Ruth 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Behˍlehˍhehnˍ venˇ hkʼaw lo Nawˉmi‸ ve awˬ hpawˇ Eˇliˇmaˍlehˆ ve awˬ ceuˬ awˬ hkʼaˇ teˇ gʼaˇ chehˇ taˍ ve yoˬ. Yawˇ lehˬ Bawˇzaˆ hpeh‸ leh, paw sha jaˇ ve yoˬ.

2Teˇ nyi htaˇ Ruˉhtaˆ Nawˉmi‸ geh laˬ leh, Ngaˬ hta‸ ti mi hkʼaw lo shu baˬ taˍ ve caˬ nu ca gʼawˆ tcuh laˇ-oˆ. Chaw teˇ gʼaˇ gʼaˇ ngaˬ hta‸ caˬ nu gʼawˆ yuˬ tcuh laˇ tuˬyoˬ hehˉ, teh‸ yawˇ hta‸ kʼoˆ piˇ ve yoˬ. Kʼai loˬ, teh‸ Nawˉmi‸ yawˇ hta‸ kʼoˆ piˇ ve yoˬ.

3Hkʼe te leh, Ruˉhtaˆ tawˆ kʼai leh shu ve ti mi hkʼaw sheˆ taˍ ve caˬ nu ca gʼawˆ toˇ chehˇ ve yoˬ. Ti mi oˇ ve lehˬ, Bawˇzaˆ ve ti mi hpeh‸ ve yoˬ.

4Maˇ maw maw Bawˇzaˆ awˬ to oˇ kaˬ lo gaˬ la leh, Gʼuiˬsha nawˬ hui geh chehˇ piˇ-oˆ, teh‸ yawˇ ve ti mi hkʼaw kanˉ te chehˇ ve chaw hui hta‸ kʼoˆ piˇ ve yoˬ. Gʼuiˬsha nawˬ hta‸ awˬ bon na‸ laˇ piˇ-oˆ, teh‸ yawˇ hui yawˇ hta‸ kʼaw‸ yaw hkʼaw‸ piˇ ve yoˬ.

5Oˇ htaˇ Bawˇzaˆ lehˬ, Yaˇ miˇ oˇ ve a shu le, teh‸ yawˇ ve kanˉ nyi paˍ awˬ hoˉ hta‸ na nyi ve yoˬ.

6Chaw oˇ ve kʼaw‸ yaw hkʼaw leh kʼoˆ ve, Yaˇ miˇ oˇ ve lehˬ, yawˇ ve awˬ pi ma Nawˉmi‸ geh kʼaw‸ la taˍ ve Mawˇbaˆ chaw hpeh‸ ve yoˬ.

7Sheˆ taˍ ve caˬ nu teˇ hpaˍ hta‸ gʼawˆ yuˬ tcuh laˇ tuˬ yawˇ ngaˬ geh a hkaw-anˬ lawˬ laˇ ve yoˬ. Ya‸ shawˉ teˇ na‸ ka‸ laˬ leh, caˬ nu gʼawˆ yuˬ chehˇ ve yoˬ. Chi beu‸ yawˇ teˇ hkui gʼaˇ jehˇ chehˇ taˍ ve yoˬ, teh‸ Bawˇzaˆ hta‸ kʼoˆ piˇ ve yoˬ.

8Oˇ htaˇ Bawˇzaˆ Ruˉhtaˆ hta‸ chi hkʼe kʼoˆ piˇ ve yoˬ. Ngaˬ nawˬ hta‸ chi hkʼe kʼoˆ laˇ gaˇ ve yoˬ. Shu ve ti mi hkʼaw taˇ kʼai loˬ. Choˬ kaˬ ngaˬ ve ti mi hkʼaw kanˉ te chehˇ ve yaˇ miˇ teˇ hpaˍ geh teˇ geh kanˉ te-o.

9Yawˇ hui kanˉ hkʼaˬ lo te chehˇ ve hta‸ nyi leh, yawˇ hui geh chehˇ taˍ-o‸. Nawˬ hta‸ hkʼa mvuhˇ hkʼa na maˇ gʼa te tuˬ, ngaˬ ve chaw teˇ hpaˍ hta‸ ngaˬ kʼoˆ piˇ taˍ peuˬ. Nawˬ iˉ kaˆ shiˉ ve kʼo, yawˇ hui hkʼo taˍ ve iˉ kaˆ hta‸ ca nyiˉ dawˬ-o‸, teh‸ Ruˉhtaˆ hta‸ kʼoˆ piˇ ve yoˬ.

10Oˇ htaˇ Ruˇhtaˆ miˬ chaˇ hkʼoˆ boˆ taˍ leh, Aˬ hto‸ ma pa taw, nawˬ ngaˬ hta‸ chi taw taw ha kʼaˉ laˇ ve le, teh‸ Bawˇzaˆ hta‸ kʼoˆ piˇ ve yoˬ.

11Bawˇzaˆ kʼaw‸yaw hkʼaw leh kʼoˆ ve, Nawˬ ve awˬ hpawˇ suh-e ve teˇ nyi hta‸ te leh ya‸ nyi hkʼa gaˬ, nawˬ ve awˬ pi ma hta‸ nawˬ hkʼaˬ ma nyi ha‸ shaˉ piˇ chehˇ ve awˬ lawn ngaˬ gʼa kaˇ peuˬ. Nawˬ lehˬ, nawˬ pa nawˬ e leh nawˬ ve mvuhˇmiˬ hta‸ baˬ taˉ leh, nawˬ teˇ pawˆ kaˬ maˇ gaˬ jaw ve mvuhˇmiˬ lo, hkʼaˬ hkʼe te ca chehˇ la taˍ ve awˬ lawn hkʼa peu-eˬ hta‸ htawˇ, ngaˬ gʼa kaˇ taˍ peuˬ.

12Nawˬ te taˍ peuˬ ve kanˉ awˬ pon Gʼuiˬsha nawˬ hta‸ awˬbon na‸ laˇ piˇ-oˆ. Nawˬ gʼaˇ ca va la ve Iˉsaˍreˍlaˆ ve Gʼuiˬsha nawˬ hta‸ awˬ bon kʼaw‸ te hkʼaw‸ laˇ piˇ-oˆ, teh‸ Ruˇhta‸ hta‸ kʼoˆ piˇ ve yoˬ.

13Ruˉhtaˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ lehˬ ha kʼaˉ puiˉ jaˇ ve yoˬ. Ngaˬ lehˬ nawˬ ve awˬ ceˬ te maˇ keunˍ ve chaw hpeh‸ ve htawˇ, nawˬ ngaˬ hta‸ chi taw taw na sha ve tawˇ yaw laˇ ve yoˬ, teh‸ yawˇ hta‸ kʼoˆ piˇ ve yoˬ.

14Mvuhˇ law‸ kʼaw sha gʼuˇ caˇ yanˇ gaˬ htaˇ, Ngaˬ geh awˍ mui caˇ la-o, teh‸ Bawˇzaˆ Ruˉhtaˆ hta‸ kʼoˆ piˇ ve yoˬ. Hkʼe te leh, Ruˉhtaˆ lehˬ awˬ ceˬ teˇ hpaˍ geh awˍ ca mui caˇ ve yoˬ. Bawˇzaˆ yawˇ hta‸ caˇ maˇ peuˬ htaˇ hkʼa gaˬ awˍ chiˇ teˇ hpaˍ beˆ keu piˇ ve yoˬ.

15Awˍ caˇ taˉ peuˬ leh Ruˉhtaˆ kanˉ ca te kʼai peuˬ hkʼaw‸ nawˉ, Bawˇzaˆ lehˬ yawˇ ve kanˉ nyi paˍ awˬ hoˉ hta‸ kuˬ yuˬ leh, Yaˇ miˇ oˇ ve hta‸ caˬ nu teˇ hpaˍ gʼawˆ yuˬ tcuh-o. Caˬ kʼa‸ teˇ hpaˍ awˬ paˇ lo sheˆ taˍ ve caˬ nu teˇ hpaˍ hta‸ htawˇ gʼawˆ yuˬ tcuh-o.

16Maˇ law‸ sheˍ ve kʼo, caˬ kʼa‸ hkʼaw ve caˬ nu teˇ hpaˍ hta‸ htawˇ gʼawˬ tawˆ piˇ-oˆ, teh‸ yawˇ hta‸ kʼoˆ piˇ ve yoˬ.

17Hkʼe te leh, Ruˉhtaˆ lehˬ mvuhˇ hpeu‸ la htaˇ hkʼa gaˬ ti mi hkʼaw sheˆ taˍ ve caˬnu teˇ hpaˍ hta‸ gʼawˆ yuˬ ve yoˬ. Yawˇ gʼawˆ taˍ ve caˬ oˇ ve teˇ hpaˍ jaw‸ nyi ve teˇ yanˇ, caˬ shiˍ 3 panˇ hkʼe gʼa ve yoˬ.

18Hkʼe te leh caˬ shiˍ oˇ ve hta‸ pfuhˇ kʼo‸-e leh yawˇ ve awˬ pi ma hta‸ ca kʼaw‸ maˍ piˇ ve yoˬ. Sha gʼuˇ htaˇ caˇ leuˉ taˍ ve caˇ tuˬ teˇ hpaˍ ka‸ yawˇ hta‸ maˍ piˇ ve yoˬ.

19Oˇ htaˇ Nawˉmi‸ lehˬ, Caˬ shiˍ chi teˇ hpaˍ hta‸ nawˬ hkʼaˬ lo gʼa ve le. A shu ve ti mi hkʼaw nawˬ ca gʼawˆ-e ve le. Nawˬ hta‸ caˬ nu gʼawˆ yuˬ tcuh laˇ ve chaw hta‸ Gʼuiˬsha awˬ bon na‸ piˇ-oˆ, teh‸ kʼoˆ ve yoˬ. Hkʼe te leh, Ruˉhtaˆ lehˬ Bawˇzaˆ ve ti mi hkʼaw ca gʼawˆ taˍ ve awˬ lawn yawˇ hta‸ kʼoˆ piˇ ve yoˬ.

20Oˇ htaˇ Nawˉmi‸ kʼoˆ ve, Gʼuiˬsha Bawˇzaˆ hta‸ awˬ bon na‸ piˇ-oˆ. Gʼuiˬsha lehˬ te‸ chehˇ ve chaw leh suh peuˬ ve chaw hui hta‸ te piˇ taˍ ve yawˇ ve ka ti‸ hta‸ hkʼaˬ htaˆ ka‸ dawˇ nawˇ chehˇ ve yoˬ. Chaw oˇ ve hpaˇ lehˬ, ngaˬ hui ve awˬ viˉ awˬ nyi cawˇ ve yoˬ. Yawˇ ngaˬ huiˉ maˬ hta‸ ha‸ shaˉ laˇ cawˇ ve yoˬ, teh‸ kʼoˆ ve yoˬ.

21Oˇ htaˇ Ruˉhtaˆ lehˬ, Caˬ gʼeu‸ peuˬ htaˇ hkʼa gaˬ yawˇ ve ti mi hkʼaw caˬ nu teˇ hpaˍ ca gʼawˆ la tuˬ, ngaˬ hta‸ kʼoˆ laˇ taˍ ve yoˬ, teh‸ yawˇ ve awˬ pi ma hta‸ kʼoˆ piˇ ve yoˬ.

22Nawˉmi‸ kʼoˆ ve, Yoˬ. Bawˇzaˆ ve ti mi hkʼaw ceh tiˉ nawˬ caˬ nu teˇ hpaˍ ca gʼawˆ cawˇ ve yoˬ. Shu ve ti mi hkʼaw ca gʼawˆ ve kʼo, shu hkʼa mvuhˇ hkʼa na te laˇ ve hta‸ nawˬ gʼa hkanˍ tuˬ yoˬ, teh‸ Ruˉhtaˆ hta‸ kʼoˆ piˇ ve yoˬ.

23Hkʼe te leh, caˬ gʼeu‸ peuˬ htaˇ hkʼa gaˬ, Ruˉhtaˆ lehˬ Bawˇzaˆ ve ti mi hkʼaw lo caˬ nu teˇ hpaˍ ca gʼawˆ yuˬ ve yoˬ. Yawˇ lehˬ yawˇ ve awˬ pi ma geh ceh tiˉ chehˇ taˍ ve yoˬ.

← Chapter 1 Jump to: Chapter 3 →