Acts 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Buiˇ shaˆ aˉ naˆ chaw hui htawˇ Gʼuiˬsha ve tawˇ hkawˇ hta‸ ha‸ yuˬ ve awˬ lawn hta‸ Yuˇda‸ mvuhˇmiˬ hkʼaw lo chehˇ ve tcuh yaˇ hui leh awˬ viˉ awˬ nyi teˇ hpaˍ gʼa kaˇ ve yoˬ.

2Hkʼe te leh, Peˍtruˆ Yeˍruˆsaˍlehnˍ venˇ lo taˆ-e htaˇ, awˬ guiˬ meuˇ shoˍ ve chaw teˇ hpaˍ yawˇ hta‸ kʼoˆ piˇ ve,

3Nawˬ lehˬ awˬ guiˬ meuˇ maˇ shoˍ ve chaw hui ve yehˬ hkʼaw lo‸-e leh yawˇ hui geh caˇ ve dawˬ ve law leˇ teh‸, yawˇ hta‸ deˇ piˇ ve yoˬ.

4Oˇ htaˇ, Peˍtruˆ yawˇ hui hta‸ awˬ hkuiˉ puiˍ te leh awˬ leh meuˇ hkʼa gaˬ awˬ lawn teˇ ceuˬ peuˬ teˇ ceuˬ kʼaoˍ maˍ piˇ leh kʼoˆ ve,

5Ngaˬ lehˬ Yuˇpeˍ venˇ awˬ hkʼaw lo bon lawˬ chehˇ htaˇ, aˉ boˆ lonˉ hkʼa shuˍ shuˍ ve teˇ maˬ lehˬ, awˬ ceˍ awˇ ceˍ hta‸ hpeh taˍ leh, mvuhˇ naw ma lo te leh ngaˬ geh hkʼa gaˬ hpehˇ ya‸ la ve hta‸, zuh‸ maˆ mawˬ ve hkʼe awˬ ha awˬ hkʼaw lo ngaˬ gʼa mawˬ ve yoˬ.

6Oˇ ve hta‸ ngaˬ hkʼa deh‸ nyi htaˇ, miˬ guiˬ hkʼoˆ lo hkui sheh la‸ sheh awˍ lehˇ cawˬ ve to nuˇ to shaˆ awˬ ceuˬ, loˇ kʼai gaˆ kʼai puiˉ ve awˬ ceuˬ leh mvuhˇ hpe lo poˬ ve ngaˆ awˬ ceuˬ teˇ hpaˍ hta‸ ngaˬ gʼa mawˬ ve yoˬ.

7Oˇ htaˇ, Peˍtruˆ-oˬ, tu leh tiˇ caˇ-oˆ teh‸ kʼoˆ laˇ ve awˬ hkawˇ hta‸ ngaˬ gʼa kaˇ ve yoˬ.

8Ya‸ hkʼaˇ ngaˬ kʼaw‸ kʼoˆ piˇ ve, Jawˇ mawˇ-oˬ, maˇ hpeh‸ taˬ. Awˬ lawn kʼo, cha‸ chiˆ leh maˇ da‸ maˇ kehˬ ve awˬ ceuˬ ngaˬ ve maw‸ kʼaw awˬ hkʼaw lo teˇ pawˆ ka‸ maˇ lo‸ la jaw teh‸ kʼoˆ piˇ ve yoˬ.

9Mvuhˇ naw ma lo awˬ hkawˇ teˇ pawˆ kʼaw‸ bvuhˬ la leh, Gʼuiˬsha da‸ piˇ kehˬ piˇ peuˬ ve awˬ ceuˬ hta‸ cha‸ chiˆ ve taˇ kʼoˆ teh‸ ngaˬ hta‸ kʼaw‸ kʼoˆ laˇ ve yoˬ.

10Chi hkʼe shehˆ pawˆ hpeh‸ peuˬ leh, oˇ ve hkʼa peu-eˬ hta‸ mvuhˇ naw ma lo kʼaw‸ gʼawˬ taˆ-e ve yoˬ.

11Oˇ teˇ hkui awˬ hkʼaw lo, Kehˉsaˍriˆ venˇ lo ngaˬ geh tcuh peu laˇ ve chaw shehˆ gʼaˇ ngaˬ hui chehˇ taˍ ve yehˬ awˬ paˇ lo gaˬ la ve yoˬ.

12Nyi ma htawˇdawˇnawˬdawˇ maˇ te leh yawˇ hui geh kʼai loˬ teh‸, Awˬ ha hpu ngaˬ hta‸ kʼoˆ laˇ ve yoˬ. Awˬ viˉ awˬ nyi chi hkaw‸ gʼaˇ htawˇ ngaˬ geh kʼai leh, chaw oˇ ve teˇ gʼaˇ ve yehˬ awˬ hkʼaw lo ngaˬ hui lo‸-e ve yoˬ.

13Chaw oˇ ve lehˬ, mvuhˇ naw ma tcuh yaˇ teˇ gʼaˇ yawˇ ve aˉ hkʼaw lo tu huˉ chehˇ ve hta‸ yawˇ gʼa mawˬ ve awˬ lawn ngaˬ hui hta‸ hto laˇ ve yoˬ. Mvuhˇ naw ma tcuh yaˇ yawˇ hta‸ kʼoˆ piˇ ve, Yuˇpeˍ venˇ lo chaw hta‸ kʼai tcuh leh, Peˍtruˆ teh‸ kʼoˆ ve Siˉmonˍ meh ve teˇ gʼaˇ hta‸ ca kuˬ tcuh-o.

14Nawˬ leh nawˬ ve yehˬ yaˇ kʼa yaˇ hkʼa peu-eˬ hkʼaˬ hkʼe te leh htaiˍ hkʼaw‸ ve hta‸ gʼa tuˬ, yawˇ nawˬ hui hta‸ hto laˇ tuˬ yoˬ teh‸, mvuhˇ naw ma tcuh yaˇ yawˇ hta‸ kʼoˆ piˇ ve awˬ lawn htawˇ, ngaˬ hui hta‸ kʼaw‸ hto laˇ ve yoˬ.

15Ngaˬ awˬ hkuiˉ puiˍ tanˬ maˍ piˇ chehˇ htaˇ ka‸, awˉ lawˉ htaˇ da‸ ve kehˬ ve Awˬ ha hpu ngaˬ hui awˬ hkʼoˆ hta‸ ya‸ la ve hkʼa shuˍ shuˍ, yawˇ hui awˬ hkʼoˆ hta‸ htawˇ ya‸ la ve yoˬ.

16Oˇ htaˇ, Jawˇmawˇ Yeˍsuˆ kʼoˆ laˇ ve tawˇ chi teˇ hkawˇ hta‸ ngaˬ dawˇ nawˇ ve yoˬ. Yoˇhanˬ lehˬ iˉ kaˆ awˬ hkʼaw lo baˆtiˆsaˬ piˇ ve yoˬ. Ya‸ hkʼaˇ, nawˬ hui lehˬ da‸ ve kehˬ ve Awˬ ha hpu awˬ hkʼaw lo baˆtiˆsaˬ gʼa hkanˍ yuˬ tuˬ yoˬ teh‸ yawˇ kʼoˆ ve yoˬ.

17Hkʼe te leh, Jawˇmawˇ Yeˍsuˆ Hkri‸ hta‸ ngaˬ hui yonˍ ve teˇ yanˇ, Gʼuiˬsha ngaˬ hui hta‸ la‸ shawnˍ pe‸ laˇ ve hkʼa shuˍ shuˍ yawˇ hui hta‸ htawˇ piˇ ve kʼo, ngaˬ hkʼaˬ hkʼe ve chaw hpeh‸ leh Gʼuiˬsha hta‸ tawˍ taˍ tuˬ le teh‸, Peˍtruˆ kʼoˆ piˇ ve yoˬ.

18Awˬ lawn chi hta‸ yawˇ hui gʼa kaˇ htaˇ, yawˇ hui te‸ chiˉ maˇ kʼaw‸ kʼoˆ. Yawˇ hui Gʼuiˬsha hta‸ chiˇ uiˍ chiˇ mvuh leh kʼoˆ ve, Hkʼe te kʼo, buiˇshaˆaˉnaˆ chaw hui htawˇ co ha gʼa te‸ tuˬ, Gʼuiˬsha lehˬ yawˇ hui hta‸ venˇbaˆ dawˇ hpfuhˆ hpeh‸ tuˬ a hkaw-anˬ piˇ ve yoˬ teh‸ kʼoˆ ve yoˬ.

19Oˇ htaˇ, Saˍteˍhpanˍ hta‸ tanˬ leh fawˉ mehˍ ve teˇ ceuˬ hta‸ gʼa hkanˍ ve pa taw, hpaˆ da‸ guiˇ da‸ ve chaw teˇ hpaˍ lehˬ, Hpiˇniˆ mvuhˇmiˬ, Kuˇpaˍruˆ conˇ leh Anˍtiˆawˍ venˇ hkʼa gaˬ kʼai ve awˬ hkʼaw lo, Yuˇda‸ chaw hui hta‸ ceh tiˉ yawˇ hui bon hkawˇ maˍ piˇ ve yoˬ.

20Ya‸ hkʼaˇ, yawˇ hui teˇ hpaˍ hpaˍ lehˬ, Anˍtiˆawˍ venˇ lo gaˬ la htaˇ, Heˍlaˍsaˆ chaw hui hta‸ htawˇ, Jawˇmawˇ Yeˍsuˆ awˬ lawn ha lehˬ ve bon hkawˇ maˍ piˇ ve yoˬ. Oˇ hkʼe maˍ piˇ ve chaw teˇ hpaˍ lehˬ, Kuˇpaˍruˆ conˇ chaw leh Kuˇreˍneˍ mvuhˇmiˬ chaw teˇ hpaˍ hpeh‸ ve yoˬ.

21Jawˇmawˇ Gʼuiˬsha ve kanˇ paˆ yawˇ hui geh cawˬ ve pa taw, chaw maˇ maˇ yonˍ la leh Jawˇmawˇ Yeˍsuˆ geh hpfuhˆ kʼaw‸ la ve yoˬ.

22Awˬ lawn chi hta‸ Yeˍruˆsaˍlehnˍ venˇ awˬ hkʼaw chehˇ ve Hkri‸ yaˇ awˬ moˍ gʼa kaˇ leh, yawˇ hui Baˍnaˍbaˆ hta‸ Anˍtiˆawˍ venˇ lo kʼai tcuh ve yoˬ.

23Yawˇ oˇ kaˬ lo gaˬ leh Gʼuiˬsha ve awˬ bon hta‸ gʼa mawˬ htaˇ ha lehˬ jaˇ ve yoˬ. Yawˇ hui nyi ma yeˬ leh Jawˇmawˇ Yeˍsuˆ hta‸ vawˆ tcuhˉ taˍ tuˬ, yawˇ yawˇ hui hkʼa peu-eˬ hta‸ awˬ gʼaˇ piˇ ve yoˬ.

24Awˬ lawn kʼo, Baˍnaˍbaˆ lehˬ da‸ ve chaw hpeh‸ leh, da‸ ve kehˬ ve Awˬ ha hpu maˇ kʼoˆ, yonˍ ve teˇ ceuˬ maˇ kʼoˆ, hkʼa biˇ cawˬ ve chaw hpeh‸ ve yoˬ. Oˇ htaˇ, chaw maˇ maˇ Jawˇmawˇ Yeˍsuˆ hta‸ kʼaw‸ pawnˇ da‸ la ve yoˬ.

25Baˍnaˍbaˆ lehˬ, Sawˉlu‸ hta‸ ca tuˬ, Taˍsuˆ venˇ lo kʼai ve yoˬ.

26Yawˇ hta‸ gʼa mawˬ htaˇ, Anˍtiˆawˍ venˇ lo shiˍ laˬ ve yoˬ. Yawˇ huiˉ maˬ lehˬ, teˇ hkʼaw‸ hkʼa zuh Hkri‸ yaˇ awˬ moˍ geh hpawnˬ da‸ leh, chaw awˬ moˍ lonˉ hta‸ maˍ piˇ ve yoˬ. Awˬ la‸ gʼawˇ teˇ hpaˍ hta‸ Hkri‸ yaˇ teh‸ kʼoˆ ve awˬ meh lehˬ, Anˍtiˆawˍ venˇ lo awˉ lawˉ kʼoˆ tawˆ la ve yoˬ.

27Awˬ nyi awˬ haˉ oˇ ve teˇ hpaˍ awˬ hkʼaw lo, Gʼuiˬsha ve tcuh kaˍ paˍ teˇ hpaˍ hpaˍ Yeˍruˆsaˍlehnˍ venˇ lo tu la leh Anˍtiˆawˍ venˇ lo laˬ ve yoˬ.

28Yawˇ hui awˬ hkʼaw lo Aˍgaˍbuˆ meh ve chaw teˇ gʼaˇ tu leh, Miˬguiˬ hkʼa peu-eˬ awˬ hkʼaw lo meu‸ lonˉ kaˆ lonˉ hpeh‸ la tuˬ yoˬ teh‸, Awˬ ha hpu hta‸ cuˇ leh hto piˇ ve yoˬ. Meu‸ ve kaˆ ve oˇ ve lehˬ, jawˇmawˇ Kaˍlawˇdiˆ ve awˬ co-e htaˇ hpeh‸ la ve yoˬ.

29Hkʼe te leh, awˬ la‸ gʼawˇ teˇ hpaˍ lehˬ, teˇ gʼaˇ le le a shu yawˇ puiˉ ve hpeh‸ ve hkʼe, Yuˇda‸ mvuhˇmiˬ awˬ hkʼaw lo chehˇ ve awˬ viˉ awˬ nyi teˇ hpaˍ hta‸ ga piˇ tuˬ dawˇ cheˆ taˍ ve yoˬ.

30Yawˇ hui dawˇ cheˆ taˍ ve hkʼe te peuˬ leh, Baˍnaˍbaˆ leh Sawˉlu‸ la‸ sheh hkʼaw lo awˬ hoˉ chaw mawˇ teˇ hpaˍ hta‸ feu piˇ ve yoˬ.

← Chapter 10 Jump to: Chapter 12 →