Romans 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Hkʼe te leh, awˬ suhˍ awˬ shaˍ hpawˇ ngaˬ hui ve awˬ pa Aˍbraˍhanˍ awˬ lawn hkʼaˬ hkʼe gʼa kʼoˆ tuˬ le.

2Awˬ lawn kʼo, kanˉ te ve hta‸ pa taw Aˍbraˍhanˍ lehˬ hteˇ ve cawˇ ve chaw hpeh‸ la ve hkʼe kʼo, yawˇ nyi ma uiˍ kuiˬ cawˬ tuˬ yoˬ. Ya‸ hkʼaˇ, Gʼuiˬsha mehˆ gʼuˇ suhˍ nyi ma uiˍ kuiˬ cawˬ tuˬ ve maˇ heˆ.

3Li‸ hpu awˬ hkʼaw lo hkʼaˬ hkʼe kʼoˆ ve le. Aˍbraˍhanˍ lehˬ Gʼuiˬsha hta‸ yonˍ ve pa taw, Gʼuiˬsha yawˇ hta‸ hteˇ ve cawˇ ve chaw shawˍ taˍ ve yoˬ teh‸ kʼoˆ taˍ ve yoˬ.

4Kanˉ te ve chaw teˇ gʼaˇ lehˬ, gʼaˇ hpfuhˇ gʼa ve teˇ yanˇ, shu yawˇ hta‸ awˬ bon te piˇ ve teh‸ chaw teˇ gʼaˇ ka‸ maˇ shawˍ. Yawˇ gʼa keunˍ ve pa taw gʼa ve teh‸ shawˍ ve yoˬ.

5Yonˍ ve chaw teˇ gʼaˇ hta‸ hteˇ ve cawˇ ve chaw teh‸ shawˍ ve yoˬ. Yawˇ kanˉ te ve hta‸ pa taw maˇ heˆ. Haiˬ ve chaw teˇ hpaˍ hta‸ hteˇ ve cawˇ ve chaw hpeh‸ la piˇ lawˬ shehˍ hpaˇ hta‸ yawˇ yonˍ ve pa taw yoˬ.

6Chi hkʼa shuˍ shuˍ, Gʼuiˬsha lehˬ kanˉ hta‸ maˇ nyi leh, hteˇ ve cawˇ ve teh‸ shawˍ taˍ ve chaw teˇ gʼaˇ lehˬ, awˬ bon uiˍ ve yoˬ teh‸ Daˍviˆ kʼoˆ taˍ ve yoˬ.

7Yawˇ kʼoˆ ve, Ya‸ kuiˬ jiˆ kuiˬ teˇ hpaˍ hta‸ hpehˇ piˇ peuˬ leh, venˇbaˆ hta‸ beh taˍ peuˬ ve chaw teˇ hpaˍ lehˬ, awˬ bon uiˍ ve yoˬ.

8Jawˇmawˇ Gʼuiˬsha venˇbaˆ maˇ taˍ ve chaw lehˬ, awˬ bon uiˍ ve yoˬ teh‸ kʼoˆ ve yoˬ.

9Awˬ guiˬ meuˇ shoˍ ve chaw hui ceh tiˉ awˬ bon chi hta‸ gʼa ve laˇ. Maˇ heˆ kʼo, awˬ guiˬ meuˇ maˇ shoˍ ve chaw hui htawˇ gʼa ve laˇ. Awˬ lawn kʼo, Aˍbraˍhanˍ yonˍ ve pa taw Gʼuiˬsha yawˇ hta‸ hteˇ ve cawˇ ve chaw shawˍ taˍ ve yoˬ teh‸ ngaˬ hui kʼoˆ ve yoˬ.

10Hkʼe te leh, yawˇ hta‸ hkʼaˬ htaˆ teˇ yanˇ chi hkʼe shawˍ taˍ piˇ ve le. Awˬ guiˬ meuˇ shoˍ peuˬ htaˇ laˇ, maˇ heˆ kʼo, maˇ shoˍ sheˍ htaˇ laˇ. Awˬ guiˬ meuˇ shoˍ peuˬ hkʼaw‸ nawˉ maˇ heˆ. Maˇ shoˍ sheˍ htaˇ ka‸ shawˍ taˍ ve yoˬ.

11Yawˇ awˬ guiˬ meuˇ maˇ shoˍ sheˍ awˬ gʼuˇ suhˍ htaˇ ka‸, yawˇ yonˍ ve htaˬ pa taw hteˇ ve cawˇ ve chaw hpeh‸ la ve yoˬ. Yawˇ hteˇ ve cawˇ ve chaw hpeh‸ la peuˬ ve hta‸ yinˉ tcuhˉ taˍ tuˬ, yawˇ awˬ guiˬ meuˇ shoˍ ve awˬ heˆ hta‸ hkanˍ yuˬ ve yoˬ. Awˬ guiˬ meuˇ maˇ shoˍ ve ka‸, yonˍ ve hta pa taw hteˇ ve cawˇ ve chaw hpeh‸ la peuˬ ve chaw hkʼa peu-eˬ ve awˬ pa hpeh‸ la tuˬ, Gʼuiˬsha Aˍbraˍhanˍ hta‸ dawˇ taˍ ve yoˬ.

12Awˬ guiˬ meuˇ shoˍ ve chaw teˇ hpaˍ ve awˬ pa htawˇ yawˇ hpeh‸ ve yoˬ. Ya‸ hkʼaˇ, chaw oˇ ve teˇ hpaˍ lehˬ, awˬ guiˬ meuˇ shoˍ ve ceh tiˉ maˇ heˆ. Aˍbraˍhanˍ awˬ guiˬ meuˇ maˇ shoˍ sheˍ awˬ gʼuˇ suhˍ htaˇ ka‸, yawˇ yonˍ ve hkʼa shuˍ shuˍ yawˇ hui htawˇ yonˍ leh yawˇ ve hkui ha awˬ hkʼaˇ suh gʼa‸ kʼai ve chaw teˇ hpaˍ hpeh‸ ve yoˬ.

13Aˍbraˍhanˍ leh yawˇ ve awˬ yaˇ awˬ duˬ teˇ hpaˍ gʼa tuˬ ve awˬ shinˉ lehˬ, miˬguiˬ yoˬ teh‸ ka ti‸ shaˉ caˆ gʼa taˍ ve yoˬ. Awˬliˇtawˇhkawˇ hta‸ pa taw yawˇ hui gʼa ve maˇ heˆ. Yonˍ ve hta‸ caˉ da‸ ve hteˇ ve cawˇ ve awˬ ceuˬ hta‸ pa taw yawˇ hui gʼa ve yoˬ.

14Awˬ lawn kʼo, awˬliˇtawˇhkawˇ hta‸ cuˇ ve chaw hui awˬ shinˉ hta‸ gʼa ve kʼo, yonˍ ve teˇ ceuˬ lehˬ, te‸ chiˉ awˬ bon maˇ cawˬ leh, ka ti‸ shaˉ caˆ oˇ ve ka‸ luˬ kʼai peuˬ.

15Awˬliˇtawˇhkawˇ lehˬ, nyi ma zuhˆ ve hta‸ te tawˆ la ve yoˬ. Ya‸ hkʼaˇ, awˬliˇtawˇhkawˇ maˇ cawˬ ve kʼo, ya‸ kuiˬ jiˆ kuiˬ ka‸ maˇ cawˬ.

16Hkʼe te leh, Gʼuiˬsha ve awˬ bon hta‸ pa taw ceh tiˉ awˬ shinˉ hta‸ gʼa hpeh‸ leh, Aˍbraˍhanˍ ve awˬ yaˇ awˬ duˬ hkʼa peu-eˬ ka ti‸ shaˉ caˆ hta‸ awˬ tehˬ awˬ na gʼa hpeh‸ tuˬ, Aˍbraˍhanˍ yonˍ ve teˇ ceuˬ hta‸ Gʼuiˬsha cuˇ leh awˬ shinˉ piˇ ve yoˬ. Awˬliˇtawˇhkawˇ hta‸ cuˇ ve chaw hui ceh tiˉ ka ti‸ shaˉ caˆ hta‸ gʼa tuˬ ve maˇ heˆ. Ngaˬ hui hkʼa peu-eˬ ve awˬ pa Aˍbraˍhanˍ yonˍ ve hkʼa shuˍ shuˍ, hkʼa yonˍ ve chaw hui htawˇ gʼa tuˬ yoˬ.

17Aˍbraˍhanˍ lehˬ, ngaˬ hui ve awˬ pa hpeh‸ ve awˬ lawn Li‸ hpu hkʼaw lo chi hkʼe bvuh‸ taˍ ve, Chaw ceuˬ laiˉ ceuˬ ve awˬ pa ngaˬ nawˬ hta‸ hpeh‸ piˇ lawˬ ve yoˬ teh‸ bvuh‸ taˍ ve yoˬ. Suh peuˬ ve chaw teˇ hpaˍ hta‸ kʼaw‸ te‸ tu la piˇ leh, maˇ hpeh‸ la sheˍ ve awˬ ceuˬ teˇ hpaˍ hta‸ hpeh‸ la piˇ shehˍ hpaˇ Gʼuiˬsha hta‸ yawˇ yonˍ leh, Gʼuiˬsha mehˆ gʼuˇ suhˍ ka ti‸ shaˉ caˆ hta‸ yawˇ gʼa ve yoˬ.

18Chaw ceuˬ laiˉ ceuˬ ve awˬ pa hpeh‸ la tuˬ, dawˇ law kuiˬ maˇ cawˬ htawˇ, yawˇ yonˍ leh dawˇ law chehˇ ve yoˬ. Awˬ lawn kʼo, Nawˬ ve awˬ yaˇ awˬ duˬ lehˬ, oˇ hkʼe hpeh‸ tuˬ yoˬ teh‸ Gʼuiˬsha yawˇ hta‸ kʼoˆ piˇ taˍ ve pa taw yoˬ.

19A sha‸ aˬ laˬ hkʼe teˇ ha hkʼaw‸ gaˬ leh, yawˇ awˬ to suh taˍ ve hkʼe hpeh‸ leh, Saˍraˇ htawˇ yaˇ hu yaˇ leh ve awˬ yanˇ gaˬ peuˬ ve hta‸ yawˇ dawˇ nyi ve teˇ yanˇ, yonˍ ve teˇ ceuˬ awˬ gʼaˇ maˇ nuˇ kʼai.

20Gʼuiˬsha ve ka ti‸ shaˉ caˆ hta‸ yawˇ dawˇ nyi htaˇ, yawˇ yonˍ ve teˇ ceuˬ lehˬ htawˇ dawˇ nawˬ dawˇ maˇ cawˬ. Yawˇ yonˍ ve awˬ gʼaˇ uiˍ la leh, Gʼuiˬsha hta‸ chiˇ uiˍ chiˇ mvuh ve yoˬ.

21Ka ti‸ shaˉ caˆ piˇ taˍ ve hkʼe Gʼuiˬsha te hpeh‸ ve hta‸ Aˍbraˍhanˍ yonˍ yeˬ jaˇ ve yoˬ.

22Hkʼe te leh yawˇ yonˍ ve pa taw, yawˇ hta‸ hteˇ ve cawˇ ve chaw teh‸ shawˍ taˍ ve yoˬ.

23Yawˇ hta‸ chi hkʼe shawˍ taˍ ve teh‸ bvuh‸ taˍ ve tawˇ teˇ hkawˇ lehˬ, Aˍbraˍhanˍ awˬ pon ceh tiˉ maˇ heˆ.

24Ngaˬ hui awˬ pon htawˇ bvuh‸ taˍ ve yoˬ. Ngaˬ hui ve Jawˇmawˇ Yeˍsuˆ hta‸ suh kuiˬ lo kʼaw‸ te‸ tu la piˇ shehˍ hpaˇ hta‸ ngaˬ hui yonˍ ve kʼo, ngaˬ hui hta‸ htawˇ hteˇ ve cawˇ ve chaw hpeh‸ ve yoˬ teh‸ shawˍ taˍ laˇ tuˬ yoˬ.

25Ngaˬ hui ve ya‸ kuiˬ jiˆ kuiˬ teˇ hpaˍ hta‸ pa taw Jawˇmawˇ Yeˍsuˆ hkanˍ suh leh, ngaˬ hui hteˇ ve cawˇ ve chaw hpeh‸ la tuˬ, yawˇ kʼaw‸ te‸ tu la peuˬ ve yoˬ.

← Chapter 3 Jump to: Chapter 5 →