2 Timothy 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Awˬ leh meuˇ ve awˬ nyi awˬ haˉ teˇ hpaˍ awˬ hkʼaw lo haˍ jaˇ ve awˬ yanˇ gaˬ la tuˬ yoˬ teh‸ shiˍ taˍ-o‸.

2Awˬ lawn kʼo, chaw teˇ hpaˍ lehˬ, a shu yawˇ awˬ to hta‸ ha‸ ve chaw, hpu hta‸ sheˉ lai ve chaw, caˆ muiˬ puiˉ ve chaw, nyi ma uiˍ ve chaw, maˇ shawˍ maˇ caˆ kʼoˆ ve chaw, awˬ pa awˬ e hkawˇ hta‸ maˇ na yuˬ ve chaw, shu ve awˬ bon hta‸ maˇ shiˍ puiˉ ve chaw, maˇ da‸ maˇ kehˬ ve chaw,

3shu hta‸ maˇ ha‸ puiˉ ve chaw, shu ve venˇbaˆ hta‸ maˇ hpehˇ piˇ puiˉ ve chaw, shu hta‸ hkʼaiˉ puiˉ ve chaw, a shu yawˇ awˬ to hta‸ maˇ gʼaˇ puiˉ ve chaw, haiˬ jaˇ ve chaw leh, da‸ ve hta‸ canˇ ve chaw hpeh‸ tuˬ yoˬ.

4Yawˇ hui lehˬ, shu hta‸ chiˇ a‸ piˇ puiˉ ve chaw, shu shaˍ ti‸ piˇ ve tawˇ hkawˇ hta‸ maˇ na yuˬ puiˉ ve chaw, nyi ma uiˍ jaˇ ve chaw leh, Gʼuiˬsha hta‸ maˇ ha‸ leh miˬguiˬ ha lehˬ tuˬ teˇ hpaˍ hta‸ ha‸ ve chaw hpeh‸ tuˬ yoˬ.

5Yawˇ hui lehˬ, Gʼuiˬsha hta‸ yawˆ yan ve hta‸ caˉ da‸ ve awˬ liˇ awˬ hkʼaˇ teˇ hpaˍ hta‸ te ve htawˇ, oˇ ve hta‸ caˉ da‸ ve kanˇ paˆ hta‸ yawˇ hui chiˇ baˬ ve chaw hpeh‸ ve yoˬ. Chi hkʼe ve chaw teˇ hpaˍ hta‸ jaw kʼai-o.

6Yawˇ hui awˬ hkʼaw lo chaw teˇ hpaˍ hpaˍ lehˬ, shu ve yehˬ awˬ hkʼaw lo lo‸-e leh, cuˇ yiˍ maˇ cawˬ ve yaˇ miˇ teˇ hpaˍ hta‸ maˍ gʼa ve yoˬ. Yaˇ miˇ oˇ ve teˇ hpaˍ lehˬ, venˇ baˆ maˇ maˇ pfuhˇ taˍ leh, awˬ suhˍ awˬ shaˍ sheˉ lai ve laiˉ ceuˬ yawˇ hui hta‸ sheh kʼai chehˇ ve yoˬ.

7Yawˇ hui lehˬ, hkʼaˬ htaˆ ka‸ shu maˍ ve hkawˇ hta‸ na chehˇ ve ka‸, awˬ tehˬ awˬ na ve tawˇ hkawˇ hta‸ maˇ shiˍ la puiˉ.

8Yaˍneˍ leh Yaˍbeˍ hui Moˉseˍ hta‸ tawˍ taˍ ve hkʼe, chaw oˇ ve teˇ hpaˍ htawˇ awˬ tehˬ awˬ na ve tawˇ hkawˇ hta‸ tawˍ taˍ ve yoˬ. Yawˇ hui dawˇ nyi puiˉ ve teˇ ceuˬ luˬ kʼai peuˬ leh, yawˇ hui yonˍ ve teˇ ceuˬ lehˬ, awˬ tehˬ awˬ na yonˍ ve teˇ ceuˬ hpeh‸ ve maˇ heˆ.

9Yawˇ hui lehˬ, awˬ gʼuˇ suhˍ kʼai maˇ gʼa. Awˬ lawn kʼo, chaw oˇ ve nyiˇ gʼaˇ cuˇ yiˍ maˇ cawˬ ve awˬ lawn hkʼa tawˍ lehˆ tawˆ la ve hkʼe, chaw chi teˇ hpaˍ cuˇ yiˍ maˇ cawˬ ve awˬ lawn htawˇ, chaw hkʼa peu-eˬ mehˆ gʼuˇ suhˍ hkʼa tawˍ lehˆ tawˆ la tuˬ yoˬ.

10Ngaˬ maˍ piˇ ve, ngaˬ te ve, ngaˬ dawˇ law taˍ ve, ngaˬ yonˍ ve, ngaˬ dawˇ zuhˬ gaˇ zuhˬ ve, ngaˬ ha‸ pehnˇ ve leh ngaˬ nyi ma yeˬ ve, chi teˇ hpaˍ hta‸ nawˬ gʼa mawˬ gʼa shiˍ taˍ peuˬ.

11Anˍtiˆawˍ venˇ, Iˇkawˇniˆ venˇ leh Luˇtaˍraˆ venˇ teˇ hpaˍ awˬ hkʼaw lo shu fawˉ mehˍ laˇ ve hta‸ ngaˬ gʼa hkanˍ ve hkʼe, fawˉ ve mehˍ ve leh tu‸ ve hkanˍ ve hta‸ ngaˬ hkʼaˬ hkʼe gʼa hkanˍ ve hta‸ htawˇ nawˬ gʼa mawˬ gʼa shiˍ taˍ peuˬ. Oˇ ve hkʼa peu-eˬ awˬ hkʼaw lo Jawˇmawˇ Yeˍsuˆ ngaˬ hta‸ ponˬ laˇ peuˬ ve yoˬ.

12Awˬ tehˬ awˬ na kʼoˆ ve kʼo, Yeˍsuˆ Hkri‸ awˬ hkʼaw lo Gʼuiˬsha hta‸ yawˆ yan gaˇ ve chaw hkʼa peu-eˬ lehˬ, fawˉ ve mehˍ ve hta‸ gʼa hkanˍ tuˬ yoˬ.

13Haiˍ ve chaw leh heˍ puiˉ ve chaw teˇ hpaˍ lehˬ, shaˬ te shaˬ haiˬ la tuˬ yoˬ. Yawˇ hui shu hta‸ heˍ leh, shu htawˇ yawˇ hui hta‸ kʼaw‸ heˍ piˇ tuˬ yoˬ.

14Nawˬ lehˬ, nawˬ gʼa henˇ leh hkʼa deh‸ gʼa yonˍ taˍ ve teˇ hpaˍ hta‸ yeˬ chaweh vawˆ taˍ-o‸. Nawˬ a shu geh gʼa henˇ taˍ peuˬ ve hta‸ nawˬ shiˍ taˍ ve yoˬ.

15Chi hkʼoˆ ka‸, nawˬ yaˇ ehˉ hpeh‸ htaˇ ka‸ da‸ ve kehˬ ve Li‸ hpu hta‸ htawˇ nawˬ shiˍ taˍ ve yoˬ. Li‸ hpu oˇ ve lehˬ, Yeˍsuˆ Hkri‸ hta‸ yonˍ ve awˬ hkʼaw lo nawˬ htaiˍ hkʼaw‸ ve hta‸ gʼa tuˬ cuˇ yiˍ pe‸ laˇ hpeh‸ ve yoˬ.

16Li‸ hpu hkʼa peu-eˬ lehˬ, Gʼuiˬsha ve Awˬ ha hpu dawˇ pawnˍ piˇ ve hta‸ pa taw cawˬ la ve yoˬ.

17Gʼuiˬsha ve chaw lehˬ, hkʼaˬ hkʼe te leh biˇ ve chaw leh, da‸ ve kanˉ teˇ ceuˬ le le awˬ pon gu taˍ ve chaw hpeh‸ la tuˬ, Li‸ hpu lehˬ maˍ piˇ ve, venˇbaˆ hpeu‸ maˍ piˇ ve, kʼaw‸ da‸ la piˇ ve leh, hteˇ ve cawˇ ve hta‸ te tuˬ maˍ piˇ ve yoˬ. Chi hkʼa peu-eˬ awˬ pon Li‸ hpu lehˬ awˬ bon cawˬ ve yoˬ.

← Chapter 2 Jump to: Chapter 4 →