2 Timothy 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to:

1Gʼuiˬsha mehˆ gʼuˇ suhˍ maˇ kʼoˆ, te‸ chehˇ ve chaw hui leh suh peuˬ ve chaw hui hta‸ suhˉ jehˬ tuˬ ve Yeˍsuˆ Hkri‸ mehˆ gʼuˇ suhˍ maˇ kʼoˆ, yawˇ kʼaw‸ tawˆ la tuˬ ve leh yawˇ uˉ peunˍ tuˬ ve hta‸ ngaˬ cuˇ leh nawˬ hta‸ tawˇ chi hkʼe pe‸ laˇ ve yoˬ.

2Bon hkawˇ hkʼa deh‸ maˍ piˇ-oˆ. Awˬ yanˇ cawˇ ve maˇ kʼoˆ, maˇ cawˇ ve maˇ kʼoˆ, gʼaˇ hte‸ te-o. Deˇ maˍ piˇ leh shaˍ ti‸ piˇ-oˆ. Dawˇ zuhˬ gaˇ zuhˬ ve leh maˍ piˇ ve awˬ hkʼaw lo awˬ gʼaˇ piˇ-oˆ.

3Awˬ lawn kʼo, chaw yaˇ hui lehˬ, hteˇ ve cawˇ ve maˍ piˇ ve tawˇ hkawˇ hta‸ maˇ na yuˬ ve awˬ yanˇ gaˬ la tuˬ yoˬ. Yawˇ hui lehˬ, aˬ hto‸ ma teˇ ceuˬ awˬ lawn ka‸ kaˇ gaˇ puiˉ leh, a shu yawˇ nyi ma cawˇ ve hkʼe maˍ laˇ ve saˍ la‸ maˇ chaweh hta‸ yawˇ hui geh chehˇ piˇ lawˬ tuˬ yoˬ.

4Hteˇ ve cawˇ ve tawˇ hkawˇ hta‸ maˇ gʼa na tuˬ yawˇ hui hpfuhˆ kʼai leh, kaˇ puiˇ kaˇ lao hkawˇ hta‸ na leh awˬ hkʼaˇ suh kʼai tuˬ yoˬ.

5Nawˬ lehˬ, teˇ ceuˬ le le awˬ hkʼaw lo nyi ma taˍ puiˉ ve chaw hpeh‸ leh shaˍ ti‸ taˍ-o‸. Tu‸ ve hkanˍ ve hta‸ hkanˍ chehˇ-oˆ. Ha lehˬ ve bon hkawˇ maˍ ve kanˉ hta‸ te chehˇ-oˆ. Nawˬ te chehˇ ve kanˉ hta‸ biˇ la htaˇ hkʼa gaˬ te-o.

6Awˬ lawn kʼo, chi beu‸ ka‸ tanˇ tuˬ hkʼe tanˇ piˇ chehˇ ve hta‸ ngaˬ gʼa hkanˍ leh, ngaˬ gʼa kʼo‸-e ve awˬ yanˇ gaˬ la paˇ neˇ ve yoˬ.

7Da‸ jaˇ ve bawˆ da‸ tuˬ hta‸ ngaˬ bawˆ da‸ peuˬ. Gʼuiˇ da‸ ve teˇ ceuˬ hta‸ awˬ leh hkʼa gaˬ ngaˬ gʼuiˇ peuˬ. Yonˍ ve teˇ ceuˬ hta‸ ngaˬ hkʼa deh‸ vawˆ taˍ peuˬ.

8Chi beu‸ lehˬ, hteˇ ve cawˇ ve shi uˉ tcuhˍ ngaˬ awˬ pon ha‸ shaˉ taˍ ve yoˬ. Awˬ nyi oˇ ve awˬ hkʼaw lo hteˇ ve cawˇ ve suhˉ jehˬ shehˍ hpaˇ Jawˇmawˇ Yeˍsuˆ lehˬ, shi uˉ tcuhˍ oˇ ve ngaˬ hta‸ pe‸ laˇ tuˬ yoˬ. Ngaˬ hta‸ ceh tiˉ maˇ heˆ. Yawˇ kʼaw‸ tawˆ la tuˬ ve hta‸ dawˇ law chehˇ ve chaw hkʼa peu-eˬ hta‸ htawˇ yawˇ piˇ tuˬ yoˬ.

9Nawˬ ngaˬ geh haˆ haˆ laˬ hpeh‸ tuˬ coˇ caˇ-oˆ.

10Awˬ lawn kʼo, Deˍmaˆ lehˬ chi miˬguiˬ hta‸ ha‸ ve pa taw, ngaˬ hta‸ baˬ taˉ leh, Hteˇsaˍlawˇniˆ venˇ lo kʼai peuˬ. Kaˍreˍkeˍ lehˬ, Gaˍlaˍtiˆ mvuhˇ miˬ lo kʼai leh, Tiˇtuˆ lehˬ Daˍlaˍmaˍtiˆ mvuhˇmiˬ lo kʼai peuˬ.

11Luˉka‸ teˇ gʼa ceh tiˉ ngaˬ geh chehˇ taˍ ve yoˬ. Nawˬ laˬ ve teˇ yanˇ, Maˍkuˆ hta‸ ka‸ shiˍ veu laˇ-oˆ. Awˬ lawn kʼo, kanˉ te ve awˬ hkʼaw lo yawˇ ngaˬ hta‸ hkʼa deh‸ ga laˇ hpeh‸ ve yoˬ.

12Tuˇhkiˆ hta‸ Eˇfeˇsu‸ venˇ lo ngaˬ kʼai tcuh peuˬ.

13Nawˬ laˬ ve teˇ yanˇ, Taˍroˇaˆ venˇ hkʼaw lo Kaˍpuˆ geh ngaˬ teh taˉ ve aˉ po‸ zuhˬ ma hta‸ maˇ kʼoˆ, li‸ teˇ hpaˍ hta‸ htawˇ maˇ kʼoˆ, leuˉ leh shaˍ guiˬ kʼuˉ hta‸ bvuh‸ taˍ ve li‸ teˇ hpaˍ hta‸ maˇ kʼoˆ, yuˬ veu laˇ-oˆ.

14Ca liˉ paˍ Aˍleˍsaˍduˆ lehˬ, ngaˬ hta‸ haˍ tuˬ laiˉ ceuˬ te laˇ peuˬ. Yawˇ te ve kanˉ teˇ hpaˍ hta‸ keunˍ da‸ ve hkʼe Jawˇmawˇ Yeˍsuˆ yawˇ hta‸ kʼaw‸ te hkʼaw‸ piˇ tuˬ yoˬ.

15Nawˬ htawˇ yawˇ hta‸ shaˍ ti‸ te-o. Awˬ lawn kʼo, ngaˬ maˍ ve tawˇ hkawˇ hta‸ yawˇ gʼaˇ hte‸ tawˍ taˍ ve yoˬ.

16Ngaˬ awˬ to awˬ pon ngaˬ awˉ lawˉ teˇ pawˆ gʼa yaw hkʼaw‸ ve teˇ yanˇ, chaw teˇ gʼaˇ ka‸ ngaˬ hpawˇ lo maˇ chehˇ. Chaw hkʼa peu-eˬ ngaˬ hta‸ baˬ taˉ ve yoˬ. Yawˇ hui awˬ hkʼoˆ hta‸ venˇbaˆ taˇ taˍ piˇ lawˬ.

17Chaw hkʼa peu-eˬ ngaˬ hta‸ baˬ taˉ ve htawˇ, ngaˬ lehˬ bon hkawˇ hkʼa biˇ maˍ piˇ leh, buiˇshaˆaˉnaˆ chaw hkʼa peu-eˬ gʼa kaˇ tuˬ, Jawˇmawˇ Yeˍsuˆ ngaˬ geh chehˇ leh awˬ gʼaˇ pe‸ laˇ ve yoˬ. Hkʼe te leh, laˇ caˬ shiˉ ve maw‸ kʼaw awˬ hkʼaw lo ngaˬ hta‸ ponˬ laˇ ve yoˬ.

18Jawˇmawˇ Yeˍsuˆ lehˬ, haiˬ ve hkʼa peu-eˬ awˬ hkʼaw lo ngaˬ hta‸ ponˬ laˇ tuˬ ve awˬ hkʼoˆ ka‸, yawˇ ve mvuhˇ naw ma mvuhˇ miˬ hkʼa gaˬ ngaˬ hta‸ htaiˍ hkʼaw‸ laˇ tuˬ yoˬ. Yawˇ hta‸ co co taiˍ taiˍ chiˇ uiˍ chiˇ mvuh piˇ-oˆ. A men.

19Piˇkiˇlaˆ leh Aˍkuˉlaˆ hta‸ maˇ kʼoˆ, Awˇneˍsiˉhpawˍ ve yehˬ yaˇ kʼa yaˇ hui hta‸ maˇ kʼoˆ, ngaˬ dawˇ nawˇ chehˇ ve yoˬ teh‸ yawˇ hui hta‸ hto piˇ-oˆ.

20Eˇraˍtuˆ lehˬ, Kawˇrenˍhtuˆ venˇ lo chehˇ taˉ ve yoˬ. Taˍroˆhpeˍ teˇ gʼaˇ naˬ leh, ngaˬ yawˇ hta‸ Meˍleˍtuˆ venˇ hkʼaw lo teh taˉ ve yoˬ.

21Mvuhˇ kaˆ yanˇ maˇ gaˬ sheˍ htaˇ nawˬ haˆ haˆ gaˬ la tuˬ coˇ caˇ-oˆ. Uˇbuˇluˆ, Puˇdeˍ, Liˇnuˆ, Kaˍlawˉduˆ leh awˬ viˉ awˬ nyi hkʼa peu-eˬ nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.

22Jawˇmawˇ Gʼuiˬsha lehˬ, nawˬ ve nyi ma awˬ hkʼaw lo chehˇ piˇ-oˆ. Awˬ bon awˬ shinˉ ka‸ nawˬ geh cawˬ piˇ-oˆ.

← Chapter 3 Jump to: