Ephesians 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Hkʼe te leh, nawˬ hui lehˬ Gʼuiˬsha ha‸ ve awˬ yaˇ awˬ duˬ hpeh‸ ve hkʼe, yawˇ te ve hkʼa shuˍ shuˍ te-o.

2Hkri‸ nawˬ hui hta‸ ha‸ ve hkʼe, ha‸ pehnˇ ve awˬ hkʼaˇ suh kʼai-o. Yawˇ nawˬ hui hta‸ ha‸ ve pa taw, awˬ shaˉ hawnˉ ve tanˇ tuˬ Gʼuiˬsha hta‸ tanˇ piˇ tuˬ awˬ pon, yawˇ ve awˬ to Gʼuiˬsha hta‸ chiˇ a‸ piˇ veyoˬ.

3Haˉ chawˇ haˉ paˆ te ve, cha‸ chiˆ ve hkʼa peu-eˬ ve leh, shu mawˇ shu jeˬ hta‸ sheˉ lai ve, chi teˇ hpaˍ awˬ lawn nawˬ hui awˬ hkʼaw lo tawˇ yaw da‸ ve ceh ka‸ taˇ te. Hkri‸ yaˇ hui lehˬ, awˬ lawn chi teˇ hpaˍ hta‸ kʼoˆ maˇ keunˍ ve yoˬ.

4Cha‸ chiˆ ve tawˇ hkawˇ, tcuhˉ kuiˬ maˇ cawˬ ve tawˇ hkawˇ leh baˇ da‸ gʼuiˬ da‸ ve tawˇ hkawˇ, tawˇ hkawˇ chi teˇ hpaˍ hta‸ nawˬ hui kʼoˆ maˇ keunˍ. Chiˇ mvuh ve tawˇ hkawˇ hta‸ ceh tiˉ yaw-o.

5Awˬ lawn kʼo, haˉ chawˇ haˉ paˆ te ve chaw, maˇ da‸ maˇ kehˬ ve chaw leh, shu mawˇ shu jeˬ hta‸ sheˉ lai ve chaw hkʼaˬ ve teˇ gʼaˇ maˇ kʼoˆ, Hkri‸ leh Gʼuiˬsha ve mvuhˇmiˬ awˬ hkʼaw lo awˬ shinˉ maˇ gʼa ve hta‸ nawˬ hui shiˍ taˍ ve yoˬ. (Shu ve mawˇ hta‸ sheˉ lai ve chaw lehˬ, shaˉ ho‸ hta‸ oˉ kʼoˍ pui ve chaw hkʼa shuˍ shuˍ hpeh‸ ve yoˬ.)

6Chaw teˇ gʼaˇ ka‸ awˬ bon maˇ cawˬ ve tawˇ hkawˇ hta‸ yaw leh nawˬ hui hta‸ maˇ gʼa heˍ yuˬ tuˬ shaˍ ti‸ te-o. Awˬ lawn kʼo, awˬ ceuˬ chi teˇ hpaˍ hta‸ pa taw Gʼuiˬsha nyi ma zuhˆ ve teˇ ceuˬ lehˬ, maˇ na yuˬ ve chaw hui awˬ hkʼoˆ gaˬ la ve yoˬ.

7Hkʼe te leh, yawˇ hui hta‸ awˬ chawˇ taˇ te da‸.

8Awˬ lawn kʼo, nawˬ hui awˉ lawˉ htaˇ naˆ ho‸ lehˍ hpeh‸ ve htawˇ, chi beu‸ Jawˇmawˇ Yeˍsuˆ awˬ hkʼaw lo awˬ gʼeuˆ hpeh‸ ve yoˬ.

9Awˬ gʼeuˆ yaˇ hkʼe te kʼai-o. (Awˬ lawn kʼo, awˬ gʼeuˆ ve awˬ shiˍ lehˬ, da‸ ve hkʼa peu-eˬ hteˇ ve cawˇ ve hkʼa peu-eˬ leh, awˬ tehˬ awˬ na ve awˬ ceuˬ hkʼa peu-eˬ awˬ hkʼaw lo cawˬ taˍ ve yoˬ.)

10Jawˇmawˇ Yeˍsuˆ nyi ma cawˇ ve awˬ ceuˬ hta‸ nawˬ hui shiˍ la tuˬ te-o.

11Awˬ shiˍ maˇ naw‸ ve, naˆ hoˆ ve kanˉ teˇ hpaˍ hta‸ a ciˉ ka‸ taˇ te. Chi hkʼoˆ ka‸, kanˉ oˇ ve teˇ hpaˍ ve ya‸ kuiˬ hta‸ hpeu‸ tawˆ la piˇ-oˆ.

12Awˬ lawn kʼo, baˬ kuiˬ lo yawˇ hui te ve kanˉ teˇ hpaˍ awˬ lawn ngaˬ hui tawˇ yaw ve ceh ka‸ ya‸ taw tuˬ cawˬ ve yoˬ.

13Ya‸ kuiˬ hta‸ hpeu‸ tawˆ la piˇ ve hkʼa peu-eˬ lehˬ, awˬ gʼeuˆ hta‸ pa taw hkʼa tawˍ lehˆ tawˆ la ve yoˬ. Hkʼa tawˍ lehˆ tawˆ la ve awˬ ceuˬ hkʼa peu-eˬ htawˇ, awˬ gʼeuˆ hpeh‸ ve yoˬ.

14Hkʼe te leh, chi hkʼe kʼoˆ taˍ ve, Zuh‸ muiˉ kʼa chehˇ ve chaw-oˬ, nawˇ la-o. Suh kuiˬ lo kʼaw‸ te‸ tuˬ la-o. Hkri‸ nawˬ hta‸ awˬ gʼeuˆ ba laˇ tuˬ yoˬ, teh‸ kʼoˆ taˍ ve yoˬ.

15Hkʼe te leh, nawˬ hui hkʼaˬ hkʼe dawˇ ve te ve hta‸ shaˍ ti‸ hkʼa deh‸ taˍ-o‸. Cuˇ yiˍ maˇ cawˬ ve chaw hui hkʼe taˇ te. Cuˇ yiˍ cawˬ ve chaw hui hkʼe te chehˇ-oˆ.

16Chi beu‸ ve awˬ nyi awˬ haˉ teˇ hpaˍ haiˬ ve hta‸ pa taw, awˬ yanˇ hta‸ vuiˬ hkʼaw‸ leh hkʼa deh‸ yehˇ-oˆ.

17Chi hta‸ pa taw, cuˇ yiˍ maˇ cawˬ ve chaw taˇ hpeh‸ piˇ. Ya‸ hkʼaˇ, Jawˇmawˇ Yeˍsuˆ ve a loˍ hkʼaˬ hkʼe cawˬ ve hta‸ shiˍ ve chaw hpeh‸ piˇ-oˆ.

18A pehˉ meuˇ gʼuiˬ dawˬ bvuhˆ ve taˇ te. Oˇ hkʼe te ve lehˬ, te ponˬ te leuˉ jaˇ ve teˇ ceuˬ yoˬ. Nawˬ awˬ hkʼaw lo Awˬ ha hpu hkʼa biˇ cawˬ piˇ-oˆ.

19Chiˇ mvuh ve tawˇ hkawˇ, kʼa muiˬ hkawˇ leh co ha hpawˇ hta‸ caˉ da‸ ve kʼa muiˬ hkawˇ teˇ hpaˍ hta‸ cuˇ leh, teˇ gʼaˇ leh teˇ gʼaˇ kʼoˆ da‸-o‸. Nawˬ hui ve nyi ma awˬ tawˬ hkʼa gaˬ Jawˇmawˇ Yeˍsuˆ hta‸ kʼa muiˬ chiˇ mvuh-o.

20Nawˬ hui lehˬ, ngaˬ hui ve Jawˇmawˇ Yeˍsuˆ Hkri‸ ve awˬ meh hta‸ cuˇ leh, awˬ ceuˬ hkʼa peu-eˬ ve awˬ pon Awˬ pa Gʼuiˬsha hta‸ hkʼaˬ htaˆ ka‸ chiˇ mvuh chehˇ-oˆ.

21Hkri‸ hta‸ yawˆ yan ve awˬ hkʼaw lo, teˇ gʼaˇ awˬ hawˉ lo teˇ gʼaˇ hkʼa deh‸ chehˇ-oˆ.

22Awˬ miˇ ma teˇ hpaˍ-oˬ, Jawˇmawˇ Yeˍsuˆ awˬ hawˉ lo nawˬ hui chehˇ ve hkʼe, a shu yawˇ ve awˬ hpawˇ awˬ hawˉ lo chehˇ-oˆ.

23Awˬ lawn kʼo, Hkri‸ lehˬ yawˇ ve awˬ moˍ ve oˉ kʼoˍ hpeh‸ ve hkʼe, awˬ hpawˇ htawˇ awˬ miˇ ma ve oˉ kʼoˍ hpeh‸ ve yoˬ. Hkri‸ lehˬ, yawˇ ve awˬ to hpeh‸ ve Hkri‸ yaˇ awˬ moˍ hta‸ Htaiˍ hkʼaw‸ shehˍ hpaˇ hpeh‸ ve yoˬ.

24Hkri‸ yaˇ awˬ moˍ lehˬ, yawˇ awˬ hawˉ lo chehˇ ve hkʼe, awˬ miˇ ma teˇ hpaˍ htawˇ teˇ ceuˬ le le awˬ hkʼaw lo a shu yawˇ ve awˬ hpawˇ awˬ hawˉ lo chehˇ-oˆ.

25Awˬ hpawˇ teˇ hpaˍ-oˬ, Hkri‸ lehˬ yawˇ ve awˬ moˍ hta‸ ha‸ ve hkʼe nawˬ hui a shu yawˇ ve awˬ miˇ ma hta‸ ha‸-o‸.

26Hkri‸ yaˇ awˬ moˍ da‸ la kehˬ la tuˬ, iˉ kaˆ tsuhˇ ve hkʼa shuˍ shuˍ, Hkri‸ lehˬ bon hkawˇ hta‸ yehˇ leh Hkri‸ yaˇ awˬ moˍ hta‸ tsuhˇ kehˬ piˇ ve yoˬ. Chi hkʼe te tuˬ awˬ pon, yawˇ ve awˬ to chiˇ a‸ piˇ ve yoˬ.

27Yawˇ aˬ hto‸ ma te Hkri‸ yaˇ awˬ moˍ hta‸ tsuhˇ kehˬ piˇ le teh‸ kʼoˆ kʼo, da‸ kehˬ ve, ya‸ kuiˬ maˇ cawˬ ve, awˬ kuiˉ awˬ haiˇ hkʼe ve teˇ ceuˬ ka‸ maˇ cawˬ ve awˬ moˍ hpeh‸ leh, awˬ me‸ awˬ hponˇ hkʼa biˇ cawˬ ve awˬ hkʼaw lo, awˬ moˍ oˇ ve yawˇ awˬ to hta‸ yawˇ chiˇ a‸ piˇ hpeh‸ tuˬ awˬ pon tsuhˇ kehˬ piˇ ve yoˬ.

28Oˇ ve hkʼa shuˍ shuˍ, awˬ hpawˇ teˇ hpaˍ lehˬ, a shu yawˇ ve awˬ to hta‸ ha‸ ve hkʼe, a shu yawˇ ve awˬ miˇ ma hta‸ ha‸ cawˇ ve yoˬ. A shu yawˇ ve awˬ miˇ ma hta‸ ha‸ ve chaw lehˬ, a shu yawˇ awˬ to hta‸ ha‸ ve yoˬ.

29Awˬ lawn kʼo, a shu yawˇ ve awˬ to hta‸ canˇ ve chaw teˇ gʼaˇ ka‸ maˇ cawˬ. A shu yawˇ awˬ to hta‸ caˍ piˇ taw piˇ leh, hkʼa deh‸ ha‸ shaˉ ve yoˬ. Hkri‸ lehˬ, yawˇ ve awˬ moˍ hta‸ oˇ ve hkʼa shuˍ shuˍ te ve yoˬ.

30Awˬ lawn kʼo, ngaˬ hui lehˬ yawˇ awˬ to ve awˬ hkʼeun teˇ hpaˍ hpeh‸ ve yoˬ.

31Chi hta‸ pa taw hawˉ hkʼaˆ lehˬ, yawˇ ve awˬ pa awˬ e hta‸ hpaˆ da‸ taˉ leh, yawˇ ve awˬ miˇ ma hta‸ caˉ da‸ ve awˬ hkʼaw lo yawˇ huiˉ maˬ lehˬ, teˇ suhˍ teˇ shaˍ tiˉ hpeh‸ la tuˬ yoˬ.

32Awˬ lawn chi lehˬ, naˉ jaˇ ve teˇ ceuˬ hpeh‸ ve yoˬ. Ngaˬ chi hkʼe kʼoˆ ve lehˬ, Hkri‸ leh yawˇ ve awˬ moˍ awˬ lawn hta‸ kʼoˆ gaˇ ve yoˬ.

33Nawˬ hui teˇ gʼaˇ le le htawˇ, a shu yawˇ awˬ to hta‸ ha‸ ve hkʼe, a shu yawˇ awˬ miˇ ma hta‸ ha‸-o‸. Awˬ miˇ ma htawˇ, a shu yawˇ ve awˬ hpawˇ hta‸ yawˆ yan-o.

← Chapter 4 Jump to: Chapter 6 →