Ruth 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to:

1Hkʼe te leh Bawˇzaˆ lehˬ, shu hpawnˬ da‸ kuiˬ venˇ taˍ meu‸ hpe‸ lo kʼai ve yoˬ. Oˇ htaˇ, Eˇliˆmaˍlehˆ ve awˬ ceuˬ awˬ hkʼaˇ oˇ ve hpaˇ htawˇ oˇ kaˬ lo laˬ ve yoˬ. Bawˇzaˆ yawˇ hta‸ kuˬ leh, Awˬ chawˇ-oˬ, choˬ kaˬ lo ca mui la-o, teh‸ yawˇ hta‸ kʼoˆ piˇ ve yoˬ. Hkʼe te leh, yawˇ oˇ kaˬ lo ca mui ve yoˬ.

2Oˇ ve hkʼaw‸ nawˉ, Bawˇzaˆ lehˬ venˇ hkʼaw chehˇ ve chaw teˇ chi gʼaˇ hta‸ shiˍ veu laˇ leh, oˇ kaˬ lo mui tcuh ve yoˬ. Yawˇ hui hkʼa peu-eˬ mui peuˬ ve teˇ yanˇ,

3yawˇ ve awˬ ceuˬ awˬ hkʼaˇ oˇ ve hpaˇ hta‸ yawˇ chi hkʼe kʼoˆ piˇ ve yoˬ. Chi beu‸ Nawˉmi‸ lehˬ, Mawˇbaˆ mvuhˇmiˬ lo kʼaw‸ la peuˬ. Yawˇ lehˬ yawˇ ve awˬ hpawˇ Eˇliˆmaˍlehˆ ve ti mi hta‸ hawˇ gaˇ ve ceˇ.

4Awˬ lawn chi hta‸ nawˬ dawˇ nyi piˇ cawˇ ve yoˬ teh‸ ngaˬ dawˇ ve yoˬ. Nawˬ vuiˬ gaˇ ve kʼo, choˬ kaˬ lo mui taˍ ve chaw chi ma ve mehˆ gʼuˇ suhˍ lo nawˬ vuiˬ yuˬ-o‸. Nawˬ maˇ vuiˬ gaˇ ve kʼo ka‸, chi beu‸ kʼoˆ loˬ. Nawˬ maˇ vuiˬ gaˇ kʼo, ngaˬ vuiˬ tuˬ yoˬ, teh‸ yawˇ hta‸ kʼoˆ piˇ ve yoˬ. Chaw oˇ ve lehˬ, Ngaˬ vuiˬ tuˬ yoˬ, teh‸ Bawˇzaˆ hta‸ kʼoˆ piˇ ve yoˬ.

5Oˇ htaˇ Bawˇzaˆ kʼoˆ ve, Da‸ ve yoˬ. Ya‸ hkʼaˇ, nawˬ Nawˉmi‸ ve ti mi hta‸vuiˬ ve kʼo, Mawˇ baˆ chaw Ruˉhtaˆ hta‸ htawˇ gʼa vuiˬ leh, yawˇ ve awˬ ceuˬ awˬ hkʼaˇ gʼa kʼaw‸ cawˬ la piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

6Chaw oˇ ve kʼaw‸ yaw hkʼaw‸ leh kʼoˆ ve, Oˇ hkʼe yoˬ kʼo, ti mi oˇ ve hta‸ ngaˬ maˇ vuiˬ-o. Ti mi oˇ ve hta‸ vuiˬ taˍ ka‸, ngaˬ ve yaˇ teˇ hpaˍ gʼa tuˬ ve maˇ heˆ taˬ. Nawˬ vuiˬ-o‸, teh‸ Bawˇ zaˆ hta‸ kʼoˆ piˇ ve yoˬ.

7Awˬ yanˇ oˇ ve awˬ hkʼaw lo, mawˇ hawˇ ve chaw lehˬ yawˇ ve hkuiˉ nuˆ kʼehˆ leh vuiˬ paˍ hta‸ gʼa piˇ ve awˬ liˇ cawˬ ve yoˬ. Chi hkʼe te htaˇ heh‸, Mawˇ vuiˬ cheˆ da‸ peuˬ, teh‸ Iˉsaˍreˍlaˆ chaw hui shawˍ taˍ ve yoˬ.

8Hkʼe te leh chaw oˇ ve lehˬ, Nawˬ vuiˬ loˬ, teh‸ Bawˇzaˆ hta‸ kʼoˆ piˇ leh, Bawˇzaˆ hta‸ yawˇ ve hkuiˉ nuˆ kʼehˆ piˇ ve yoˬ.

9Hkʼe te leh, Bawˇzaˆ lehˬ oˇ kaˬ lo hkʼa mui chehˇ ve chaw hui hta‸ chi hkʼe kʼoˆ piˇ ve yoˬ. Ya‸ nyi Nawˉmi‸ geh cawˬ ve Eˇliˆmaˍlehˆ, Hkiˍlonˍ leh Maˍlonˍ hui ve mawˇ hkʼa peu-eˬ hta‸ ngaˬ vuiˬ yuˬ peuˬ. Nawˬ hui lehˬ shaˉ hkiˆ hpeh‸ ve yoˬ.

10Chi hkʼoˆ ka‸, Maˍlonˍ ve awˬ ceuˬ awˬ hkʼaˇ teˇ hpaˍ kʼaw‸ cawˬ la tuˬ, yawˇ ve awˬ miˇ ma Ruˉhtaˆ hta‸ htawˇ ngaˬvuiˬ yuˬ peuˬ ve yoˬ, teh‸ yawˇ hui hta‸ kʼoˆ piˇ ve yoˬ.

11Chaw oˇ ve teˇ hpaˍ kʼaw‸ yaw hkʼaw‸ leh kʼoˆ ve, Yoˬ, ngaˬ hui lehˬ shaˉ hkiˆ hpeh‸ ve yoˬ. Raˍhkeˍlaˆ leh Leˉaˍ lehˬ Yaˍkoˆ awˬ pon yaˇ maˇ maˇ paw la piˇ ve hkʼe, Gʼuiˬsha lehˬ nawˬ ve awˬ miˇ ma hta‸ htawˇ yaˇ maˇ maˇ cawˬ la tcuh piˇ-oˆ. Nawˬ lehˬ, Eˇhpaˍraˆ awˬ ceuˬ awˬ hkʼaˇ awˬ hkʼaw lo paw sha jaˇ ve chaw hpeh‸ la leh, Behˍlehˍhehnˍ venˇ hkʼaw lo awˬ meh bvuhˬ jaˇ ve chaw hpeh‸ la piˇ-oˆ.

12Yaˇ miˇ chi hta‸ cuˇ leh Gʼuiˬsha nawˬ hta‸ piˇ laˇ ve yaˇ teˇ hpaˍ lehˬ, Yuˇda‸ leh Taˍmaˍ hui ve yaˇ Hpaˍrehˆ ve yehˬ yaˇ kʼa yaˇ hui hkʼe hpeh‸ la piˇ-oˆ, teh‸ yawˇ hta‸ kʼoˆ piˇ ve yoˬ.

13Hkʼe te leh, Bawˇzaˆ lehˬ Ruˉhtaˆ hta‸ heuˆ ve yoˬ. Gʼuiˬsha yawˇ hta‸ awˬ bon na‸ piˇ leh, Ruˉhtaˆ yaˇ paˍ teˇ gʼaˇ paw la ve yoˬ.

14Oˇ htaˇ, yaˇ miˇ teˇ hpaˍ Nawˉmi‸ hta‸ chi hkʼe kʼoˆ piˇ ve yoˬ. Gʼuiˬsha hta‸ chiˇ mvuh-o. Nawˬ hta‸ ha‸ shaˉ laˇ tuˬ, ya‸ nyi Gʼuiˬsha nawˬ hta‸ awˬ hawehˍ teˇ gʼaˇ piˇ laˇ peuˬ. Yaˇ paˍ chi lehˬ, Iˉsaˍreˍlaˆ chaw awˬ hkʼaw lo awˬ meh bvuhˬ jaˇ ve chaw hpeh‸ la piˇ-oˆ.

15Nawˬ ve awˬ hkuiˇ ma lehˬ, nawˬ hta‸ ha‸ jaˇ leh yaˇ paˍ suhˍ gʼaˇ te gʼa ve kanˉ a‸ kehˉ yawˇ leuˉ leh kanˉ te gʼa maˇ ve yoˬ. Chi beu‸ yawˇ nawˬ hta‸ awˬ hawehˍ teˇ gʼaˇ piˇ laˇ peuˬ. Yaˇ paˍ chi nawˬ hta‸ kʼaw‸ ha lehˬ la piˇ leh, nawˬ mawˇ la htaˇ nawˬ hta‸ ha‸ shaˉ laˇ tuˬ yoˬ, teh‸ Nawˉmi‸ hta‸ kʼoˆ piˇ ve yoˬ.

16Hkʼe te leh, Nawˉmi‸ lehˬ yaˇ ehˉ oˇ ve hta‸ chiˇ taˆ leh yawˇ hta‸ ha‸ shaˉ piˇ ve yoˬ.

17Yaˇ miˇ oˇ ve teˇ hpaˍ lehˬ, yaˇ paˍ ehˉ oˇ ve hta‸ Awˇbehˆ teh‸ meh piˇ ve yoˬ. Nawˉmi‸ lehˬ yaˇ paˍ teˇ gʼaˇ gʼa peuˬ, teh‸ yawˇ hui shu hta‸ ca kʼoˆ piˇ toˇ ve yoˬ. Awˇbehˆ lehˬ, Yeˍsehˇ ve awˬ pa hpeh‸ leh, Yeˍsehˇ lehˬ Daˍviˆ ve awˬ pa hpeh‸ ve yoˬ.

18Chi ve lehˬ, Hpaˍrehˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. Hpaˍrehˆ ve yaˇ lehˬ, Heˍsaˍronˍ yoˬ.

19Heˍsaˍronˍ ve yaˇ lehˬ, Aˍranˍ yoˬ. Aˍranˍ ve yaˇ lehˬ Aˍmiˆnaˍdaˆ yoˬ.

20Aˍmiˆnaˍdaˆ ve yaˇ lehˬ Naˍsonˍ yoˬ. Naˍsonˍ ve yaˇ lehˬ Saˍlaˍmonˍ yoˬ.

21Saˍlaˍmonˍ ve yaˇ lehˬ Bawˇzaˆ yoˬ. Bawˇzaˆ ve yaˇ lehˬ Awˇbehˆ yoˬ.

22Awˇbehˆ ve yaˇ lehˬ Yeˍsehˇ yoˬ. Yeˍsehˇ ve yaˇ lehˬ Daˍviˆ yoˬ.

← Chapter 3 Jump to: