Romans 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Hkʼe te leh Yuˇda‸ chaw teˇ ceuˬ lehˬ, shu a‸ kehˉ awˬ bon hkʼaˬ hkʼe cawˬ leuˉ ve le. Awˬ guiˬ meuˇ shoˍ ve teˇ ceuˬ lehˬ, aˬ hto‸ ma awˬ bon cawˬ le.

2Teˇ ceuˬ le le awˬ hkʼaw lo awˬ bon cawˬ maˇ ve yoˬ. Awˉ lawˉ teˇ ceuˬ lehˬ, Gʼuiˬsha yawˇ ve tawˇ hkawˇ teˇ hpaˍ Yuˇda‸ chaw hui hta‸ piˇ ve yoˬ.

3Yawˇ hui teˇ hpaˍ hpaˍ ka ti‸ maˇ yeˬ htawˇ, aˬ hto‸ ma kʼoˆ tuˬ cawˬ le. Yawˇ hui ka ti‸ maˇ yeˬ ve pa taw, Gʼuiˬsha ve ka ti‸ hta‸ te luˬ ve laˇ. Maˇ te luˬ taˬ.

4Chaw hkʼa peu-eˬ heˍ paˍ hpeh‸ ve htawˇ Gʼuiˬ sha lehˬ hteˇ ve yoˬ. Li‸ hpu hkʼaw bvuh‸ taˍ ve hkʼe, Nawˬ lehˬ hteˇ ve cawˇ ve yoˬ teh‸, nawˬ ve tawˇ hkawˇ shaˉ hkiˆ hkanˍ ve yoˬ. Nawˬ suhˉ jehˬ ve hta‸ gʼa hkanˍ htaˇ, nawˬ gʼaˇ tuˬ yoˬ teh‸ bvuh‸ taˍ ve yoˬ.

5Ya‸ hkʼaˇ, ngaˬ hui ve maˇ hteˇ maˇ cawˇ ve awˬ ceuˬ lehˬ, Gʼuiˬsha ve hteˇ ve cawˇ ve awˬ ceuˬ hta‸ te tawˆ la piˇ ve kʼo, kʼoˆ kuiˬ hkʼaˬ hkʼe cawˬ le. Gʼuiˬsha ngaˬ hui hta‸ nyi ma zuhˆ leh ciˍ yanˍ laˇ ve lehˬ, maˇ hteˇ maˇ cawˇ ve hta‸ te laˇ ve maˇ heˆ laˇ. (Tawˇ chi teˇ hkawˇ lehˬ, chaw yaˇ kʼoˆ jaw ve hkʼe ceh ngaˬ kʼoˆ ve yoˬ.)

6Chi hkʼe maˇ heˆ. Tawˇ chi teˇ hkawˇ cawˇ ve kʼo, Gʼuiˬsha lehˬ miˬguiˬ yaˇ hta‸ hkʼaˬ hkʼe te suhˉ jehˬ hpeh‸ tuˬ le.

7Ngaˬ heˍ ve hta‸ pa taw Gʼuiˬsha ve hteˇ ve cawˇ ve awˬ ceuˬ hta‸ leuˉ leh awˬ me‸ awˬ hponˇ cawˬ la piˇ ve kʼo, aˬ hto‸ ma te ngaˬ hta‸ venˇbaˆ yaˇ hpeh‸ ve yoˬ teh‸ suhˉ taˆ chehˇ sheˍ le.

8Da‸ ve tawˆ la tuˬ maˇ da‸ ve hta‸ te shaˍ teh‸, chaw teˇ hpaˍ hpaˍ kʼoˆ ve yoˬ. Ngaˬ hui chi hkʼe kʼoˆ ve teh‸ yawˇ hui teˇ hpaˍ hpaˍ hkʼaiˉ chehˇ ve law. Oˇ hkʼe kʼoˆ ve chaw hui ciˍ yanˍ ve hta‸ gʼa hkanˍ ve lehˬ cawˇ ve yoˬ.

9Hkʼe te leh, ngaˬ hui Yuˇda‸ chaw teˇ hpaˍ shu a‸ kehˉ da‸ ve laˇ. Maˇ heˆ. Awˬ lawn kʼo, Yuˇda‸ chaw maˇ kʼoˆ, Heˍlaˍsaˆ chaw maˇ kʼoˆ, chaw hkʼa peu-eˬ venˇbaˆ ve kanˇ paˆ awˬ hawˉ chehˇ ve yoˬ teh‸, ngaˬ teˇ pawˆ kʼoˆ taˍ peuˬ.

10Li‸ hpu hkʼaw bvuh‸ taˍ ve hkʼe, Hteˇ ve cawˇ ve chaw maˇ cawˬ, teˇ gʼaˇ ka‸ maˇ cawˬ tehˬ ve yoˬ.

11Shiˍ ve chaw teˇ gʼaˇ ka‸ maˇ cawˬ. Gʼuiˬsha hta‸ ca ve chaw htawˇ teˇ gʼaˇ ka‸ maˇ cawˬ

12Chaw hkʼa peu-eˬ ya‸ kʼaw ya‸ kʼai peuˬ. Yawˇ hui hkʼa peu-eˬ hkʼa shuˍ shuˍ awˬ bon maˇ cawˬ ve chaw hpeh‸ la peuˬ. Da‸ ve kanˉ hta‸ te ve chaw maˇ cawˬ, teˇ gʼaˇ ka‸ maˇ cawˬ tehˬ ve yoˬ.

13Yawˇ hui ve hkʼaw‸ hkʼaw lehˬ, hpaw taˍ ve tuˍ hpfuh hpeh‸ ve yoˬ. Yawˇ hui ve ha tehˍ lehˬ, heˍ puiˉ ve yoˬ. Yawˇ hui ve meuˇ guiˬ awˬ hkʼaw hpawˇ lo vuiˬ haiˬ awˬ taw‸ ma cawˬ ve yoˬ.

14Yawˇ hui ve maw‸ kʼaw awˬ hkʼaw lo hkeu ve hkawˇ leh, nyi ma naˬ ve hkawˇ hkʼa biˇ cawˬ ve yoˬ.

15Shu ve awˬ suhˍ yuˬ sheˆ tuˬ yawˇ hui ve hkui sheh gehˬ jaˇ ve yoˬ.

16Yawˇ hui hkʼa kʼai kuiˬ lo, shu awˬ pon luˬ tuˬ sheˆ tuˬ leh dawˇ haˍ gaˇ haˍ tuˬ ceh tiˉ cawˬ ve yoˬ.

17Dawˇ sha gaˇ sha ve ya‸ kʼaw hta‸ yawˇ hui maˇ shiˍ.

18Yawˇ hui hkʼa nyi ve teˇ hpaˍ aw hkʼaw lo, Gʼuiˬsha hta‸ kawˆ ve nyi ma maˇ cawˬ, teh‸ bvuh‸ taˍ ve yoˬ.

19Awˬliˇtawˇhkawˇ awˬ hkʼaw lo hkʼa kʼoˆ taˍ ve tawˇ teˇ hpaˍ lehˬ, awˬ liˇ tawˇ hkawˇ awˬ hawˉ lo chehˇ ve chaw hui hta‸ kʼoˆ piˇ ve teh‸ ngaˬ hui shiˍ ve yoˬ. Hkʼe te leh, chaw hkʼa peu-eˬ tawˇ teˇ hkʼawˇ ka‸ kʼaw‸ yaw tuˬ maˇ cawˬ leh, miˬguiˬ yaˇ hkʼa peu-eˬ Gʼuiˬsha mehˆ gʼuˇ suhˍ suhˉ jehˬ ve hta‸ gʼa hkanˍ ve yoˬ.

20Awˬliˇtawˇhkawˇ hta‸ na yuˬ ve pa taw, Gʼuiˬ sha mehˆ gʼuˇ suhˍ chaw teˇ gʼaˇ ka‸ hteˇ ve cawˇ ve chaw hpeh‸ la tuˬ maˇ heˆ. Awˬ lawn kʼo, awˬliˇtawˇhkawˇ hta‸ pa taw venˇbaˆ cawˬ ve hta‸ gʼa shiˍ ve yoˬ.

21Chi beu‸ lehˬ, awˬliˇtawˇhkawˇ hta‸ maˇ caˉ da‸ ve awˬ hkʼaw lo, Gʼuiˬsha lo laˬ ve hteˇ ve cawˇ ve awˬ ceuˬ hta‸ gʼa mawˬ peuˬ. Awˬ lawn chi ve hta‸ awˬliˇtawˇhkawˇ li‸ teˇ hpaˍ leh tcuh kaˍ paˍ hui ve li‸ teˇ hpaˍ awˬ hkʼaw lo shaˉ hkiˆ hkanˍ taˍ peuˬ.

22Yeˍsuˆ Hkri‸ hta‸ hkʼa yonˍ ve chaw hkʼa peu-eˬ lehˬ, yonˍ ve pa taw Gʼuiˬsha ve hteˇ ve cawˇ ve awˬ ceuˬ hta‸ yawˇ hui gʼa ve yoˬ. Awˬ lawn kʼo, peun da‸ kuiˬ maˇ cawˬ.

23Chaw hkʼa peu-eˬ venˇbaˆ te leh Gʼuiˬsha ve awˬ me‸ awˬ hponˇ hta‸ maˇ mi taˬ.

24Awˬ hpfuhˇ maˇ piˇ leh, yawˇ ve awˬ bon hta‸ pa taw hteˇ ve cawˇ ve chaw hpeh‸ la ve yoˬ. Hteˇ ve cawˇ ve chaw hpeh‸ la ve lehˬ, Yeˍsuˆ Hkri‸ htaiˍ hkʼaw‸ laˇ ve hta‸ pa taw yoˬ.

25Yeˍsuˆ ve awˬ suhˍ hta‸ pa taw hkʼa yonˍ ve chaw hui hta‸ venˇbaˆ hpehˇ hkʼa tuˬ, Yeˍsuˆ lehˬ tanˇ tuˬ hpeh‸ ve yoˬ teh‸, Gʼuiˬsha yawˇ hta‸ teh taˍ ve yoˬ. Gʼuiˬsha yeunˇ hkanˍ puiˉ leh, ponˬ laˬ htaˇ chaw yaˇ te ya‸ ve venˇbaˆ teˇ hpaˍ hta‸ maˇ ciˍ yanˍ sheˍ ve awˬ hkʼaw lo, yawˇ hteˇ ve cawˇ ve awˬ ceuˬ hta‸ te maˍ laˇ ve yoˬ.

26Yawˇ chi hkʼe te ve lehˬ, chi beu‸ awˬ yanˇ awˬ hkʼaw lo yawˇ lehˬ, hteˇ ve cawˇ ve yoˬ teh‸ shu hta‸ hpeu‸ maˍ piˇ leh, Yeˍsuˆ hta‸ hkʼa yonˍ ve chaw teˇ hpaˍ hta‸ hteˇ ve cawˇ ve chaw hpeh‸ la tuˬ yawˇ te ve yoˬ.

27Hkʼe te leh, nyi ma uiˍ kuiˬ hkʼaˬ lo cawˬ le. Nyi ma uiˍ kuiˬ maˇ kʼaw‸ cawˬ. Aˬ hto‸ ma hta‸ pa taw maˇ kʼaw‸ cawˬ le. Kanˉ te ve hta‸ pa taw laˇ. Maˇ heˆ, yonˍ ve hta‸ pa taw yoˬ.

28Awˬ lawn kʼo, awˬliˇtawˇhkawˇ ve kanˉ hta‸ maˇ caˉ da‸ leh, yonˍ ve hta‸ pa taw ceh tiˉ chaw teˇ gʼaˇ lehˬ hteˇ ve cawˇ ve chaw hpeh‸ la ve yoˬ teh‸ ngaˬ hui shawˍ taˍ ve yoˬ.

29Gʼuiˬsha lehˬ, Yuˇda‸ chaw hui ve Gʼuiˬsha ceh tiˉ hpeh‸ ve laˇ. Yawˇ lehˬ, buiˇ shaˆ aˉ naˆ chaw hui ve Gʼuiˬsha htawˇ hpeh‸ ve maˇ heˆ laˇ. Yoˬ, buiˇshaˆaˉnaˆ chaw hui ve Gʼuiˬsha htawˇ hpeh‸ ve yoˬ.

30Awˬ lawn kʼo, Gʼuiˬsha teˇ gʼaˇ tiˉ cawˬ ve yoˬ. Awˬ guiˬ meuˇ shoˍ ve chaw hui yonˍ ve hta‸ pa taw, Gʼuiˬ sha yawˇ hui hta‸ hteˇ ve cawˇ ve chaw teh‸ shawˍ taˍ ve yoˬ. Awˬ guiˬ meuˇ maˇ shoˍ ve chaw hui htawˇ, yonˍ ve hta‸ pa taw yawˇ yawˇ hui hta‸ hteˇ ve cawˇ ve chaw teh‸ shawˍ taˍ ve yoˬ.

31Hkʼe te leh, yonˍ ve hta‸ pa taw ngaˬ hui awˬliˇtawˇhkawˇ hta‸ te luˬ ve laˇ. Maˇ te luˬ. Awˬliˇtawˇhkawˇ hta‸ leuˉ leh yeˬ la tuˬ ngaˬ hui te ve yoˬ.

← Chapter 2 Jump to: Chapter 4 →