Ephesians 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Awˬ lawn oˇ ve hta‸ pa taw, ngaˬ Pawˇlu‸ lehˬ Yeˍsuˆ Hkri‸ awˬ pon htawnˍ hkʼaw gʼa chehˇ taˍ ve yoˬ.

2Nawˬ hui hta‸ piˇ tuˬ ve awˬ pon Gʼuiˬsha ve awˬ bon ngaˬ hta‸ pe‸ laˇ peuˬ ve hta‸ nawˬ hui gʼa shiˍ gʼa kaˇ ve hkʼe, nawˬ hui buiˇshaˆaˉnaˆ chaw hui awˬ pon ngaˬ gʼa hkanˍ ve yoˬ.

3Ngaˬ nawˬ hui hta‸ li‸ a ciˉ bvuh‸ laˇ peuˬ ve hkʼe, Gʼuiˬsha lehˬ faˉ taˍ ve awˬ ceuˬ teˇ hpaˍ ngaˬ hta‸ hpeu‸ maˍ laˇ ve pa taw, ngaˬ gʼa shiˍ ve yoˬ teh‸ nawˬ hui shiˍ taˍ ve yoˬ.

4Li‸ chi hta‸ nawˬ hui gʼaw chehˇ ve teˇ yanˇ, Hkri‸ hta‸ caˉ da‸ ve faˉ taˍ ve awˬ ceuˬ hta‸ ngaˬ hkʼa deh‸ shiˍ ve yoˬ teh‸, nawˬ hui gʼa shiˍ tuˬ yoˬ.

5Faˉ taˍ ve awˬ ceuˬ oˇ ve awˬ lawn, ponˬ laˬ htaˇ ve chaw teˇ hpaˍ hta‸ maˇ shiˍ piˇ ve htawˇ, chi beu‸ ve awˬ yanˇ awˬ hkʼaw lo Awˬ ha hpu lehˬ Gʼuiˬsha ve da‸ kehˬ ve tcuh yaˇ teˇ hpaˍ leh tcuh kaˍ paˍ teˇ hpaˍ hta‸ hpeu‸ maˍ piˇ taˍ ve yoˬ.

6Faˉ taˍ ve awˬ ceuˬ oˇ ve lehˬ, chi hkʼe yoˬ. Ha lehˬ ve bon hkawˇ hta‸ pa taw, buiˇshaˆaˉnaˆ chaw teˇ hpaˍ lehˬ, Yeˍsuˆ Hkri‸ awˬ hkʼaw lo Yuˇda‸ chaw hui geh teˇ geh awˬ shinˉ gʼa caˇ ve, yawˇ hui geh awˬ to teˇ to tiˉ hpeh‸ la leh, piˇ taˍ ve ka ti‸ shaˉ caˆ hta‸ yawˇ hui geh teˇ geh gʼa ve yoˬ.

7Gʼuiˬsha yawˇ ve awˬ bon ngaˬ hta‸ hkʼe leˇ pe‸ laˇ ve hkʼa shuˍ shuˍ, ha lehˬ ve bon hkawˇ chi shu hta‸ maˍ piˇ tuˬ yawˇ ngaˬ hta‸ te tcuh laˇ ve yoˬ. Yawˇ ve la‸ shawnˍ chi hta‸ ngaˬ gʼa ve lehˬ, yawˇ ve kanˇ paˆ awˬ hkʼaw lo yawˇ te laˇ ve hta‸ pa taw gʼa ve yoˬ.

8Hkri‸ awˬ hkʼaw lo cawˬ ve biˇ jaˇ maˇ jaˇ leh awˬ hpfuhˇ hkʼaˆ jaˇ ve awˬ lawn teˇ hpaˍ buiˇ shaˆ aˉ naˆ chaw teˇ hpaˍ hta‸ bon maˍ piˇ tuˬ, Hkri‸ yaˇ hui hkʼa peu-eˬ awˬ hkʼaw lo ngaˬ shu a‸ kehˉ i ve chaw teˇ gʼaˇ hpeh‸ ve htawˇ, awˬ bon chi yawˇ ngaˬ hta‸ pe‸ laˇ ve yoˬ.

9Peuˬ leh, hkʼa peu-eˬ hta‸ te hpanˍ ve Gʼuiˬsha awˬ hkʼaw lo, aˬ sho-eˬ htaˇ ka‸ faˉ taˍ ve awˬ ceuˬ oˇ ve hkʼaˬ hkʼe hpeh‸ la biˇ la chehˇ ve awˬ lawn chaw hkʼa peu-eˬ hta‸ hkʼa tawˍ lehˆ hpeu‸ maˍ piˇ tuˬ awˬ pon ka‸, awˬ bon chi hta‸ ngaˬ gʼa ve yoˬ.

10Aˬ hto‸ ma pa taw faˉ taˍ ve le teh‸ kʼoˆ ve kʼo, Gʼuiˬsha ve cuˇ yiˍ maˍ yiˍ hkʼaˬ ma uiˍ jaˇ maˇ jaˇ ve awˬ lawn Hkri‸ yaˇ awˬ moˍ hta‸ pa taw mvuhˇ hpe lo chehˇ ve uˉ peunˍ shehˍ hpaˇ leh kanˇ paˆ cawˬ shehˍ hpaˇ hui hta‸ chi beu‸ shiˍ piˇ tuˬ awˬ pon, oˇ htaˇ yawˇ faˉ taˍ ve yoˬ.

11Chi hkʼe te ve lehˬ, miˬguiˬ maˇ te hpanˍ sheˍ htaˇ ka‸ yawˇ dawˇ law taˍ ve hkʼe, ngaˬ hui ve Jawˇmawˇ Yeˍsuˆ Hkri‸ awˬ hkʼaw lo biˇ la tuˬ awˬ pon yawˇ te ve yoˬ.

12Jawˇmawˇ Yeˍsuˆ Hkri‸ awˬ hkʼaw lo ngaˬ hui nyi ma ha‸ hanˉ te leh, yawˇ hta‸ yonˍ ve pa taw, maˇ kawˆ ve awˬ hkʼaw lo ngaˬ hui Gʼuiˬsha mehˆ gʼuˇ suhˍ kʼai hpeh‸ ve yoˬ.

13Hkʼe te leh, nawˬ hui awˬ pon ngaˬ gʼa tu‸ gʼa hkanˍ ve teˇ hpaˍ hta‸ pa taw nawˬ hui nyi ma maˇ gʼa luˬ tuˬ, ngaˬ lawˬ hkawˉ ve yoˬ. Tu‸ ve hkanˍ ve chi teˇ hpaˍ lehˬ, nawˬ hui awˬ pon awˬ me‸ awˬ hponˇ hpeh‸ ve yoˬ.

14Awˬ lawn chi hta‸ pa taw, Awˬ pa mehˆ gʼuˇ suhˍ ngaˬ hkui tcuhˉ teh leh bon lawˬ ve yoˬ.

15Yawˇ lehˬ, mvuhˇ naw ma hkʼoˆ lo chehˇ ve mvuhˇ naw ma tcuh yaˇ hui awˬ hkʼoˆ hta‸ maˇ kʼoˆ, miˬ guiˬ hkʼoˆ lo chehˇ ve chaw ceuˬ hkʼa peu-eˬ awˬ hkʼoˆ hta‸ maˇ kʼoˆ, Awˬ pa hpeh‸ ve yoˬ.

16Ngaˬ bon lawˬ ve lehˬ, Gʼuiˬsha ve awˬ me‸ awˬ hponˇ uiˍ jaˇ maˇ jaˇ ve hkʼe, yawˇ ve Awˬ ha hpu hta‸ pa taw nawˬ hui ve nyi ma awˬ hkʼaw lo kanˇ paˆ hta‸ yawˇ yehˇ leh, awˬ gʼaˇ cawˬ la piˇ lawˬ tuˬ maˇ kʼoˆ,

17nawˬ hui yonˍ ve hta‸ pa taw Hkri‸ nawˬ hui ve nyi ma awˬ hkʼaw lo chehˇ yeˬ tuˬ maˇ kʼoˆ, ngaˬ lawˬ ve yoˬ.

18Ha‸ pehnˇ ve awˬ hkʼaw lo nawˬ hui awˬ geu tcuhˆ naˉ leh awˬ hkuiˉ puiˍ yeˬ ve pa taw, Hkri‸ yaˇ hui hkʼa peu-eˬ geh teˇ geh Hkri‸ ve ha‸ pehnˇ ve hkʼaˬ ma kʼehˬ ve, hkʼaˬ ma zuhˬ ve, hkʼaˬ ma mvuh ve leh hkʼaˬ ma naˉ ve hta‸ nawˬ hui htawˇ hkʼa deh‸ shiˍ hpeh‸ tuˬ awˬ pon ka‸ ngaˬ bon lawˬ ve yoˬ.

19Chaw yaˇ shiˍ maˇ gaˬ ve Hkri‸ ve ha‸ pehnˇ ve hta‸ nawˬ hui shiˍ tuˬ awˬ pon ka‸ ngaˬ bon lawˬ chehˇ ve yoˬ. Oˇ hkʼe shiˍ ve kʼo, Gʼuiˬsha ve biˇ ve awˬ ceuˬ hkʼa peu-eˬ nawˬ hui awˬ hkʼaw lo biˇ la tuˬ yoˬ.

20Gʼuiˬsha ve kanˇ paˆ lehˬ, ngaˬ hui awˬ hkʼaw lo kanˉ te chehˇ ve hta‸ pa taw, ngaˬ hui lawˬ ve leh dawˇ ve hkʼa peu-eˬ a‸ kehˉ leuˉ leh yawˇ maˇ chaweh te laˇ puiˉ ve yoˬ.

21Hkri‸ yaˇ awˬ moˍ awˬ hkʼaw lo maˇ kʼoˆ, Yeˍsuˆ Hkri‸ awˬ hkʼaw lo maˇ kʼoˆ, co co taiˍ taiˍ hkʼaˬ htaˆ ka‸ yawˇ hta‸ chiˇ uiˍ chiˇ mvuh piˇ-oˆ. A menˬ.

← Chapter 2 Jump to: Chapter 4 →