2 Timothy 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Hkʼe te leh, ngaˬ yaˇ-oˬ, Yeˍsuˆ Hkri‸ ve awˬ bon awˬ hkʼaw lo awˬ gʼaˇ cawˬ la piˇ-oˆ.

2Shaˉ hkiˆ hkanˍ shehˍ hpaˇ laiˉ gʼaˇ mehˆ gʼuˇ suhˍ nawˬ ngaˬ geh gʼa kaˇ taˍ peuˬ ve awˬ ceuˬ teˇ hpaˍ, shu hta‸ maˍ piˇ puiˉ ve ka ti‸ yeˬ ve chaw teˇ hpaˍ hta‸ kʼaw‸ chiˇ a‸ piˇ-oˆ.

3Yeˍsuˆ Hkri‸ ve da‸ ve ma‸ yaˇ hkʼa shuˍ shuˍ, nawˬ ngaˬ geh teˇ geh tu‸ ve hkanˍ ve hta‸ hkanˍ yuˬ-o‸.

4Ma‸ yaˇ te chehˇ ve chaw hkʼaˬ ve teˇ gʼaˇ maˇ kʼoˆ, a shu yawˇ ve ma‸ poˍ nyi hkʼaˇ suh tuˬ te gaˇ ve pa taw, a shu yawˇ awˬ to awˬ pon kanˉ teˇ hpaˍ awˬ hkʼaw lo kʼaˉ tiˍ hawˆ tiˍ taˍ tuˬ yawˇ maˇ te.

5Gʼuiˇ da‸ ve pawehˇ awˬ hkʼaw lo lo‸-e ve chaw teˇ gʼaˇ lehˬ, awˬ liˇ awˬ hkʼaˇ cawˬ ve hkʼe maˇ gʼuiˇ ve kʼo, shu yawˇ hta‸ gʼaˇ shehˍ hpaˇ yoˬ teh‸ maˇ shawˍ piˇ.

6Kanˉ te hkeu‸ ve muiˬ caˇ paˍ lehˬ, awˬ shiˍ hta‸ awˉ lawˉ gʼa caˇ cawˇ ve yoˬ.

7Ngaˬ kʼoˆ ve hta‸ dawˇ nyi sheˍ. Awˬ lawn kʼo, Jawˇmawˇ Yeˍsuˆ lehˬ, teˇ ceuˬ le le hta‸ nawˬ shiˍ puiˉ tuˬ cuˇ yiˍ pe‸ laˇ tuˬ yoˬ.

8Ngaˬ ha lehˬ ve bon hkawˇ maˍ piˇ taˍ peuˬ ve hkʼe, Daˍviˆ ve awˬ ceuˬ awˬ hkʼaˇ hpeh‸ ve, suh kuiˍ lo kʼaw‸ te‸ tu la peuˬ ve Yeˍsuˆ Hkri‸ hta‸ dawˇ nawˇ-oˆ.

9Ha lehˬ ve bon hkawˇ oˇ ve hta‸ pa taw, chaw haiˬ teˇ gʼaˇ hkʼa shuˍ shuˍ ngaˬ hta‸ shu hpeh taˍ laˇ leh, tu‸ ve hkanˍ ve hta‸ ngaˬ gʼa hkanˍ ve yoˬ. Ya‸ hkʼaˇ, Gʼuiˬsha ve tawˇ hkawˇ hta‸ shu hpeh taˍ maˇ gʼa.

10Chi hta‸ pa taw, leuˆ yuˬ taˍ ve chaw teˇ hpaˍ htawˇ, Yeˍsuˆ Hkri‸ awˬ hkʼaw lo cawˬ ve htaiˍ hkʼaw‸ ve teˇ ceuˬ hta‸ gʼa tuˬ awˬ pon, awˬ ceuˬ hkʼa peu-eˬ hta‸ ngaˬ yeunˇ hkanˍ ve yoˬ. Htaiˍ hkʼaw‸ ve oˇ ve geh teˇ geh co co taiˍ taiˍ awˬ me‸ awˬ hponˇ ka‸ yawˇ hui gʼa tuˬ yoˬ.

11Tawˇ chi teˇ hkawˇ lehˬ, ka ti‸ yeˬ ve tawˇ hkawˇ hpeh‸ ve yoˬ. Ngaˬ hui yawˇ geh teˇ geh suh ve kʼo, yawˇ geh teˇ geh gʼa te‸ tuˬ yoˬ.

12Ngaˬ hui yeunˇ hkanˍ ve kʼo, yawˇ geh teˇ geh gʼa uˉ peunˍ tuˬ yoˬ. Ngaˬ hui yawˇ hta‸ chiˇ baˬ ve kʼo, yawˇ htawˇ ngaˬ hui hta‸ chiˇ baˬ laˇ tuˬ yoˬ.

13Ngaˬ hui ka ti‸ maˇ ye‸ ve htawˇ, yawˇ lehˬ ka ti‸ yeˬ chehˇ ve yoˬ. Awˬ lawn kʼo, yawˇ awˬ to hta‸ yawˇ chiˇ baˬ maˇ hpeh‸.

14Awˬ lawn chi teˇ hpaˍ yawˇ hui hta‸ kʼaw‸ dawˇ nawˇ piˇ-oˆ. Tawˇ hkawˇ teˇ hpaˍ awˬ lawn tawˇ maˇ gʼa gʼawˬ da‸ tuˬ, Gʼuiˬsha mehˆ gʼuˇ suhˍ yawˇ hui hta‸ shaˍ ti‸ piˇ-oˆ. Chi hkʼe tawˇ gʼawˬ da‸ ve lehˬ, te‸ chiˉ awˬ bon maˇ cawˬ ve awˬ hkʼoˆ ka‸, kaˇ shehˍ hpaˇ hui hta‸ te luˬ piˇ ve yoˬ.

15Nawˬ lehˬ, Gʼuiˬsha nyi ma cawˇ ve kanˉ te shehˍ hpaˇ hpeh‸ ve awˬ hkʼaw lo, nawˬ awˬ to yawˇ hta‸ chiˇ a‸ piˇ hpeh‸ tuˬ, gʼaˇ hte‸ coˇ caˇ leh te-o. Chi hkʼe te ve kʼo, nawˬ lehˬ ya‸ taw tuˬ maˇ cawˬ leh, awˬ tehˬ awˬ na ve tawˇ hkawˇ hta‸ hteˇ lehˍ cawˇ lehˍ maˍ piˇ puiˉ ve kanˉ te shehˍ hpaˇ hpeh‸ tuˬ yoˬ.

16Gʼuiˬsha hta‸ maˇ yawˆ yan ve awˬ hkʼaw lo hkʼe leˇ kʼoˆ guiˇ ve tawˇ hkawˇ teˇ hpaˍ hta‸ jaw kʼai-o. Awˬ lawn kʼo, chaw teˇ hpaˍ lehˬ, Gʼuiˬsha hta‸ maˇ yawˆ maˇ yan ve nyi ma shaˬ te shaˬ maˇ la leh,

17yawˇ hui maˍ piˇ ve teˇ hpaˍ lehˬ, kuiˇ ve behˬ ve hkʼaw kuiˬ uiˍ la kʼehˬ la ve hkʼe hpeh‸ ve yoˬ. Yawˇ hui awˬ hkʼaw lo Huˍmeˍnehˇ leh Hpiˇlehˆ ka‸ chehˇ ve yoˬ.

18Suh kuiˬ lo kʼaw‸ te‸ tu la ve teˇ ceuˬ lehˬ, hpeh‸ la peuˬ teh‸ yawˇ huiˉ maˬ kʼoˆ leh, hteˇ ve cawˇ ve teˇ ceuˬ hta‸ ya‸ kʼai peuˬ. Chaw teˇ hpaˍ hpaˍ ve yonˍ ve nyi ma hta‸ yawˇ huiˉ maˬ hpfuhˆ baˬ piˇ chehˇ ve yoˬ.

19Ya‸ hkʼaˇ, Gʼuiˬsha ve yeˬ ve awˬ hkuiˉ puiˍ lehˬ, hkʼaˬ htaˆ ka‸ yeˬ chehˇ leh, yinˉ chi hkʼe tcuhˉ taˍ ve yoˬ. Jawˇmawˇ Gʼuiˬsha lehˬ, yawˇ ve chaw teˇ hpaˍ hta‸ shiˍ taˍ ve yoˬ. Peuˬ leh, Jawˇmawˇ Gʼuiˬsha ve awˬ meh hta‸ pfuhˇ taˍ ve chaw teˇ gʼaˇ le le lehˬ, maˇ hteˇ maˇ cawˇ ve hta‸ baˬ taˉ-oˆ teh‸ bvuh‸ taˍ ve yoˬ.

20Uiˍ ve yehˬ teˇ yehˬ awˬ hkʼaw lo hpu hkʼeun shi hkʼeun ceh tiˉ cawˬ ve maˇ heˆ. Suhˆ leh je‸ te taˍ ve awˬ hkʼeun teˇ hpaˍ htawˇ cawˬ ve yoˬ. Awˬ hkʼeun teˇ hpaˍ hpaˍ hta‸ awˬ me‸ awˬ hponˇ cawˬ ve awˬ pon yehˇ leh, teˇ hpaˍ hpaˍ hta‸ awˬ me‸ awˬ hponˇ maˇ cawˬ ve awˬ pon yehˇ ve yoˬ.

21Hkʼe te leh, awˬ me‸ awˬ hponˇ maˇ cawˬ ve awˬ ceuˬ teˇ hpaˍ hta‸ a shu yawˇ awˬ to awˬ hkʼaw lo yuˬ baˬ ve kʼo, yawˇ lehˬ awˬ shehˍ hpaˇ yehˇ hpeh‸ ve da‸ ve kehˬ ve awˬ hkʼeun hpeh‸ leh, da‸ ve kanˉ hkʼa peu-eˬ hta‸ te tuˬ awˬ pon gu taˍ hehnˇ taˍ ve, awˬ me‸ awˬ hponˇ cawˬ ve awˬ hkʼeun hpeh‸ tuˬ yoˬ.

22Yaˇ nehˬ teˇ hpaˍ awˬ suhˍ awˬ shaˍ hpawˇ sheˉ lai puiˉ ve awˬ ceuˬ teˇ hpaˍ hta‸ nawˬ jaw kʼai-o. Da‸ kehˬ ve nyi ma awˬ hkʼaw lo Jawˇ mawˇ Yeˍsuˆ hta‸ kuˬ ve chaw hui geh teˇ geh hteˇ ve cawˇ ve awˬ ceuˬ, yonˍ ve awˬ ceuˬ, ha‸ pehnˇ ve awˬ ceuˬ leh, cawˇ da‸ hui da‸ ve awˬ ceuˬ teˇ hpaˍ awˬ hkʼaˇ suh kʼai-o.

23Cuˇ yiˍ maˇ cawˬ leh, te‸ chiˉ tcuhˉ kuiˬ maˇ cawˬ ve awˬ lawn teˇ hpaˍ jehˬ da‸ ve hta‸ ka‸ jaw kʼai-o. Awˬ lawn kʼo, chi hkʼe jehˬ da‸ ve teˇ ceuˬ lehˬ, tawˇ gʼawˬ da‸ ve teˇ ceuˬ hta‸ ceh tiˉ te tawˆ la ve yoˬ.

24Jawˇmawˇ Yeˍsuˆ ve awˬ ceˬ lehˬ, deˇ da‸ ya‸ da‸ ve chaw maˇ gʼa hpeh‸. Yawˇ lehˬ, chaw hkʼa peu-eˬ hta‸ nyi ma nuˇ nehˬ te ve chaw, maˍ piˇ puiˉ ve chaw leh, yeunˇ hkanˍ puiˉ ve chaw gʼa hpeh‸ ve yoˬ.

25Yawˇ hta‸ tawˍ da‸ ve chaw teˇ hpaˍ hta‸ nyi ma nuˇ nehˬ ve awˬ hkʼaw lo maˍ piˇ puiˉ ve chaw htawˇ gʼa hpeh‸ ve yoˬ. Chi hkʼe te ve kʼo, hteˇ ve cawˇ ve teˇ ceuˬ hta‸ yawˇ hui shiˍ hpeh‸ tuˬ, yawˇ hui venˇbaˆ dawˇ hpfuhˆ tuˬ Gʼuiˬsha te piˇ tuˬ leh naˍ, maˇ shiˍ.

26Chi hkʼoˆ ka‸, neˇhaiˬ ve a loˍ hta‸ te tuˬ awˬ pon yawˇ hui hta‸ neˇhaiˬ hpeh yuˬ peuˬ hkʼaw‸ nawˉ, yawˇ ve va awˬ hkʼaw lo yawˇ hui gʼa ponˬ tuˬ yoˬ.

← Chapter 1 Jump to: Chapter 3 →