˬ awˬ leh meuˇ ve awˬ yanˇ hpeh‸ ve hta‸ ngaˬ hui gʼa shiˍ ve yoˬ.

19Chaw oˇ ve teˇ hpaˍ ngaˬ hui awˬ hkʼaw lo tawˆ kʼai peuˬ. Ya‸ hkʼaˇ, yawˇ hui lehˬ ngaˬ hui hta‸ caˉ da‸ ve chaw hpeh‸ ve maˇ heˆ. Awˬ lawn kʼo, yawˇ hui ngaˬ hui hta‸ caˉ da‸ ve kʼo, ngaˬ hui geh teˇ geh chehˇ taˍ tuˬ yoˬ. Ya‸ hkʼaˇ, yawˇ hui hkʼa peu-eˬ ngaˬ hui hta‸ maˇ caˉ da‸ teh‸ hkʼa tawˍ lehˆ tawˆ la tuˬ, yawˇ hui tawˆ kʼai peuˬ.

20Da‸ kehˬ shehˍ hpaˇ nawˬ hui hta‸ leuˆ yuˬ taˍ peuˬ ve pa taw, teˇ ceuˬ le le hta‸ nawˬ hui shiˍ ve yoˬ.

21Hteˇ ve cawˇ ve hta‸ nawˬ hui maˇ shiˍ ve pa taw, ngaˬ nawˬ hui hta‸ li‸ bvuh‸ laˇ ve maˇ heˆ. Hteˇ ve cawˇ ve hta‸ nawˬ hui shiˍ leh, heˍ ve hkʼaˬ ve teˇ ceuˬ maˇ kʼoˆ, hteˇ ve cawˇ ve hta‸ maˇ caˉ da‸ ve teh‸ nawˬ hui shiˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ.

22Heˍ shehˍ hpaˇ a shu le. Yeˍsuˆ lehˬ Hkri‸ maˇ heˆ teh‸ kʼoˆ ve gʼawˬ hkʼaˆ ve chaw teˇ gʼaˇ yoˬ maˇ heˆ laˇ. Awˬ pa leh Yaˇ hpu hta‸ gʼawˬ hkʼaˆ ve chaw teˇ gʼaˇ lehˬ, Hkri‸ ve canˇ paˍ lonˉ hpeh‸ ve yoˬ.

23Yaˇ hpu hta‸ hkʼa chiˇ baˬ ve chaw lehˬ, Awˬ pa hta‸ maˇ caˉ da‸. Yaˇ hpu hta‸ ha‸ yuˬ leh hkanˍ yuˬ ve chaw teˇ gʼaˇ lehˬ, Awˬ pa hta‸ htawˇ caˉ da‸ ve yoˬ.

24Awˬ hkuiˉ puiˍ htaˇ ka‸ nawˬ hui gʼa kaˇ peuˬ ve awˬ lawn teˇ hpaˍ, nawˬ hui ve nyi ma awˬ hkʼaw lo cawˬ piˇ-oˆ. Awˬ hkuiˉ puiˍ htaˇ ka‸ nawˬ hui gʼa kaˇ peuˬ ve awˬ lawn teˇ hpaˍ, nawˬ hui ve nyi ma awˬ hkʼaw lo cawˬ ve kʼo, nawˬ hui htawˇ Yaˇ hpu awˬ hkʼaw lo maˇ kʼoˆ, Awˬ pa awˬ hkʼaw lo maˇ kʼoˆ, chehˇ tuˬ yoˬ.

25Yawˇ ngaˬ hui hta‸ co ti‸ ha ti‸ pe‸ laˇ tuˬ yoˬ teh‸ kʼoˆ taˍ ve yoˬ.

26Nawˬ hui hta‸ heˍ yuˬ beˬ yuˬ ve chaw teˇ hpaˍ ve awˬ lawn ngaˬ nawˬ hui hta‸ li‸ chi hkʼe bvuh‸ laˇ ve yoˬ.

27Yeˍsuˆ nawˬ hui hta‸ leuˆ yuˬ ve teˇ ceuˬ lehˬ, nawˬ hui awˬ hkʼaw lo cawˬ taˍ ve pa taw, a shu ka‸ nawˬ hui hta‸ maˍ laˇ tuˬ maˇ loˍ. Ya‸ hkʼaˇ, yawˇ nawˬ hui hta‸ leuˆ yuˬ taˍ ve lehˬ, awˬ lawn hkʼa peu-eˬ yawˇ nawˬ hui hta‸ maˍ laˇ ve yoˬ. Leuˆ yuˬ taˍ ve oˇ ve lehˬ, heˍ ve teˇ ceuˬ maˇ heˆ, hteˇ ve cawˇ ve teˇ ceuˬ hpeh‸ ve yoˬ. Hkʼe te leh, leuˆ yuˬ taˍ ve oˇ ve nawˬ hui hta‸ maˍ laˇ ve hkʼa shuˍ shuˍ, yawˇ awˬ hkʼaw lo chehˇ taˍ-o‸.

28Ha‸ ve yaˇ teˇ hpaˍ-oˬ, yawˇ kʼaw‸ tawˆ la ve teˇ yanˇ, ngaˬ hui nyi ma ha‸ hanˉ ve cawˬ tuˬ leh yawˇ mehˆ gʼuˇ suhˍ maˇ gʼa ya‸ taw tuˬ, chi beu‸ yawˇ awˬ hkʼaw lo chehˇ taˍ-o‸.

29Yawˇ lehˬ hteˇ ve cawˇ ve yoˬ teh‸ nawˬ hui shiˍ ve kʼo, hteˇ ve cawˇ ve hta‸ te ve chaw teˇ gʼaˇ le le lehˬ, yawˇ lo paw la peuˬ ve hta‸ nawˬ hui gʼa shiˍ ve yoˬ.

← Chapter 1 Jump to: Chapter 3 →