Acts 24

Lahu Bible Edited © Thailand Bible Society and Bible Society of Myanmar, 2010, 2020.

← Chapter 23 Jump to: Chapter 25 →

1Awˬ hkʼaw‸ nawˉ ngaˇ nyi gaˬ ve teˇ yanˇ, paw hkuˇ lonˉ Aˍnaˍniˆ geh awˬ hoˉ chaw mawˇ teˇ hpaˍ hpaˍ leh Teˍraˍtuˇluˆ meh ve tawˇ yaw puiˉ shehˍ hpaˇ teˇ gʼaˇ teˇ geh oˇ kaˬ lo laˬ ve yoˬ. Yawˇ hui lehˬ, mvuhˇmiˬ jawˇmawˇ lonˉ mehˆ gʼuˇ suhˍ Pawˇlu‸ hta‸ venˇbaˆ taˍ leh yawˇ ve awˬ lawn kʼoˆ piˇ ve yoˬ.

2Pawˇlu‸ hta‸ jawˇmawˇ kuˬ teh taˍ peuˬ ve teˇ yanˇ, Teˍraˍtuˇluˆ yawˇ awˬ hkʼoˆ venˇbaˆ taˍ leh kʼoˆ ve, Awˬ me‸ awˬ hponˇ uiˍ ve jawˇmawˇ Hpeˍliˆ-oˬ, nawˬ hta‸ pa taw ngaˬ hui dawˇ sha gaˇ sha jaˇ ve awˬ hkʼaw lo gʼa chehˇ leh, nawˬ ve cuˇ yiˍ hta‸ pa taw chaw ceuˬ chi awˬ pon awˬ liˇ teˇ hpaˍ da‸ la tuˬ nawˬ te ve yoˬ.

3Chi hta‸ pa taw, teˇ ceuˬ le le awˬ hkʼaw lo, teˇ kaˬ le le ngaˬ hui nawˬ ve awˬ bon hta‸ chiˇ mvuh leh ha‸ yuˬ ve yoˬ.

4Ya‸ hkʼaˇ, ngaˬ nawˬ hta‸ maw chaweh maˇ gʼa sho‸ sha‸ tuˬ, yeunˇ hkanˍ leh ngaˬ hui kʼoˆ tuˬ ve tawˇ teˇ nyiˇ hkawˇ hta‸ a ciˉ na laˇ sheˍ teh‸ ngaˬ nawˬ hta‸ lawˬ hkawˉ ve yoˬ.

5Chaw chi hpaˇ lehˬ, haiˬ jaˇ ve chaw hpeh‸ leh, miˬguiˬ hkʼoˆ teˇ kaˬ le le Yuˇda‸ chaw hui hkʼa peu-eˬ hpfuhˆ kʼai tuˬ ca juˆ shehˍ hpaˇ hpeh‸ ve yoˬ. Shu hta‸ hpaˆ da‸ kʼai ve Naˍzaˍrehˆ awˬ moˍ awˬ hkʼaw lo htawˇ, yawˇ lehˬ awˬ hoˉ teˇ gʼaˇ hpeh‸ ve yoˬ.

6Chi hkʼoˆ ka‸, bon yehˬ lonˉ hta‸ cha‸ chiˆ tuˬ yawˇ coˇ caˇ chehˇ ve hta‸ ngaˬ hui shiˍ leh yawˇ hta‸ hpeh yuˬ ve yoˬ.

8Nawˬ awˬ to yawˇ hta‸ hkʼa deh‸ na nyi ve kʼo, ngaˬ hui yawˇ awˬ hkʼoˆ venˇbaˆ taˍ ve awˬ ceuˬ hkʼa peu-eˬ hta‸ nawˬ gʼa shiˍ tuˬ yoˬ teh‸, Teˍraˍtuˇluˆ kʼoˆ piˇ ve yoˬ.

9Yuˇda‸ chaw teˇ hpaˍ htawˇ, Yawˇ kʼoˆ ve hkʼe cawˇ ve yoˬ teh‸ kʼoˆ leh venˇbaˆ ga hpoˆ taˍ ve yoˬ.

10Mvuhˇmiˬ jawˇmawˇ lonˉ lehˬ, Pawˇlu‸ tawˇ yaw tuˬ awˬ heˆ te maˍ piˇ ve teˇ yanˇ, Pawˇlu‸ kʼoˆ piˇ ve, Nawˬ laiˉ hkʼaw‸ chaw ceuˬ chi awˬ hkʼoˆ suhˉ jehˬ shehˍ hpaˇ te jaw ve hta‸ ngaˬ shiˍ ve pa taw, ngaˬ ve awˬ lawn ha lehˬ ha kʼa yaw hkʼaw‸ laˇ ve yoˬ.

11Oˉ kʼoˍ pui tuˬ ngaˬ Yeˍruˆsaˍlehnˍ venˇ lo kʼai ve, teˇ chi nyiˇ nyi awˬ hkʼoˆ maˇ gaˬ sheˍ ve hta‸ nawˬ shiˍ hpeh‸ ve yoˬ.

12Bon yehˬ lonˉ awˬ hkʼaw lo maˇ kʼoˆ, bon yehˬ teˇ hpaˍ awˬ hkʼaw lo maˇ kʼoˆ, venˇ awˬ hkʼaw lo maˇ kʼoˆ, chaw teˇ gʼaˇ hta‸ ka‸ ngaˬ tawˇ gʼawˬ da‸ leh chaw awˬ moˍ lonˉ hta‸ duiˆ-ehˍ shaˇ-ehˍ te piˇ lawˬ ve hta‸ yawˇ hui maˇ mawˬ.

13Chi beu‸ ngaˬ awˬ hkʼoˆ yawˇ hui venˇbaˆ taˍ ve awˬ lawn, nawˬ hta‸ yuˬ maˍ piˇ tuˬ yawˇ hui shaˉ hkiˆ maˇ cawˬ.

14Ya‸ hkʼaˇ, ngaˬ lehˬ nawˬ hta‸ chi hkʼe hteˇ lehˍ hto laˇ ve yoˬ. Shu hta‸ hpaˆ da‸ kʼai ve awˬ moˍ teh‸ yawˇ hui kʼoˆ ve, Ya‸ kʼaw awˬ liˇ chi awˬ hkʼaˇ suh ngaˬ lehˬ ngaˬ hui ve awˬ puˍ awˬ pi hui ve Gʼuiˬsha hta‸ oˉ kʼoˍ pui ve yoˬ. Awˬliˇtawˇhkawˇ li‸ leh tcuh kaˍ paˍ hui ve li‸ awˬ hkʼaw lo hkʼa bvuh‸ taˍ ve hkʼa peu-eˬ hta‸ ngaˬ yonˍ ve yoˬ.

15Hteˇ ve chaw ka‸ maˇ hteˇ ve chaw ka‸ kʼaw‸ te‸ tu la tuˬ yoˬ teh‸ yawˇ hui dawˇ law ve hkʼa shuˍ shuˍ, ngaˬ htawˇ Gʼuiˬsha hta‸ cuˇ leh dawˇ law ve yoˬ.

16Gʼuiˬsha mehˆ gʼuˇ suhˍ maˇ kʼoˆ, chaw yaˇ mehˆ gʼuˇ suhˍ maˇ kʼoˆ, ngaˬ ve shiˍ puiˉ ve nyi ma lehˬ ngaˬ awˬ hkʼoˆ venˇbaˆ taˍ kuiˬ maˇ gʼa cawˬ tuˬ ngaˬ coˇ caˇ leh te chehˇ ve yoˬ.

17Awˬ hkʼaw‸ a ciˉ maw chaweh ponˬ peuˬ hkʼaw‸ nawˉ, ngaˬ ve chaw ceuˬ haˍ yaˇ gʼawˇ yaˇ hta‸ ga piˇ tuˬ ve teˇ hpaˍ leh tanˇ tuˬ teˇ hpaˍ ngaˬ yuˬ laˬ ve yoˬ.

18Ngaˬ chi hkʼe te chehˇ ve teˇ yanˇ, ngaˬ da‸ ve kehˬ ve awˬ liˇ te peuˬ hkʼaw‸ nawˉ, bon yehˬ lonˉ awˬ hkʼaw lo yawˇ hui ngaˬ hta‸ gʼa mawˬ ve yoˬ. Chaw awˬ moˍ lonˉ ngaˬ geh chehˇ ve ka‸ maˇ heˆ. Ngaˬ duiˆ-ehˍ shaˇ-ehˍ te chehˇ ve ka‸ maˇ heˆ. Ya‸ hkʼaˇ, Aˍsiˆ mvuhˇmiˬ lo chehˇ ve Yuˇda‸ chaw teˇ hpaˍ laˬ leh,

19yawˇ hui lehˬ ngaˬ awˬ hkʼoˆ venˇbaˆ teˇ ceuˬ ceuˬ taˍ tuˬ cawˬ ve kʼo, nawˬ mehˆ gʼuˇ suhˍ yawˇ hui laˬ leh kʼoˆ cawˇ ve yoˬ.

20Maˇ heˆ kʼo, jehˬ da‸ shehˍ hpaˇ ve awˬ moˍ mehˆ gʼuˇ suhˍ ngaˬ tu huˉ ve teˇ yanˇ, Suh ve chaw hui kʼaw‸ te‸ tu la ve awˬ lawn hta‸ pa taw ya‸ nyi ngaˬ nawˬ hui mehˆ gʼuˇ suhˍ suhˉ jehˬ ve hta‸ gʼa hkanˍ ve yoˬ teh‸,

21ngaˬ bvuhˬ chaweh kʼoˆ ve tawˇ chi teˇ hkawˇ maˇ heˆ kʼo, ngaˬ awˬ hkʼaw lo ya‸ kuiˬ hkʼaˬ hkʼe cawˬ ve awˬ lawn yawˇ hui hkʼaˇ yawˇ hui kʼoˆ tcuh-o teh‸, Pawˇlu‸ kʼoˆ piˇ ve yoˬ.

22Jawˇmawˇ Hpeˍliˆ lehˬ, Ya‸ kʼaw awˬ liˇ awˬ lawn hta‸ hkʼa cawˇ cawˇ shiˍ ve pa taw, yawˇ awˬ yanˇ jiˆ piˇ leh kʼoˆ ve, Ma‸ teˇ hinˉ poˍ Luˇsiˆ gaˬ la htaˇ, nawˬ hui awˬ lawn ngaˬ jehˬ cheˆ laˇ tuˬ yoˬ teh‸, yawˇ hui hta‸ kʼoˆ piˇ ve yoˬ.

23Pawˇlu‸ hta‸ shaw taˍ tuˬ, jawˇmawˇ Hpeˍliˆ lehˬ ma‸ poˍ teˇ gʼaˇ hta‸ tawˇ piˇ ve yoˬ. Ya‸ hkʼaˇ, yawˇ hta‸ hehnˇ chaweh maˇ te leh, yawˇ loˍ ve hkʼe yawˇ ve awˬ chawˇ teˇ hpaˍ yawˇ hta‸ ga piˇ tuˬ taˇ tawˍ taˍ teh‸ kʼoˆ piˇ ve yoˬ.

24Awˬ hkʼaw‸ nawˉ maˇ maw maw gaˬ leh, jawˇ mawˇ Hpeˍliˆ lehˬ, Duˍsiˆleˍ meh ve yawˇ ve awˬ miˇ ma geh teˇ geh laˬ ve yoˬ. Yawˇ ve awˬ miˇ ma lehˬ, Yuˇda‸ ma yoˬ. Jawˇmawˇ Hpeˍliˆ Pawˇlu‸ hta‸ kuˬ leh, Yeˍsuˆ Hkri‸ hta‸ yonˍ ve awˬ lawn kʼoˆ maˍ laˇ ve hta‸ yawˇ na ve yoˬ.

25Pawˇlu‸ lehˬ, hteˇ ve cawˇ ve awˬ lawn, a shu yawˇ awˬ to hta‸ gʼaˇ ve awˬ lawn leh, awˬ hkʼaw‸ nawˉ gaˬ la tuˬ ve suhˉ jehˬ ve awˬ lawn kʼaoˍ maˍ piˇ ve teˇ yanˇ, jawˇmawˇ Hpeˍliˆ kawˆ leh kʼoˆ ve, Chi beu‸ kʼo‸-e sheˍ. Awˬ hkʼaw‸ nawˉ awˬ yanˇ cawˇ ve teˇ yanˇ, ngaˬ nawˬ hta‸ kʼaw‸ kuˬ tuˬ yoˬ teh‸ kʼoˆ piˇ ve yoˬ.

26Pawˇlu‸ yawˇ hta‸ hpu pe‸ laˇ tuˬ yawˇ dawˇ law ve pa taw, laiˉ pawˆ Pawˇlu‸ hta‸ kuˬ leh na‸ uˉ te da‸ ve yoˬ.

27Nyiˇ hkʼaw‸ biˇ la ve teˇ yanˇ, Hpeˍliˆ jawˇ mawˇ te kuiˬ lo Pawˇkiˆ Hpeˍtuˆ jawˇmawˇ ca te la ve yoˬ. Jawˇmawˇ Hpeˍliˆ lehˬ, Yuˇda‸ chaw hui yawˇ hta‸ nyi ma cawˇ tuˬ heuˆ gaˇ ve pa taw, Pawˇlu‸ hta‸ htawnˍ hkʼaw lo haw taˉ ve yoˬ.

← Chapter 23 Jump to: Chapter 25 →