Ruth 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Oˇ ve hkʼaw‸ nawˉ maˇ maw maw Nawˉmi‸ Ruˉhtaˆ hta‸ chi hkʼe kʼoˆ piˇ ve yoˬ. Nawˬ yehˬ kʼa hpeh‸ la tuˬ, ngaˬ nawˬ hta‸ awˬ hpawˇ teˇ gʼaˇ ca laˇ shaˍ.

2Nawˬ kanˉ te chehˇ ve ti mi shehˍ hpaˇ Bawˇzaˆ chi hpaˇ lehˬ, ngaˬ hui ve awˬ viˉ awˬ nyi hpeh‸ ve hta‸ dawˇ nawˇ taˍ-o‸. Hkʼe te leh na sheˍ. Ya‸ puiˉ yawˇ caˬ jaw‸ chehˇ taˍ ve yoˬ.

3Iˉ kaˆ hehˉ leh, nawˬ awˬ to hta‸ awˬ hkiˇ hkʼa deh‸ shawˍ peuˬ hkʼaw‸ nawˉ, yawˇ caˬ jaw‸ chehˇ kuiˬ lo kʼai-o. Ya‸ hkʼaˇ, yawˇ caˇ peuˬ dawˬ peuˬ htaˇ hkʼa gaˬ, nawˬ oˇ kaˬ lo chehˇ taˍ ve yawˇ hta‸ taˇ shiˍ tcuh.

4Yawˇ zuh‸ kuiˬ hta‸ hkʼa deh‸ nyi taˍ leh, yawˇ zuh‸ muiˉ kʼa peuˬ hkʼaw‸ nawˉ, yawˇ ve aˉ boˆ hta‸ yehˬ baˬ leh yawˇ ve hkui paˇ lo ca lo‸ zuh‸ taˍ-o‸. Oˇ htaˇ, nawˬ hkʼaˬ hkʼe gʼa te tuˬ yawˇ nawˬ hta‸ kʼoˆ laˇ tuˬ yoˬ, teh‸ Ruˉhtaˆ hta‸ kʼoˆpiˇ ve yoˬ.

5Nawˬ kʼoˆ ve hkʼe ngaˬ te tuˬ yoˬ, teh‸ Ruˉhtaˆ kʼaw‸ yaw hkʼaw‸ piˇ ve yoˬ.

6Hkʼe te leh Ruˉhtaˆ caˬ jaw‸ kuiˬ lo kʼai leh, yawˇ ve awˬ pi ma kʼoˆ piˇ taˍ ve hkʼe te ve yoˬ.

7Bawˇzaˆ caˇ peuˬ dawˬ peuˬ hkʼaw‸ nawˉ, caˬ hpoˆ taˍ kuiˬ lo kʼai leh oˇ kaˬ lo zuh‸ sheˬ ve yoˬ. Hkʼe te leh, Ruˉhtaˆ a yehˉ jiˆ kʼai leh, aˉ boˆ hta‸ yehˬ baˬ peuˬ hkʼaw‸ nawˉ, yawˇ ve hkui paˇ lo lo‸ zuh‸ taˍ ve yoˬ.

8Tanˇ hkuinˇ htaˇ Bawˇzaˆ nawˇ la leh, yawˇ ve hkui paˇ lo yaˇ miˇ teˇ gʼaˇ zuh‸ chehˇ taˍ ve hta‸ gʼa mawˬ ve yoˬ.

9Nawˬ a shu le, teh‸ Bawˇzaˆ yawˇ hta‸ na nyi ve yoˬ. Jawˇmawˇ-oˬ, ngaˬ lehˬ Ruˉhtaˆ yoˬ. Nawˬ lehˬ, ngaˬ hui ve awˬ ceuˬ awˬ hkʼaˇ hpeh‸ leh, ngaˬ hui hta‸ ha‸ shaˉ laˇ cawˇ ve yoˬ. Chi hta‸ pa taw, ngaˬ hta‸ a ciˉ heuˆ laˇ-oˆ, teh‸ yawˇ hta‸ kʼoˆ piˇ ve yoˬ.

10Oˇ htaˇ Bawˇzaˆ kʼoˆ ve, Gʼuiˬsha nawˬ hta‸ awˬ bon na‸ laˇ piˇ-oˆ. Ponˬ laˬ htaˇ nawˬ ve awˬ pi ma hta‸ ka ti‸ yeˬ ve a‸ kehˉ, chi beu‸ nawˬ yawˇ hta‸ leuˉ leh ka ti‸ yeˬ jaˇ ve hta‸ ngaˬ gʼa mawˬ peuˬ. Nawˬ lehˬ paw sha ve chaw haˉ paˍ, maˇ heˆ kʼo, haˍ ve gʼawˇ ve chaw haˉ paˍ hta‸ heuˆ cawˇ ve yoˬ. Ya‸ hkʼaˇ, nawˬ oˇ hkʼe maˇ te.

11Chi hta‸ pa taw Ruˉhtaˆ-oˬ, taˇ dawˇ haˍ. Nawˬ kʼoˆ ve hkʼe ngaˬ te tuˬ yoˬ. Chaw teˇ gʼaˇ le le shiˍ chehˇ ve hkʼe, nawˬ lehˬ awˬ hkiˇ awˬ naˬ da‸ jaˇ ve yaˇ miˇ hpeh‸ ve yoˬ.

12Ngaˬ hui awˬ viˉ awˬ nyi cawˇ ve yoˬ, teh‸ nawˬ kʼoˆ ve lehˬ cawˇ ve yoˬ. Ya‸ hkʼaˇ, ngaˬ a‸ kehˉ awˬ viˉ awˬ nyi cawˇ jaˇ ve chaw teˇ gʼaˇ cawˬ sheˍ ve yoˬ.

13Ya‸ puiˉ mvuhˇ htiˇ la htaˇ hkʼa gaˬ choˬ kaˬ lo chehˇ taˍ-o‸. Shawˉ pawˍ mvuhˇ htiˇ la htaˇ, chaw oˇ ve nawˬ hui hta‸ ha‸ shaˉ laˇ tuˬ naˍ, ca na nyi shaˍ. Yawˇ oˇ hkʼe te laˇ ve kʼo da‸ ve yoˬ. Yawˇ maˇ te laˇ ve kʼo, ngaˬ nyi ha‸ shaˉ laˇ tuˬ yoˬ. Chi beu‸ mvuhˇ htiˇ la htaˇ hkʼa gaˬ, choˬ kaˬ lo zuh‸ taˍ-o‸, teh‸ Ruˉhtaˆ hta‸ kʼoˆ piˇ ve yoˬ.

14Hkʼe te leh Ruˉhtaˆ lehˬ, yawˇ ve hkui paˇ lo zuh‸ taˍ ve yoˬ. Ya‸ hkʼaˇ, mvuhˇ maˇ htiˇ la sheˍ htaˇ ka‸ yawˇ tu-e ve yoˬ. Awˬ lawn kʼo, yawˇ oˇ kaˬ lo Bawˇzaˆ geh chehˇ taˍ ve chaw teˇ gʼaˇ hta‸ ka‸ maˇ mawˬ tcuh piˇ gaˇ ve pa taw yoˬ.

15Oˇ htaˇ Bawˇzaˆ lehˬ, Nawˬ ve uˉ nyiˉ hta‸ choˬ kaˬ lo hpe hkʼawˇ taˍ-o‸, teh‸ Ruˉhtaˆ hta‸ kʼoˆ piˇ ve yoˬ. Hkʼe te leh, yawˇ uˉ nyiˉ hpe hkʼawˇ piˇ leh, Bawˇzaˆ yawˇ hta‸ caˬ shiˍ hkaw‸ panˇ nyiˉ keu piˇ ve yoˬ. Hkʼe te peuˬ hkʼaw‸ nawˉ, Ruˉhta‸ ve la‸ hpeh kʼaˉ hkʼoˆ lo chiˇ pfuhˍ piˇ leh, Ruˉhtaˆ venˇ hkʼaw lo kʼo‸-e ve yoˬ.

16Yawˇ aˉ hkʼaw lo kʼaw‸ gaˬ la htaˇ yawˇ ve awˬ pi ma lehˬ, Yaˇ miˇ-oˬ, hkʼaˬ hkʼe kʼai le, teh‸ yawˇ hta‸ na nyi piˇ ve yoˬ. Bawˇzaˆ kʼoˆ laˇ ve tawˇ hkʼa peu-eˬ Ruˉhtaˆ yawˇ hta‸ kʼaw‸ kʼoˆ maˍ piˇ ve yoˬ.

17Yawˇ ngaˬ hta‸ awˬ to kʼawˇ lehˍ maˇ kʼo‸-e peu laˇ. Caˬ shiˍ chi ve hta‸ pfuhˇ kʼo‸-e tcuh laˇ ve yoˬ, teh‸ yawˇ ve awˬ pi ma hta‸ kʼoˆ piˇ ve yoˬ.

18Oˇ htaˇ Nawˉmi‸ kʼoˆ ve, Ruˉhtaˆ-oˬ, kanˉ chi ve peuˬ htaˇ hkʼa gaˬ yeunˇ hkanˍ leh law taˍ-o‸. Bawˇzaˆ lehˬ ya‸ nyi kanˉ chi hta‸ maˇ te peuˬ ve ceh ceh yawˇ gʼaˇ jehˇ tuˬ ve maˇ heˆ, teh‸ yawˇ ve awˬ hkuiˇ ma hta‸ kʼoˆ piˇ ve yoˬ.

← Chapter 2 Jump to: Chapter 4 →