Ephesians 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Nawˬ hui lehˬ, te ya‸ kuiˬ leh venˇbaˆ teˇ hpaˍ awˬ hkʼaw lo suh chehˇ taˍ ve teˇ yanˇ, yawˇ nawˬ hui hta‸ kʼaw‸ te‸ tu la piˇ ve yoˬ.

2Ponˬ laˬ htaˇ nawˬ hui miˬguiˬ ve awˬ liˇ awˬ hkʼaˇ teˇ hpaˍ awˬ hkʼaˇ suh kʼai ve awˬ hkʼaw lo, venˇbaˆ teˇ hpaˍ hta‸ te ve yoˬ. Oˇ htaˇ, mvuhˇ hpe lo ve kanˇ paˆ hta‸ uˉ peunˍ shehˍ hpaˇ awˬ hkʼaˇ suh ka‸ nawˬ hui kʼai ve yoˬ. Yawˇ lehˬ, maˇ na yuˬ ve chaw teˇ hpaˍ ve nyi ma awˬ hkʼaw lo kanˉ te ve awˬ ha hpeh‸ ve yoˬ.

3Oˇ htaˇ, ngaˬ hui hkʼa peu-eˬ htawˇ maˇ na yuˬ ve chaw teˇ hpaˍ geh teˇ geh chehˇ leh, awˬ suhˍ awˬ shaˍ nyi hkʼaˇ suh tuˬ te ve pa taw, awˬ suhˍ awˬ shaˍ te gaˇ ve hkʼe te ve maˇ kʼoˆ, dawˇ taˍ ve hkʼe te ve maˇ kʼoˆ, ngaˬ hui te ve yoˬ. Hkʼe te leh, awˬ kaˍ awˬ nu chaw teˇ hpaˍ hkʼa shuˍ shuˍ, ngaˬ hui lehˬ nyi ma zuhˆ ve hta‸ gʼa hkanˍ ve chaw teˇ hpaˍ hpeh‸ tehˬ ve yoˬ.

4Ya‸ hkʼaˇ, ha kʼaˉ puiˉ jaˇ ve Gʼuiˬsha lehˬ, yawˇ ve ha‸ pehnˇ uiˍ jaˇ ve awˬ hkʼaw lo ngaˬ hui hta‸ ha‸ ve pa taw,

5venˇbaˆ teˇ hpaˍ awˬ hkʼaw lo ngaˬ hui suh taˍ ve htawˇ, Hkri‸ geh hkʼa geh yawˇ ngaˬ hui hta‸ kʼaw‸ te‸ la piˇ peuˬ. (Gʼuiˬsha ve awˬ bon hta‸ pa taw nawˬ hui htaiˍ hkʼaw‸ ve hta‸ gʼa peuˬ.)

6Gʼuiˬsha lehˬ, Yeˍsuˆ Hkri‸ geh hkʼa geh ngaˬ hui hta‸ kʼaw‸ te‸ tu la piˇ leh, yawˇ hta‸ pa taw mvuhˇ naw ma ve chehˇ kuiˬ awˬ hkʼaw lo ngaˬ hui hta‸ yawˇ geh mui tcuh laˇ ve yoˬ.

7Yawˇ chi hkʼe te ve lehˬ, Yeˍsuˆ Hkri‸ hta‸ pa taw yawˇ ngaˬ hui hta‸ ha kʼaˉ laˇ ve awˬ hkʼaw lo, awˬ hkʼaw‸ nawˉ laˬ tuˬ ve teˇ yanˇ htaˇ, yawˇ ve awˬ bon hkʼaˬ ma uiˍ jaˇ maˇ jaˇ ve hta‸ hpeu‸ maˍ laˇ tuˬ awˬ pon te ve yoˬ.

8Awˬ lawn kʼo, nawˬ hui yonˍ ve awˬ hkʼaw lo Gʼuiˬ sha ve awˬ bon hta‸ pa taw nawˬ hui htaiˍ hkʼaw‸ ve hta‸ gʼa ve yoˬ. Nawˬ hui hkʼaˇ nawˬ hui te ve pa taw gʼa ve maˇ heˆ. Gʼuiˬsha pe‸ laˇ ve la‸ shawnˍ hpeh‸ ve yoˬ.

9Chaw teˇ gʼaˇ ka‸ nyi ma maˇ gʼa uiˍ tuˬ, kanˉ te ve hta‸ pa taw gʼa ve maˇ heˆ.

10Awˬ lawn kʼo, ngaˬ hui hta‸ yawˇ te taˍ ve yoˬ. Ngaˬ hui da‸ ve kanˉ teˇ hpaˍ hta‸ te tuˬ, Yeˍsuˆ Hkri‸ awˬ hkʼaw lo yawˇ ngaˬ hui hta‸ hpanˍ taˍ ve yoˬ. Da‸ ve kanˉ oˇ ve teˇ hpaˍ hta‸ ngaˬ hui te kʼai tuˬ awˬ pon awˬ gʼuˇ suhˍ htaˇ ka‸ Gʼuiˬsha gu taˍ peuˬ.

11Hkʼe te leh, awˬ suhˍ awˬ shaˍ hpawˇ buiˇ shaˆ aˉ naˆ chaw hpeh‸ ve nawˬ hui teˇ hpaˍ lehˬ, ponˬ laˬ htaˇ Hkri‸ hta‸ a ciˉ ka‸ maˇ caˉ da‸ ve hta‸ dawˇ nawˇ-oˆ. Oˇ htaˇ, awˬ guiˬ meuˇ shoˍ ve chaw teˇ hpaˍ lehˬ, nawˬ hui hta‸ awˬ guiˬ meuˇ maˇ shoˍ ve chaw teˇ hpaˍ hpeh‸ ve teh‸ kʼoˆ ve yoˬ. Awˬ guiˬ meuˇ shoˍ ve oˇ ve lehˬ, awˬ suhˍ awˬ shaˍ hpawˇ la‸ sheh te ve teˇ ceuˬ hpeh‸ ve yoˬ.

12Awˬ yanˇ oˇ ve awˬ hkʼaw lo nawˬ hui lehˬ, Iˉsaˍreˍlaˆ awˬ moˍ hta‸ maˇ gʼa pawnˇ da‸. Awˬ bon gʼa tuˬ yoˬ teh‸ kʼoˆ taˍ ve ka ti‸ shaˉ caˆ tawˇ hkawˇ hta‸ ka‸ nawˬ huiˬ maˇ caˉ da‸. Nawˬ hui lehˬ, miˬguiˬ hkʼoˆ lo dawˇ law kuiˬ ka‸ maˇ cawˬ leh Gʼuiˬsha ka‸ maˇ cawˬ ve hta‸ dawˇ nawˇ-oˆ.

13Ponˬ laˬ htaˇ nawˬ hui vuiˇ kuiˬ lo chehˇ ve htawˇ, chi beu‸ Yeˍsuˆ Hkri‸ awˬ hkʼaw lo nawˬ hui lehˬ, Hkri‸ ve awˬ suhˍ hta‸ pa taw awˬ paˇ neˇ lo gaˬ la peuˬ.

14Awˬ lawn kʼo, yawˇ hta‸ pa taw ngaˬ hui cawˇ da‸ hawˍ da‸ ve yoˬ. Yawˇ lehˬ, ngaˬ hui chaw nyiˇ ceuˬ hpeh‸ chehˇ ve hta‸ teˇ ceuˬ tiˉ hpeh‸ la piˇ leh, ngaˬ hui awˬ kaˍ lo ko taˍ ve gʼo‸ pa hta‸ yawˇ hpaˆ baˬ peuˬ.

15Yawˇ ve awˬ to awˬ hkʼaw lo awˬliˇtawˇhkawˇ ve awˬ liˇ awˬ hkʼaˇ leh tawˇ piˇ taˍ ve teˇ hpaˍ hta‸ te luˬ peuˬ. Yawˇ chi hkʼe te ve lehˬ, chaw nyiˇ ceuˬ hpeh‸ chehˇ ve hta‸ yawˇ awˬ hkʼaw lo chaw awˬ suhˉ teˇ gʼaˇ hpeh‸ la leh, cawˇ da‸ hawˍ da‸ tuˬ te ve yoˬ.

16La‸ ka hta‸ pa taw, ngaˬ hui chaw nyiˇ ceuˬ hta‸ awˬ to teˇ to tiˉ hpeh‸ ve awˬ hkʼaw lo Gʼuiˬsha hta‸ cawˇ da‸ hawˍ da‸ tuˬ awˬ pon htawˇ yawˇ te ve yoˬ. Yawˇ chi hkʼe te ve pa taw, canˇ da‸ ve teˇ ceuˬ hta‸ yawˇ tiˇ pehˍ ve yoˬ.

17Hkri‸ laˬ leh, nawˬ hui vuiˇ kuiˬ lo chehˇ ve chaw hui hta‸ maˇ kʼoˆ, neˇ kuiˬ lo chehˇ ve chaw hui hta‸ maˇ kʼoˆ, Cawˇ da‸ hawˍ da‸ piˇ-oˆ teh‸ kʼoˆ leh, ha lehˬ ve bon hkawˇ maˍ piˇ ve yoˬ.

18Awˬ lawn kʼo, yawˇ hta‸ pa taw ngaˬ hui chaw nyiˇ ceuˬ lehˬ, Awˬ ha hpu teˇ gʼaˇ tiˉ awˬ hkʼaw lo Awˬ pa geh kʼai tuˬ, ya‸ kʼaw cawˬ taˍ peuˬ.

19Hkʼe te leh, nawˬ hui lehˬ shu mvuhˇmiˬ ve chaw maˇ kʼaw‸ hpeh‸. Hkehˉ chaw ka‸ maˇ kʼaw‸ hpeh‸. Chi beu‸ nawˬ hui lehˬ, Hkri‸ yaˇ hui geh teˇ mvuhˇ miˬ awˬ hkʼaw lo ceh tiˉ chehˇ leh, Gʼuiˬsha ve yehˬ awˬ hkʼaw lo yehˬ yaˇ kʼa yaˇ teˇ hpaˍ hpeh‸ ve yoˬ.

20Yehˬ chi awˬ hkʼaw lo tcuh yaˇ hui leh Gʼuiˬsha ve tcuh kaˍ paˍ hui awˬ hkuiˉ puiˍ hpeh‸ leh, Yeˍsuˆ Hkri‸ awˬ to lehˬ, awˬ hkuiˉ puiˍ awˬ ceˍ kʼaweh‸ ve haˉ pui shiˍ hpeh‸ ve yoˬ.

21Yawˇ awˬ hkʼaw lo teˇ yehˬ hkʼa peu-eˬ caˉ da‸ taˍ leh, Jawˇmawˇ Gʼuiˬsha awˬ hkʼaw lo da‸ kehˬ ve bon yehˬ lonˉ hpeh‸ la tuˬ uiˍ la chehˇ ve yoˬ.

22Gʼuiˬsha awˬ pon chehˇ kuiˬ hpeh‸ tuˬ yawˇ lehˬ, Awˬ ha hpu hta‸ cuˇ ve awˬ hkʼaw lo nawˬ hui hta‸ yuˬ leh yehˬ oˇ ve hta‸ te chehˇ ve yoˬ.

← Chapter 1 Jump to: Chapter 3 →