1 John 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Awˬ pa ngaˬ hui hta‸ hkʼaˬ ma ha‸ ve hta‸ dawˇ nyi-o. Ngaˬ hui hta‸ Gʼuiˬsha ve awˬ yaˇ awˬ duˬ teh‸ meh laˇ leh, ngaˬ hui lehˬ yawˇ ve awˬ yaˇ awˬ duˬ hpeh‸ tehˬ ve yoˬ. Hkʼe te leh, miˬguiˬ yaˇ yawˇ hta‸ maˇ shiˍ ve pa taw, ngaˬ hui hta‸ htawˇ yawˇ hui maˇ shiˍ.

2Ha‸ ve chaw teˇ hpaˍ-oˬ, chi beu‸ ngaˬ hui Gʼuiˬsha ve awˬ yaˇ awˬ duˬ hpeh‸ ve yoˬ. Awˬ hkʼaw‸ nawˉ ngaˬ hui hkʼaˬ hkʼe hpeh‸ la tuˬ ve hta‸ maˇ hpeu‸ maˍ laˇ sheˍ. Ya‸ hkʼaˇ, yawˇ kʼaw‸ tawˆ la ve teˇ yanˇ, ngaˬ hui yawˇ hkʼe hpeh‸ la tuˬ ve hta‸ ngaˬ hui shiˍ ve yoˬ. Awˬ lawn kʼo, yawˇ awˬ to hta‸ ngaˬ hui hkʼa tawˍ lehˆ gʼa mawˬ tuˬ yoˬ.

3Yawˇ hta‸ chi hkʼe dawˇ law chehˇ ve chaw teˇ gʼaˇ le le lehˬ, yawˇ da‸ kehˬ ve hkʼe, chaw oˇ ve htawˇ a shu yawˇ awˬ to hta‸ da‸ piˇ kehˬ piˇ ve yoˬ.

4Venˇbaˆ hkʼa te ve chaw teˇ gʼaˇ le le lehˬ, awˬliˇtawˇhkawˇ hta‸ te ya‸ ve yoˬ. Venˇ baˆ teˇ ceuˬ lehˬ, awˬliˇtawˇhkawˇ hta‸ te ya‸ ve teˇ ceuˬ hpeh‸ ve yoˬ.

5Yeˍsuˆ lehˬ, venˇbaˆ teˇ hpaˍ hta‸ yuˬ baˬ tuˬ awˬ pon tawˆ la ve hta‸ nawˬ hui shiˍ ve yoˬ. Yawˇ awˬ hkʼaw lo venˇbaˆ maˇ cawˬ.

6Yawˇ awˬ hkʼaw lo chehˇ ve chaw hkʼaˬ ve teˇ gʼaˇ maˇ kʼoˆ, venˇbaˆ maˇ te. Venˇbaˆ te ve chaw hkʼaˬ ve teˇ gʼaˇ maˇ kʼoˆ, yawˇ hta‸ maˇ mawˬ maˇ shiˍ sheˍ.

7Ha‸ ve yaˇ teˇ hpaˍ-oˬ, a shu htawˇ maˇ kʼoˆ, nawˬ hui hta‸ maˇ gʼa heˍ yuˬ beˬ yuˬ tuˬ shaˍ ti‸ taˍ-o‸. Yeˍsuˆ lehˬ, hteˇ ve cawˇ ve teˇ gʼaˇ hpeh‸ ve hkʼa shuˍ shuˍ, hteˇ ve cawˇ ve hta‸ te ve chaw hkʼaˬ ve teˇ gʼaˇ maˇ kʼoˆ, hteˇ ve cawˇ ve chaw hpeh‸ ve yoˬ.

8Venˇbaˆ te ve chaw teˇ gʼaˇ lehˬ, neˇhaiˬ hta‸ caˉ da‸ ve yoˬ. Awˬ lawn kʼo, neˇhaiˬ lehˬ, awˬ hkuiˉ puiˍ htaˇ ka‸ venˇbaˆ te chehˇ ve yoˬ. Hkʼe te leh, neˇhaiˬ ve kanˉ teˇ hpaˍ hta‸ te luˬ tuˬ, Gʼuiˬsha ve Yaˇ hpu tawˆ la ve yoˬ.

9Gʼuiˬsha ve awˬ yaˇ awˬ duˬ hkʼaˬ ve teˇ gʼaˇ maˇ kʼoˆ, venˇbaˆ maˇ te. Awˬ lawn kʼo, Gʼuiˬsha ve te‸ ve awˬ yawˇ teˇ ceuˬ yawˇ awˬ hkʼaw lo cawˬ taˍ leh, yawˇ Gʼuiˬsha geh paw la peuˬ ve pa taw, yawˇ venˇbaˆ te maˇ hpeh‸.

10Chi hta‸ pa taw, Gʼuiˬsha ve awˬ yaˇ awˬ duˬ leh neˇhaiˬ ve awˬ yaˇ awˬ duˬ teˇ hpaˍ hta‸ hkʼa tawˍ lehˆ fuiˍ da‸ pehˬ da‸ gʼa ve yoˬ. Hteˇ ve cawˇ ve hta‸ maˇ te ve chaw hkʼaˬ ve teˇ gʼaˇ maˇ kʼoˆ, Gʼuiˬsha hta‸ maˇ caˉ da‸. A shu yawˇ ve awˬ viˉ awˬ nyi hta‸ maˇ ha‸ ve chaw htawˇ, Gʼuiˬsha hta‸ maˇ caˉ da‸ ve yoˬ.

11Ngaˬ hui teˇ gʼaˇ leh teˇ gʼaˇ gʼa ha‸ da‸ ve yoˬ teh‸ kʼoˆ taˍ ve tawˇ chi teˇ hkawˇ hta‸ awˬ hkuiˉ puiˍ htaˇ ka‸ nawˬ hui gʼa kaˇ taˍ peuˬ.

12Haiˬ ve awˬ shehˍ hpaˇ teˇ gʼaˇ hta‸ caˉ da‸ leh yawˇ ve awˬ nyi paˍ hta‸ tiˇ pehˍ shehˍ hpaˇ Kaˍiˉnaˆ hkʼe taˇ hpeh‸ piˇ. Yawˇ lehˬ, aˬ hto‸ ma te awˬ nyi paˍ hta‸ tiˇ pehˍ ve le teh‸ kʼoˆ kʼo, yawˇ te ve kanˉ teˇ hpaˍ haiˬ leh, awˬ nyi paˍ te ve kanˉ teˇ hpaˍ hteˇ ve cawˇ ve hta‸ pa taw yawˇ hta‸ tiˇ pehˍ ve yoˬ.

13Awˬ viˉ awˬ nyi teˇ hpaˍ-oˬ, miˬguiˬ yaˇ nawˬ hui hta‸ canˇ ve kʼo, taˇ anˇ.

14Ngaˬ hui lehˬ, suh ve teˇ ceuˬ awˬ hkʼaw lo tawˆ kʼai leh co ha te‸ ve teˇ ceuˬ awˬ hkʼaw lo lo‸-e peuˬ ve hta‸ ngaˬ hui hkʼaˬ hkʼe gʼa shiˍ le teh‸ kʼoˆ kʼo, awˬ viˉ awˬ nyi teˇ hpaˍ hta‸ ngaˬ hui ha‸ ve pa taw gʼa shiˍ ve yoˬ. Ha‸ pehnˇ ve maˇ cawˬ ve chaw teˇ gʼaˇ lehˬ, suh ve teˇ ceuˬ awˬ hkʼaw lo chehˇ taˍ sheˍ ve yoˬ.

15A shu yawˇ ve awˬ viˉ awˬ nyi hta‸ canˇ ve chaw teˇ gʼaˇ le le lehˬ, chaw hta‸ tiˇ pehˍ shehˍ hpaˇ hpeh‸ ve yoˬ. Chaw hta‸ tiˇ pehˍ shehˍ hpaˇ hkʼaˬ ve teˇ gʼaˇ maˇ kʼoˆ, yawˇ awˬ hkʼaw lo co ti‸ ha ti‸ maˇ cawˬ ve hta‸ nawˬ hui shiˍ ve yoˬ.

16Hkri‸ lehˬ ngaˬ hui awˬ pon yawˇ ve a sha‸ tanˇ piˇ ve hta‸ pa taw, ha‸ pehnˇ ve teˇ ceuˬ hta‸ ngaˬ hui shiˍ ve yoˬ. Ngaˬ hui htawˇ, awˬ viˉ awˬ nyi teˇ hpaˍ awˬ pon ngaˬ hui ve a sha‸ hta‸ tanˇ piˇ cawˇ ve yoˬ.

17Chaw hkʼaˬ ve teˇ gʼaˇ maˇ kʼoˆ, chi miˬguiˬ ve hpu shi mawˇ jeˬ cawˬ leh, yawˇ ve awˬ viˉ awˬ nyi haˍ gʼawˇ ve hta‸ gʼa mawˬ htawˇ, ha kʼaˉ ve teˇ ceuˬ yawˇ awˬ hkʼaw lo maˇ cawˬ ve kʼo, Gʼuiˬsha ve ha‸ pehnˇ ve teˇ ceuˬ yawˇ awˬ hkʼaw lo hkʼaˬ hkʼe te cawˬ hpeh‸ tuˬ le.

18Ha‸ ve yaˇ teˇ hpaˍ-oˬ, maw‸ kʼaw ceh ha‸ ve teˇ ceuˬ taˇ te. Ya‸ hkʼaˇ, kanˉ te ve leh hteˇ ve cawˇ ve awˬ hkʼaw lo ha‸-o‸.

19Ngaˬ hui chi hkʼe ha‸ ve kʼo, ngaˬ hui hteˇ ve cawˇ ve hta‸ caˉ da‸ ve teh‸ gʼa shiˍ ve yoˬ. Ngaˬ hui ve nyi ma ngaˬ hui awˬ hkʼoˆ venˇbaˆ teˇ ceuˬ ceuˬ taˍ ve kʼo, Gʼuiˬsha mehˆ gʼuˇ suhˍ ngaˬ hui ve nyi ma dawˇ sha la tuˬ yoˬ.

20Awˬ lawn kʼo, ngaˬ hui ve nyi ma a‸ kehˉ Gʼuiˬsha lehˬ uiˍ jaˇ da‸ jaˇ leh, hkʼa peu-eˬ hta‸ yawˇ shiˍ ve yoˬ.

21Ha‸ ve chaw teˇ hpaˍ-oˬ, ngaˬ hui ve nyi ma ngaˬ hui awˬ hkʼoˆ venˇbaˆ maˇ taˍ ve kʼo, Gʼuiˬsha mehˆ gʼuˇ suhˍ ngaˬ hui nyi ma ha‸ hanˉ tuˬ yoˬ.

22Yawˇ piˇ taˍ ve tawˇ hkawˇ teˇ hpaˍ hta‸ ngaˬ hui na yuˬ leh yawˇ nyi ma cawˇ ve hta‸ te ve pa taw, yawˇ geh ngaˬ hui hkʼa lawˬ ve teˇ hpaˍ hta‸ gʼa ve yoˬ.

23Yawˇ piˇ taˍ ve tawˇ hkawˇ lehˬ chi hkʼe yoˬ. Yawˇ ve Yaˇ hpu Yeˍsuˆ Hkri‸ ve awˬ meh hta‸ ngaˬ hui gʼa yonˍ leh, Yaˇ hpu tawˇ piˇ laˇ ve hkʼe, teˇ gʼaˇ leh teˇ gʼaˇ gʼa ha‸ da‸ ve yoˬ.

24Yawˇ piˇ taˍ ve tawˇ hkawˇ hta‸ na yuˬ leh te ve chaw teˇ gʼaˇ lehˬ, yawˇ awˬ hkʼaw lo chehˇ leh, yawˇ htawˇ chaw oˇ ve awˬ hkʼaw lo chehˇ ve yoˬ. Yawˇ ngaˬ hui hta‸ pe‸ laˇ ve Awˬ ha hpu hta‸ pa taw, yawˇ ngaˬ hui awˬ hkʼaw lo chehˇ ve yoˬ teh‸ ngaˬ hui gʼa shiˍ ve yoˬ.

← Chapter 2 Jump to: Chapter 4 →