Ruth 4

Lao Bible 2012 (ພຣະຄຳພີສັກສິ)

← Chapter 3 Jump to:

1ໂບອາດໄດ້ໄປບ່ອນປະຊຸມທີ່ປະຕູເມືອງແລະນັ່ງຢູ່ທີ່ນັ້ນ. ແລ້ວພີ່ນ້ອງຜູ້ໃກ້ຊິດຂອງເອລີເມເຫຼັກ ທີ່ໂບອາດກ່າວເຖິງນັ້ນກໍຍ່າງຜ່ານມາ. ໂບອາດຈຶ່ງເອີ້ນໃສ່ວ່າ, “ເພື່ອນເອີຍ ເຊີນມານັ່ງທີ່ນີ້ກ່ອນ.” ລາວຈຶ່ງເຂົ້າໄປນັ່ງ.

2ແລ້ວໂບອາດກໍເຊີນເອົາບັນດາຜູ້ນຳຢູ່ໃນເມືອງສິບຄົນ ມານັ່ງໃນບ່ອນນັ້ນຄືກັນ. ເມື່ອພວກເຂົານັ່ງລົງແລ້ວ

3ໂບອາດຈຶ່ງເວົ້າແກ່ຍາດຕິພີ່ນ້ອງຂອງຕົນວ່າ, “ດຽວນີ້ນາງນາໂອມີໄດ້ກັບຄືນມາຈາກດິນແດນໂມອາບແລ້ວ ນາງຢາກຂາຍທົ່ງນາທີ່ເປັນຂອງເອລີເມເຫຼັກ ຜູ້ທີ່ເປັນຍາດຕິພີ່ນ້ອງຂອງເຮົາ.

4ຂ້ອຍຄິດວ່າເຈົ້າຄວນຮູ້ໃນເລື່ອງນີ້. ບັດນີ້ ຖ້າເຈົ້າຕ້ອງການທົ່ງນານັ້ນ ໃຫ້ເຈົ້າຊື້ເອົາຊ້ອງໜ້າພວກທີ່ນັ່ງຢູ່ນີ້. ແຕ່ຖ້າເຈົ້າບໍ່ຕ້ອງການຊື້ກໍໃຫ້ເວົ້າມາໂລດ ຍ້ອນສິດທິໃນການຊື້ທົ່ງນານີ້ເປັນຂອງເຈົ້າກ່ອນ ແລ້ວຈຶ່ງເປັນຂອງຂ້ອຍ.” ຊາຍຄົນນີ້ຈຶ່ງຕອບວ່າ, “ຂ້ອຍຈະຊື້ທົ່ງນານັ້ນ.”

5ໂບອາດເວົ້າວ່າ, “ດີແລ້ວ ຖ້າເຈົ້າຈະຊື້ທົ່ງນາຈາກນາງນາໂອມີ ເຈົ້າຕ້ອງຊື້ເອົານາງຣຸດ ຜູ້ທີ່ເປັນສາວໝ້າຍຊາວໂມອາບດ້ວຍ ເພື່ອວ່ານາທົ່ງນີ້ຈະມີຢູ່ຕໍ່ໄປນຳຄອບຄົວຂອງຊາຍຜູ້ທີ່ໄດ້ຕາຍໄປແລ້ວ.”

6ຊາຍຄົນນັ້ນຈຶ່ງຕອບວ່າ, “ໃນກໍລະນີເຊັ່ນນີ້ ຂ້ອຍຂໍສະຫລະສິດທີ່ຈະຊື້ນາທົ່ງນັ້ນ ເພາະເຮັດໃຫ້ພວກລູກຂອງຂ້ອຍບໍ່ໄດ້ຮັບສ່ວນນຳ. ໃຫ້ເຈົ້າຊື້ເອົາສາ ຂ້ອຍບໍ່ຊື້ດອກ.”

7ໃນສະໄໝກ່ອນ ເມື່ອມີການຂາຍຫລືແລກປ່ຽນການເປັນກຳມະສິດຊັບສິນ ຕາມທໍານຽມແລ້ວຜູ້ຂາຍຕ້ອງປົດເກີບກິ່ງໜຶ່ງຂອງຕົນອອກ ແລະ ຍື່ນໃຫ້ແກ່ຜູ້ຊື້. ການເຮັດເຊັ່ນນີ້ ເປັນພິທີທີ່ຊາວອິດສະຣາເອນສະແດງໃຫ້ເຫັນວ່າ ເລື່ອງລາວໄດ້ຕົກລົງກັນແລ້ວ.

8ດັ່ງນັ້ນ ເມື່ອຊາຍຄົນນັ້ນບອກວ່າ, “ໃຫ້ເຈົ້າຊື້ເອົາສາ” ລາວຈຶ່ງປົດເກີບຂອງຕົນກິ່ງໜຶ່ງອອກແລະຍື່ນໃຫ້ໂບອາດ.

9ໂບອາດກ່າວແກ່ພວກຜູ້ນຳແລະທຸກຄົນທີ່ຢູ່ໃນທີ່ນັ້ນວ່າ, “ມື້ນີ້ ທ່ານທຸກຄົນເປັນພະຍານວ່າ ຂ້າພະເຈົ້າໄດ້ຊື້ເອົາທຸກໆສິ່ງຈາກນາງນາໂອມີ ທີ່ເປັນຂອງເອລີເມເຫຼັກ ແລະຂອງລູກຊາຍຂອງລາວ ຄືກີລີໂອນແລະມາໂລນ.

10ນອກຈາກນີ້ອີກ ນາງຣຸດຊາວໂມອາບເມຍໝ້າຍຂອງມາໂລນ ກໍໄດ້ກາຍເປັນເມຍຂອງຂ້າພະເຈົ້າດ້ວຍ. ອັນນີ້ຈະເປັນການຮັກສາຊັບສິນໄວ້ໃນຄອບຄົວຂອງຜູ້ຕາຍ ແລະສາຍຄອບຄົວຂອງລາວຈະຍັງມີຢູ່ໃນທ່າມກາງຍາດຕິພີ່ນ້ອງ ແລະຢູ່ໃນບ້ານເມືອງຂອງລາວ. ມື້ນີ້ ພວກທ່ານກໍເປັນພະຍານໃນເລື່ອງນີ້.”

11ພວກຜູ້ນຳແລະຄົນອື່ນຈຶ່ງຕອບວ່າ, “ແມ່ນແລ້ວ ພວກເຮົາເປັນພະຍານ. ຂໍພຣະເຈົ້າຢາເວໂຜດໃຫ້ເມຍຂອງເຈົ້າກາຍເປັນດັ່ງນາງຣາເຊັນແລະນາງເລອາເທີ້ນ ຄືຜູ້ທີ່ມີລູກຫລາຍຄົນກັບຢາໂຄບ. ຂໍໃຫ້ເຈົ້າເປັນຄົນຮັ່ງມີໃນຕະກຸນເອຟຣັດ ແລະເປັນຜູ້ທີ່ມີຊື່ສຽງໃນເມືອງເບັດເລເຮັມດ້ວຍ.

12ຂໍໃຫ້ລູກທີ່ພຣະເຈົ້າຢາເວໂຜດໃຫ້ເຈົ້າຈາກຍິງຄົນນີ້ ຈົ່ງເປັນດັ່ງຄົນໃນຄອບຄົວຂອງເປເຣັດ ຜູ້ທີ່ເປັນລູກຊາຍຂອງຢູດາແລະນາງຕາມານັ້ນເທີ້ນ.”

13ດັ່ງນັ້ນ ໂບອາດຈຶ່ງພານາງຣຸດເມືອເຮືອນຂອງຕົນແລະເອົານາງເປັນເມຍ. ພຣະເຈົ້າຢາເວໄດ້ອວຍພອນນາງ; ສະນັ້ນ ນາງຈຶ່ງຖືພາແລະເກີດລູກຊາຍຜູ້ໜຶ່ງ.

14ພວກຜູ້ຍິງຈຶ່ງເວົ້າກັບນາງນາໂອມີວ່າ, “ສັນລະເສີນພຣະເຈົ້າຢາເວ ພຣະອົງໄດ້ໂຜດໃຫ້ເຈົ້າມີຫລານຊາຍມື້ນີ້ເພື່ອຈະເບິ່ງແຍງເຈົ້າ. ຂໍໃຫ້ເດັກຄົນນີ້ກາຍເປັນຜູ້ມີຊື່ສຽງໃນຊາດອິດສະຣາເອນເທີ້ນ.

15ລູກໃພ້ຂອງເຈົ້າຮັກເຈົ້າຫລາຍ ແລະນາງໄດ້ປະຕິບັດຕໍ່ເຈົ້າດີກວ່າລູກຊາຍເຈັດຄົນ. ມາບັດນີ້ ນາງຍັງມີຫລານຊາຍໃຫ້ເຈົ້າອີກ ຜູ້ທີ່ຈະນຳເອົາຊີວິດໃໝ່ມາໃຫ້ເຈົ້າ ແລະຈະໃຫ້ຄວາມຄຸ້ມຄອງແກ່ເຈົ້າໃນເວລາເຈົ້າເຖົ້າແກ່ຊະຣາ.”

16ນາງນາໂອມີໄດ້ຮັບເອົາເດັກນັ້ນມາລ້ຽງດູ ແລະເບິ່ງແຍງລາວຢ່າງໃກ້ຊິດ.

17ພວກຜູ້ຍິງບ້ານໃກ້ເຮືອນຄຽງໄດ້ໃສ່ຊື່ເດັກນີ້ວ່າ ໂອເບັດ. ພວກເຂົາບອກທຸກຄົນວ່າ, “ເດັກນ້ອຍຜູ້ນີ້ເປັນລູກຊາຍຂອງນາງນາໂອມີ.” ໂອເບັດໄດ້ກາຍເປັນພໍ່ຂອງເຢຊີ ຜູ້ທີ່ເປັນພໍ່ຂອງດາວິດ.

18ເຊື້ອສາຍຂອງດາວິດນັບແຕ່ເປເຣັດ ມີດັ່ງນີ້: ເປເຣັດ, ເຮຊະໂຣນ, ຣາມ, ອຳມີນາດາບ, ນາໂຊນ, ສານໂມນ, ໂບອາດ, ໂອເບັດ, ເຢຊີ, ດາວິດ.

← Chapter 3 Jump to: