Acts 28

Lahu Bible Edited © Thailand Bible Society and Bible Society of Myanmar, 2010, 2020.

← Chapter 27 Jump to:

1Ngaˬ hui luˬ ve sheˆ ve hta‸ ponˬ peuˬ hkʼaw‸ nawˉ, conˇ oˇ ve Meˍleˍteˍ kʼoˆ ve hta‸ ngaˬ hui gʼa shiˍ ve yoˬ.

2Conˇ oˇ ve awˬ hkʼaw chehˇ ve chaw teˇ hpaˍ ngaˬ hui hta‸ ha kʼaˉ jaˇ leh hkʼa deh‸ ga laˇ ve yoˬ. Awˬ lawn kʼo, mvuhˇ yeˬ laˬ leh kaˆ ve pa taw, yawˇ hui aˬ miˍ ceh leh ngaˬ hui hta‸ ha‸ yuˬ laˇ ve yoˬ.

3Oˇ htaˇ Pawˇlu‸ lehˬ, suhˆ kʼaˉ ku-iˍ teˇ kʼa‸ gʼawˆ veu laˇ leh, aˬ miˍ hkʼaw keu ve teˇ yanˇ, aˬ miˍ chiˆ ve pa taw vuiˬ haiˬ teˇ hkeh tawˆ la leh, Pawˇlu‸ ve la‸ sheh hta‸ hawˆ taˍ ve yoˬ.

4Oˇ kaˬ lo chehˇ ve chaw teˇ hpaˍ lehˬ, Pawˇlu‸ ve la‸ sheh hta‸ vuiˬ haiˬ hawˆ leh yu taˍ ve hta‸ gʼa mawˬ ve teˇ yanˇ, yawˇ hui kʼoˆ ve, Chaw chi teˇ gʼaˇ lehˬ, awˬ tehˬ awˬ na chaw hta‸ tiˇ pehˍ shehˍ hpaˇ hpeh‸ ve yoˬ. Laˇ tsuhˇ gʼuiˬ awˬ hkʼaw lo yawˇ gʼa ponˬ htawˇ, hteˇ ve cawˇ ve awˬ ceuˬ lehˬ, yawˇ te‸ chehˇ tuˬ a hkaw-anˬ maˇ piˇ teh‸ teˇ gʼaˇ leh teˇ gʼaˇ kʼoˆ da‸ ve yoˬ.

5Pawˇlu‸ lehˬ, vuiˬ oˇ ve hta‸ aˬ miˍ awˬ hkʼaw lo hpi keu leh, yawˇ awˬ to te‸ chiˉ maˇ hpeh‸ ve yoˬ.

6Yawˇ lehˬ awˬ to hpo‸ la tuˬ, maˇ heˆ kʼo, teˇ cawˬ haˉ paˍ suh-e tuˬ yoˬ teh‸ yawˇ hui dawˇ leh law nyi chehˇ ve yoˬ. Ya‸ hkʼaˇ, maw chaweh law nyi chehˇ ve htawˇ, yawˇ te‸ chiˉ maˇ hpeh‸ la ve hta‸ gʼa mawˬ htaˇ, yawˇ hui dawˇ hkʼaˇ kʼaw‸ pa leh, Chaw chi hpaˇ lehˬ, gʼuiˬsha teˇ gʼaˇ hpeh‸ ve yoˬ teh‸ kʼoˆ ve yoˬ.

7Chehˇ kuiˬ oˇ ve awˬ paˇ lo, conˇ awˬ hoˉ Puˍbaˍliˆ meh ve teˇ gʼaˇ lehˬ miˬguiˬ teˇ hpaˍ cawˬ ve yoˬ. Yawˇ ngaˬ hui hta‸ hkʼa deh‸ ha‸ yuˬ laˇ leh, shehˆ nyi hkʼa gaˬ ngaˬ hui hta‸ caˍ laˇ taw laˇ ve yoˬ.

8Oˇ htaˇ Puˍbaˍliˆ ve awˬ pa lehˬ, kaˆ naˬ leh gʼoˇ peˬ awˬ nyi te ve pa taw zuh‸ chehˇ ve yoˬ. Pawˇlu‸ yawˇ geh kʼai leh, bon lawˬ peuˬ hkʼaw‸ nawˉ yawˇ awˬ hkʼoˆ la‸ sheh taˍ leh, yawˇ hta‸ gu na-e piˇ ve yoˬ.

9Oˇ hkʼe hpeh‸ la ve pa taw, conˇ oˇ ve awˬ hkʼaw lo chehˇ ve awˬ kaˍ awˬ nu chaw naˬ teˇ hpaˍ htawˇ laˬ leh, Pawˇlu‸ yawˇ hui hta‸ ka‸ gu na-e piˇ ve yoˬ.

10Yawˇ hui htawˇ ngaˬ hui hta‸ maˇ maˇ yawˆ yan leh, ngaˬ hui haw lo‸ kʼoˍ kʼaw‸ ciˇ tawˆ-e ve teˇ yanˇ, ngaˬ hui hkʼa loˍ ve teˇ hpaˍ haw lo‸ kʼoˍ hkʼaw lo keu laˇ ve yoˬ.

11Shehˆ ha pa gaˬ peuˬ hkʼaw‸ nawˉ, Aˍleˍsaˍduˆ venˇ yaˇ ve haw lo‸ kʼoˍ teˇ maˬ hta‸ ngaˬ hui kʼaw‸ ciˇ tawˆ-e ve yoˬ. Haw lo‸ kʼoˍ oˇ ve lehˬ, mvuhˇ kaˆ yanˇ peuˬ htaˇ hkʼa gaˬ conˇ oˇ ve teˇ maˬ lo deh taˍ ve yoˬ. Haw lo‸ kʼoˍ oˇ ve awˬ han lehˬ, yaˇ cehˬ kʼa gʼuiˬsha ve awˬ han hpeh‸ ve yoˬ.

12Suˇraˍkuˆ venˇ lo gaˬ leh, oˇ kaˬ lo ngaˬ hui shehˆ nyi chehˇ ve yoˬ.

13Ngaˬ hui oˇ kaˬ lo kʼaw‸ tawˆ kʼai leh, htawˇ kʼaw‸ nawˬ kʼaw‸ te kʼai leh, Reˍgiˍonˍ venˇ lo gaˬ ve yoˬ. Awˬ hkʼaw‸ nawˉ teˇ nyi, awˬ hawˉ hpawˇ ve mvuhˇ haw meuˆ la leh, nyiˇ nyi teˇ nyi gaˬ htaˇ, ngaˬ hui Pawˇtaˍyawˇliˆ venˇ lo gaˬ ve yoˬ.

14Oˇ kaˬ lo ngaˬ hui awˬ viˉ awˬ nyi teˇ hpaˍ hta‸ mawˬ da‸ leh, yawˇ hui geh suhˍ nyi chehˇ tuˬ ngaˬ hui hta‸ lawˬ hkawˉ laˇ ve yoˬ. Ngaˬ hui chi hkʼe te kʼai leh, Roˉma‸ venˇ lo gaˬ ve yoˬ.

15Oˇ kaˬ lo chehˇ ve awˬ viˉ awˬ nyi teˇ hpaˍ lehˬ, ngaˬ hui laˬ chehˇ ve awˬ lawn hta‸ gʼa kaˇ htaˇ, Aˍpiˆ tcuh teh‸ kʼoˆ ve teˇ kaˬ leh, Saˉ laˆ shehˆ yehˬ teh‸ kʼoˆ ve teˇ kaˬ lo hkʼa gaˬ laˬ leh, ngaˬ hui hta‸ ca ha‸ yuˬ la ve yoˬ. Pawˇlu‸ yawˇ hui hta‸ gʼa mawˬ htaˇ, Gʼuiˬsha ve bon hta‸ chiˇ mvuh leh nyi ma awˬ gʼaˇ cawˬ la ve yoˬ.

16Ngaˬ hui Roˉma‸ venˇ lo gaˬ ve teˇ yanˇ, Pawˇlu‸ lehˬ yawˇ hta‸ shaw ve ma‸ yaˇ teˇ gʼaˇ geh hkʼa geh yawˇ hkʼaˇ yawˇ chehˇ tuˬ a hkaw-anˬ gʼa ve yoˬ.

17Shehˆ nyi gaˬ peuˬ hkʼaw‸ nawˉ, Pawˇlu‸ lehˬ oˇ kaˬ lo chehˇ ve Yuˇda‸ chaw hui awˬ hkʼaw lo awˬ hoˉ teˇ hpaˍ hta‸ kuˬ yuˬ ve yoˬ. Yawˇ hui hpawnˬ la htaˇ, Pawˇlu‸ yawˇ hui hta‸ kʼoˆ piˇ ve, Awˬ viˉ awˬ nyi teˇ hpaˍ-oˬ, ngaˬ hui ve chaw ceuˬ hta‸ maˇ kʼoˆ, awˬ puˬ awˬ pi hui ve awˬ liˇ hta‸ maˇ kʼoˆ, ngaˬ te‸ chiˉ ka‸ maˇ te ya‸ htawˇ, Yeˍruˆsaˍlehnˍ venˇ awˬ hkʼaw lo Yuˇda‸ chaw hui ngaˬ hta‸ hpeh yuˬ leh, Roˉma‸ chaw hui ve la‸ sheh awˬ hkʼaw lo chiˇ a‸ piˇ ve yoˬ.

18Roˉma‸ chaw hui ngaˬ hta‸ hkʼa deh‸ na nyi peuˬ htaˇ, ngaˬ awˬ hkʼaw lo suh keunˍ ve venˇbaˆ maˇ mawˬ ve pa taw, ngaˬ hta‸ hpehˇ laˇ gaˇ ve yoˬ.

19Ya‸ hkʼaˇ, Yuˇda‸ chaw teˇ hpaˍ tawˍ taˍ ve pa taw, Kehˉsaˍ suhˉ taˆ laˇ tuˬ ngaˬ gʼa lawˬ ve yoˬ. Ngaˬ chi hkʼe gʼa te lawˬ ve htawˇ, ngaˬ ve chaw ceuˬ awˬ hkʼoˆ ngaˬ venˇbaˆ taˍ ve maˇ heˆ.

20Chi hta‸ pa taw, nawˬ hui hta‸ mawˬ leh tawˇ gʼa yaw da‸ tuˬ, ngaˬ nawˬ hui hta‸ kuˬ ve yoˬ. Awˬ lawn kʼo, Iˉsaˍreˍlaˆ chaw ceuˬ dawˇ law taˍ ve teˇ ceuˬ hta‸ pa taw sho caˆ chi hpeh taˍ ve hta‸ ngaˬ gʼa hkanˍ ve yoˬ teh‸, Pawˇlu‸ yawˇ hui hta‸ kʼoˆ piˇ ve yoˬ.

21Oˇ htaˇ, yawˇ hui kʼaw‸ kʼoˆ piˇ ve, Nawˬ ve awˬ lawn Yuˇda‸ mvuhˇmiˬ lo laˬ ve li‸ hta‸ ngaˬ hui maˇ gʼa jaw. Awˬ viˉ awˬ nyi teˇ hpaˍ teˇ gʼaˇ ka‸ nawˬ awˬ lawn maˇ da‸ ve ca kʼoˆ ca kʼaoˍ la ve ka‸ maˇ cawˬ.

22Ya‸ hkʼaˇ, teˇ kaˬ le le lo chehˇ ve chaw hui lehˬ, shu hta‸ hpaˆ da‸ kʼai ve chaw awˬ moˍ chi hta‸ venˇbaˆ taˍ chehˇ ve awˬ lawn ngaˬ hui shiˍ ve pa taw, nawˬ dawˇ taˍ ve teˇ hpaˍ nawˬ kʼoˆ laˇ ve hta‸ ngaˬ hui kaˇ gaˇ ve yoˬ teh‸ kʼaw‸ kʼoˆ piˇ ve yoˬ.

23Hkʼe te leh, yawˇ hui awˬ nyi tinˍ da‸ ve yoˬ. Tinˍ da‸ taˍ ve awˬ nyi gaˬ la htaˇ, Pawˇlu‸ chehˇ taˍ kuiˬ lo chaw maˇ maˇ hpawnˬ laˬ ve yoˬ. Oˇ htaˇ yawˇ lehˬ, mvuhˇ shawˉ te leh mvuhˇ hpeu‸ hkʼa gaˬ Gʼuiˬsha ve mvuhˇ miˬ awˬ lawn shaˉ hkiˆ hkanˍ leh, yawˇ hui Yeˍsuˆ hta‸ yonˍ la tuˬ Moˉseˍ ve awˬ liˇ tawˇ hkawˇ leh tcuh kaˍ paˍ hui ve li‸ hta‸ cuˇ ve awˬ hkʼaw lo, yawˇ hui hta‸ hpeu‸ maˍ piˇ ve yoˬ.

24Yawˇ maˍ piˇ ve tawˇ hkawˇ hta‸ chaw teˇ hpaˍ hpaˍ yonˍ la ve, ya‸ hkʼaˇ teˇ hpaˍ hpaˍ maˇ yonˍ.

25Yawˇ hui teˇ gʼaˇ leh teˇ gʼaˇ maˇ hawˍ da‸ leh, tawˆ kʼai ve yoˬ. Ya‸ hkʼaˇ, yawˇ hui maˇ tawˆ kʼai sheˍ awˬ gʼuˇ suhˍ Pawˇlu‸ yawˇ hui hta‸ tawˇ chi teˇ hkawˇ kʼoˆ piˇ ve, Da‸ ve kehˬ ve Awˬ ha hpu lehˬ, tcuh kaˍ paˍ Iˉsaˍyaˆ hta‸ cuˇ leh nawˬ hui ve awˬ puˍ awˬ pi hui hta‸ kʼoˆ piˇ taˍ ve tawˇ hkawˇ lehˬ, cawˇ tehˬ ve yoˬ. Tawˇ hkawˇ oˇ ve lehˬ,

26Chaw chi teˇ ceuˬ geh kʼai leh chi hkʼe kʼoˆ piˇ-oˆ. Nawˬ hui awˬ tehˬ awˬ na gʼa kaˇ ve htawˇ, na maˇ gʼa taˬ. Nawˬ hui awˬ tehˬ awˬ na gʼa mawˬ ve htawˇ, maˇ shiˍ taˬ.

27Awˬ lawn kʼo, yawˇ hui mehˆ shiˍ maˇ gʼa mawˬ tuˬ, naˍ paw maˇ gʼa kaˇ tuˬ, nyi ma hkʼaw lo maˇ gʼa shiˍ tuˬ, nyi ma maˇ kʼaw‸ pa leh ngaˬ yawˇ hui hta‸ maˇ gʼa gu na-e tuˬ, chaw chi teˇ ceuˬ ve nyi ma heh leh, yawˇ hui ve naˍ paw maˇ na gaˇ leh, yawˇ hui ve mehˆ shiˍ me‸ taˍ ve yoˬ teh‸ kʼoˆ taˍ ve yoˬ.

28Hkʼe te leh, Gʼuiˬsha ve htaiˍ hkʼaw‸ ve chi, buiˇshaˆaˉnaˆ chaw hui hta‸ yawˇ piˇ kʼai leh, yawˇ hui na tuˬ yoˬ teh‸ nawˬ hui shiˍ-o‸ teh‸, Pawˇlu‸ kʼoˆ piˇ ve yoˬ.

30Pawˇlu‸ lehˬ, yawˇ ngaˍ taˍ ve yehˬ awˬ hkʼaw lo nyiˇ hkʼaw‸ chehˇ leh, yawˇ geh hkʼa laˬ ve chaw hkʼa peu-eˬ hta‸ ha‸ yuˬ ve yoˬ.

31Yawˇ nyi ma ha‸ hanˉ ve awˬ hkʼaw lo Gʼuiˬsha ve mvuhˇmiˬ awˬ lawn bon maˍ leh, Jawˇmawˇ Yeˍsuˆ Hkri‸ ve awˬ lawn maˍ piˇ ve teˇ yanˇ, a shu ka‸ yawˇ hta‸ maˇ tawˍ taˍ.

← Chapter 27 Jump to: