Romans 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Hkri‸ awˬ hkʼaw lo ngaˬ hteˇ lehˍ cawˇ lehˍ kʼoˆ ve yoˬ. Ngaˬ heˍ ve maˇ heˆ.

2Ngaˬ ve nyi ma awˬ hkʼaw lo ngaˬ dawˇ haˍ jaˇ leh, hkʼaˬ htaˆ ka‸ ngaˬ nyi ma haw haw chiˆ chiˆ cawˬ ve yoˬ. Da‸ ve kehˬ ve Awˬ ha hpu hta‸ pa taw ngaˬ ve shiˍ puiˉ ve nyi ma htawˇ, ngaˬ geh teˇ geh awˬ lawn chi hta‸ shaˉ hkiˆ hkanˍ ve yoˬ.

3Awˬ lawn kʼo, ngaˬ ve chaw ceuˬ, ngaˬ ve awˬ viˉ awˬ nyi hui awˬ pon, ngaˬ awˬ to Hkri‸ hta‸ hpaˆ da‸ leh hkeu ve hta‸ hkanˍ gaˇ ve nyi ma cawˬ ve yoˬ.

4Yawˇ hui lehˬ, Iˉsaˍreˍlaˆ chaw hui hpeh‸ ve yoˬ. Awˬ yaˇ hpeh‸ la ve teˇ ceuˬ maˇ kʼoˆ, awˬ me‸ awˬ hponˇ maˇ kʼoˆ, ka ti‸ shaˉ caˆ teˇ hpaˍ maˇ kʼoˆ, awˬliˇtawˇhkawˇ hta‸ gʼa ve maˇ kʼoˆ, oˉ kʼoˍ pui ve awˬ liˇ maˇ kʼoˆ, ka ti‸ teˇ hpaˍ htawˇ maˇ kʼoˆ, hkʼa peu-eˬ yawˇ hui ve hpeh‸ ve yoˬ.

5Awˬ puˍ lonˉ hui lehˬ, yawˇ hui ve awˬ puˍ lonˉ teˇ hpaˍ hpeh‸ leh, awˬ suhˍ awˬ shaˍ hpawˇ shawˍ kʼo, Hkri‸ htawˇ yawˇ hui ve chaw ceuˬ hpeh‸ ve yoˬ. Yawˇ lehˬ, hkʼa peu-eˬ ve awˬ hkʼoˆ hta‸ chehˇ leh, co co taiˍ taiˍ awˬ bon uiˍ ve Gʼuiˬsha hpeh‸ ve yoˬ. A menˬ.

6Ya‸ hkʼaˇ, Gʼuiˬsha ve tawˇ hkawˇ luˬ kʼai ve maˇ heˆ. Awˬ lawn kʼo, Iˉsaˍreˍlaˆ ve awˬ ceuˬ awˬ hkʼaˇ hkʼa peu-eˬ lehˬ, Iˉsaˍreˍlaˆ chaw awˬ tehˬ hpeh‸ ve maˇ heˆ.

7Aˍbraˍhanˍ ve awˬ yaˇ awˬ duˬ hkʼa peu-eˬ hta‸ yawˇ ve awˬ yaˇ awˬ duˬ teh‸ kʼoˆ hpeh‸ ve maˇ heˆ. Iˉcaˆ awˬ hkʼaw lo ceh tiˉ nawˬ ve awˬ yaˇ awˬ duˬ shawˍ tuˬ yoˬ teh‸ kʼoˆ taˍ ve yoˬ.

8Kʼoˆ gaˇ ve lehˬ chi hkʼe yoˬ. Awˬ suhˍ awˬ shaˍ hta‸ caˉ da‸ ve awˬ yaˇ awˬ duˬ hui lehˬ, Gʼuiˬsha ve awˬ yaˇ awˬ duˬ hpeh‸ ve maˇ heˆ. Ka ti‸ shaˉ caˆ hta‸ caˉ da‸ ve awˬ yaˇ awˬ duˬ hui ceh tiˉ yawˇ ve awˬ yaˇ awˬ duˬ hpeh‸ ve teh‸ shawˍ taˍ ve yoˬ.

9Awˬ lawn kʼo, ka ti‸ tawˇ hkawˇ chi hkʼe kʼoˆ taˍ ve, Nehˉ hkʼaw‸ chi teˇ yanˇ ngaˬ kʼaw‸ laˬ htaˇ, Saˍraˇ lehˬ yaˇ paˍ teˇ gʼaˇ gʼa tuˬ yoˬ, teh‸ kʼoˆ taˍ ve yoˬ.

10Oˇ ve ceh tiˉ maˇ heˆ. Reˍbehˆka‸ htawˇ ngaˬ hui ve awˬ pa Iˉcaˆ hta‸ heuˆ leh yaˇ hu chehˇ htaˇ, yawˇ ve yaˇ paˍ oˇ ve nyiˇ gʼaˇ maˇ paw la sheˍ.

11Yawˇ huiˉ maˬ da‸ ve kanˉ ka‸ maˇ da‸ ve kanˉ ka‸ maˇ gʼa te sheˍ. Ya‸ hkʼaˇ, Gʼuiˬsha chaw yaˇ hta‸ leuˆ yuˬ ve lehˬ, kanˉ te ve hta‸ pa taw maˇ heˆ. Yawˇ dawˇ taˍ ve teˇ ceuˬ maˇ gʼa luˬ tuˬ, kuˬ yuˬ ve teˇ ceuˬ hta‸ pa taw ceh tiˉ chaw hta‸ leuˆ yuˬ ve yoˬ teh‸ shu gʼa shiˍ tuˬ, awˬ e hta‸ yawˇ kʼoˆ piˇ ve,

12Awˬ viˉ paˍ teˇ gʼaˇ lehˬ, awˬ nyi paˍ teˇ gʼaˇ ve awˬ ceˬ gʼa te tuˬ yoˬ teh‸ kʼoˆ piˇ ve yoˬ.

13Li‸ hpu hkʼaw bvuh‸ taˍ ve hkʼe, Yaˍkoˆ hta‸ ngaˬ ha‸ leh Iˉsawˇ hta‸ ngaˬ canˇ ve yoˬ.

14Hkʼe te leh, ngaˬ hui hkʼaˬ hkʼe kʼoˆ tuˬ cawˬ le. Gʼuiˬsha awˬ hkʼaw lo maˇ hteˇ maˇ cawˇ ve teˇ ceuˬ cawˬ ve laˇ. Maˇ heˆ taˬ.

15Awˬ lawn kʼo, yawˇ Moˉseˍ hta‸ kʼoˆ piˇ ve, Ngaˬ awˬ bon te piˇ gaˇ ve chaw hta‸ awˬ bon te piˇ leh, ngaˬ ha kʼaˉ piˇ gaˇ ve chaw hta‸ ha kʼaˉ piˇ tuˬ yoˬ teh‸ kʼoˆ ve yoˬ.

16Heuˆ gaˇ ve hta‸ pa taw gʼa ve maˇ heˆ. Gʼaˇ hte‸ te ve hta‸ pa taw gʼa ve ka‸ maˇ heˆ. Gʼuiˬsha awˬ bon te piˇ ve hta‸ pa taw ceh tiˉ gʼa ve yoˬ.

17Li‸ hpu hkʼaw jawˇmawˇ Hpaˍrawˇ hta‸ kʼoˆ ve, Nawˬ awˬ hkʼaw lo ngaˬ ve kanˇ paˆ hpeu‸ tawˆ leh, miˬguiˬ hkʼa peu-eˬ awˬ hkʼaw lo ngaˬ ve awˬ meh bvuhˬ kʼai tuˬ ngaˬ nawˬ hta‸ chiˇ taˆ piˇ ve yoˬ teh‸ kʼoˆ piˇ ve yoˬ.

18Hkʼe te leh, awˬ bon te piˇ gaˇ ve chaw hta‸ yawˇ te piˇ leh, nyi ma heh piˇ lawˬ gaˇ ve chaw hta‸ yawˇ heh piˇ lawˬ ve yoˬ.

19Hkʼe te leh, aˬ hto‸ ma te Gʼuiˬsha venˇbaˆ kʼaw‸ taˍ laˇ sheˍ le. Yawˇ ve a loˍ hta‸ a shu tawˍ taˍ gʼa tuˬ le teh‸ nawˬ ngaˬ hta‸ kʼoˆ laˇ tuˬ yoˬ.

20Gʼuiˬsha hta‸ tawˇ kʼaw‸ shaˬ ve chaw-oˬ, nawˬ lehˬ hkʼaˬ hkʼe ve chaw le. Te taˍ ve mawˇ lehˬ, te shehˍ hpaˇ hta‸, Aˬ hto‸ ma te ngaˬ hta‸ chi hkʼe te laˇ ve le teh‸ kʼoˆ tuˬ laˇ.

21Mu‸ hkʼu te shehˍ hpaˇ lehˬ, mu‸ hkʼu te tuˬ ve je‸ awˬ hkʼoˆ hta‸ kanˇ paˆ cawˬ ve maˇ heˆ laˇ. Je‸ teˇ diˬ tiˉ awˬ hkʼaw lo awˬ me‸ awˬ hponˇ cawˬ ve awˬ pon yehˇ tuˬ ve mu‸ hkʼu teˇ shiˍ leh, awˬ me‸ awˬ hponˇ maˇ cawˬ ve awˬ pon yehˇ tuˬ ve mu‸ hkʼu teˇ shiˍ hta‸ yawˇ te hpeh‸ ve maˇ heˆ laˇ.

22Gʼuiˬsha lehˬ, yawˇ nyi ma zuhˆ ve hta‸ maw piˇ tuˬ leh, yawˇ ve kanˇ paˆ hta‸ shiˍ piˇ lawˬ tuˬ, luˬ kʼai sheˆ kʼai tuˬ awˬ pon gu taˍ ve nyi ma zuhˆ ve hta‸ gʼa hkanˍ ve mu‸ hkʼu teˇ hpaˍ hta‸ yawˇ dawˇ zuhˬ gaˇ zuhˬ leh yeunˇ hkanˍ chehˇ ve kʼo, aˬ hto‸ ma kʼoˆ tuˬ cawˬ le.

23Awˬ me‸ awˬ hponˇ cawˬ tuˬ ve awˬ pon awˉ lawˉ htaˇ ka‸ gu taˍ ve, yawˇ ha kʼaˉ ve mu‸ hkʼu teˇ hpaˍ awˬ hkʼoˆ hta‸ yawˇ ve awˬ me‸ awˬ hponˇ hkʼaˬ ma uiˍ hkʼaˬ ma maˇ ve hta‸ shiˍ piˇ lawˬ ve kʼo, aˬ hto‸ ma kʼoˆ tuˬ cawˬ le.

24Yawˇ hkʼa kuˬ yuˬ taˍ ve ngaˬ hui teˇ hpaˍ lehˬ, chi hkʼe ve muˬ hkʼu hpeh‸ ve yoˬ. Yuˇda‸ chaw hui awˬ hkʼaw lo ceh tiˉ kuˬ yuˬ ve maˇ heˆ. Buiˇ shaˆ aˉ naˆ chaw hui awˬ hkʼaw lo htawˇ yawˇ kuˬ yuˬ taˍ ve yoˬ.

25Chi hkʼa shuˍ shuˍ, Hawˇseˍ li‸ awˬ hkʼaw lo Gʼuiˬsha kʼoˆ ve, Ngaˬ ve chaw ceuˬ maˇ heˆ ve hta‸ ngaˬ ve chaw ceuˬ teh‸ kʼoˆ leh, maˇ ha‸ ve yaˇ miˇ hta‸ ha‸ ve yaˇ miˇ teh‸ ngaˬ kʼoˆ tuˬ yoˬ.

26Yawˇ hui hta‸, Nawˬ hui lehˬ ngaˬ ve chaw ceuˬ maˇ heˆ teh‸ kʼoˆ taˍ ve chehˇ kuiˬ awˬ hkʼaw lo, te‸ chehˇ ve Gʼuiˬsha ve awˬ yaˇ awˬ duˬ hpeh‸ ve yoˬ teh‸ shu kʼoˆ tuˬ yoˬ.

27Iˉsaˍyaˆ htawˇ, Iˉsaˍreˍlaˆ chaw ceuˬ awˬ lawn bvuhˬ chaweh kuˬ leh kʼoˆ ve, Iˉsaˍreˍlaˆ chaw hui lehˬ, laˇ tsuhˇ gʼuiˬ ve shehˇ shiˍ hkʼa shuˍ shuˍ maˇ ve htawˇ, chaw a ciˉ ceh tiˉ htaiˍ hkʼaw‸ ve hta‸ gʼa tuˬ yoˬ.

28Awˬ lawn kʼo, Jawˇmawˇ Gʼuiˬsha lehˬ miˬguiˬ hkʼoˆ lo yawˇ ve tawˇ hkawˇ biˇ la htaˇ hkʼa gaˬ haˆ haˆ te tuˬ yoˬ teh‸ kʼoˆ taˍ ve yoˬ.

29Awˉ lawˉ htaˇ Iˉsaˍyaˆ kʼoˆ taˍ ve hkʼe, Hkʼa peu-eˬ awˬ hkʼoˆ uiˍ shehˍ hpaˇ Jawˇmawˇ Gʼuiˬsha lehˬ, ngaˬ hui awˬ pon awˬ ceuˬ awˬ hkʼaˇ maˇ teh taˉ laˇ ve kʼo, Sawˉdonˍ venˇ hkʼe ngaˬ hui hpeh‸ leh, Gawˇmawˇra‸ venˇ hkʼa shuˍ shuˍ hpeh‸ tuˬ yoˬ, teh‸ kʼoˆ ve yoˬ.

30Hkʼe te leh, ngaˬ hui hkʼaˬ hkʼe kʼoˆ tuˬ cawˬ le. Buiˇ shaˆ aˉ naˆ chaw hui lehˬ, hteˇ ve cawˇ ve teˇ ceuˬ hta‸ maˇ ca ve htawˇ, hteˇ ve cawˇ ve hta‸ gʼa peuˬ. Ngaˬ chi hkʼe kʼoˆ ve lehˬ, yonˍ leh gʼa ve hteˇ ve cawˇ ve teˇ ceuˬ hta‸ kʼoˆ gaˇ ve yoˬ.

31Iˉsaˍreˍlaˆ chaw hui lehˬ, awˬliˇtawˇhkawˇ hta‸ caˉ da‸ ve hteˇ ve cawˇ ve teˇ ceuˬ hta‸ ca ve htawˇ, awˬliˇtawˇhkawˇ hta‸ te biˇ maˇ gʼa.

32Aˬ hto‸ ma pa taw hteˇ ve cawˇ ve teˇ ceuˬ hta‸ maˇ gʼa le teh‸ kʼoˆ kʼo, yonˍ ve hta‸ maˇ cuˇ leh kanˉ hta‸ ceh tiˉ cuˇ ve pa taw yoˬ.

33Li‸ hpu hkʼaw bvuh‸ taˍ ve, Nyi loˬ. Chaw yaˇ hkui htiˇ poˬ tuˬ ve haˉ pui leh, paiˍ piˇ lawˬ tuˬ ve haˉ pui shiˍ hta‸ Ziˉonˍ awˬ hkʼaw lo ngaˬ kawˍ chehˇ ve yoˬ. Yawˇ hta‸ hkʼa yonˍ ve chaw lehˬ maˇ gʼa ya‸ taw, teh‸ bvuh‸ taˍ ve hkʼa shuˍ shuˍ, shu hkui htiˇ poˬ ve haˉ pui shiˍ hta‸ yawˇ hui htawˇ hkui htiˇ poˬ paiˍ ve yoˬ.

← Chapter 8 Jump to: Chapter 10 →