2 Peter 3

Lao 2023 (ພຣະຄຳພີລາວສະບັບສະໄໝໃໝ່)

← Chapter 2 Jump to:

1ເພື່ອນທີ່ຮັກທັງຫລາຍເອີຍ, ນີ້ເປັນຈົດໝາຍສະບັບທີສອງຂອງເຮົາເຖິງພວກເຈົ້າ. ເຮົາໄດ້ຂຽນມາທັງສອງສະບັບເປັນເຄື່ອງເຕືອນໃຈເພື່ອກະຕຸ້ນພວກເຈົ້າໃຫ້ມີຄວາມຄິດໃນທາງທີ່ບໍລິສຸດ

2ເຮົາຢາກໃຫ້ພວກເຈົ້າລະນຶກເຖິງຖ້ອຍຄຳທີ່ພວກຜູ້ທຳນວາຍບໍລິສຸດກ່າວໄວ້ໃນເມື່ອກ່ອນນັ້ນ ແລະ ລະນຶກເຖິງຄຳສັ່ງຂອງອົງພຣະຜູ້ເປັນເຈົ້າ ແລະ ອົງພຣະຜູ້ຊ່ວຍໃຫ້ພົ້ນຂອງພວກເຮົາໄດ້ສັ່ງຜ່ານທາງພວກອັກຄະສາວົກຂອງພວກເຈົ້າ.

3ເໜືອສິ່ງໃດທັງໝົດ, ພວກເຈົ້າຕ້ອງເຂົ້າໃຈວ່າໃນຍຸກສຸດທ້າຍຜູ້ມັກເຢາະເຢີ້ຍຈະມາເຢາະເຢີ້ຍ ແລະ ເຮັດຕາມຄວາມປາຖະໜາຊົ່ວຂອງພວກເຂົາ.

4ພວກເຂົາຈະເວົ້າວ່າ, “ຢູ່ໃສ ‘ການມາ’ ທີ່ພຣະອົງໄດ້ສັນຍາໄວ້? ດົນນານມາແລ້ວຕັ້ງແຕ່ບັນພະບຸລຸດຂອງພວກເຮົາໄດ້ຕາຍໄປ, ທຸກຢ່າງກໍດຳເນີນໄປເໝືອນທີ່ເປັນມາຕັ້ງແຕ່ເລີ່ມສ້າງໂລກ”.

5ແຕ່ພວກເຂົາຕັ້ງໃຈລືມວ່າດົນນານມາແລ້ວໂດຍພຣະຄຳຂອງພຣະເຈົ້າ ຟ້າສະຫວັນກໍເກີດມີຂຶ້ນມາ ແລະ ແຜ່ນດິນໂລກກໍກໍ່ຮ່າງຂຶ້ນມາຈາກນ້ຳ ແລະ ໂດຍມີນໍ້າອ້ອມຮອບ.

6ໂດຍນ້ຳເຫລົ່ານີ້ເອງທີ່ໄດ້ຖ້ວມ ແລະ ໄດ້ທຳລາຍໂລກໃນເວລານັ້ນ.

7ໂດຍພຣະຄຳອັນດຽວກັນນີ້ ຟ້າສະຫວັນ ແລະ ແຜ່ນດິນໂລກປັດຈຸບັນກໍຖືກສະຫງວນໄວ້ໃຫ້ໄຟເຜົາຜານ ຖືກເກັບໄວ້ເພື່ອວັນແຫ່ງການພິພາກສາ ແລະ ຈິບຫາຍຂອງຄົນອະທຳ.

8ເພື່ອນທີ່ຮັກເອີຍ, ແຕ່ຢ່າລືມຂໍ້ນີ້ຄື: ສຳລັບອົງພຣະຜູ້ເປັນເຈົ້າແລ້ວໜຶ່ງວັນກໍເໝືອນໜຶ່ງພັນປີ ແລະ ໜຶ່ງພັນປີກໍເໝືອນໜຶ່ງວັນ.

9ອົງພຣະຜູ້ເປັນເຈົ້າບໍ່ໄດ້ຊ້າທີ່ຈະເຮັດຕາມສັນຍາເໝືອນດັ່ງທີ່ບາງຄົນເຂົ້າໃຈວ່າຊ້າ. ແຕ່ພຣະອົງອົດທົນຕໍ່ພວກເຈົ້າ, ພຣະອົງບໍ່ຕ້ອງການໃຫ້ຜູ້ໃດຈິບຫາຍໄປ, ແຕ່ຕ້ອງການໃຫ້ທຸກຄົນກັບມາເພື່ອຖິ້ມໃຈເກົ່າເອົາໃຈໃໝ່.

10ແຕ່ວັນແຫ່ງອົງພຣະຜູ້ເປັນເຈົ້າຈະມາເໝືອນດັ່ງຂະໂມຍ. ຟ້າສະຫວັນຈະຫາຍໄປດ້ວຍສຽງດັງກ້ອງສະໜັ່ນ ແລະ ອົງປະກອບທັງຫລາຍຈະຖືກທຳລາຍດ້ວຍໄຟ. ແລະ ແຜ່ນດິນໂລກກັບສັບພະທຸກສິ່ງທີ່ຢູ່ໃນນັ້ນຈະຖືກທຳລາຍໝົດ.

11ໃນເມື່ອທຸກສິ່ງຈະຖືກທຳລາຍລົງຢ່າງນີ້ ພວກເຈົ້າຄວນຈະເປັນຄົນແບບໃດ? ພວກເຈົ້າຄວນດຳເນີນຊີວິດຢ່າງບໍລິສຸດ ແລະ ຢູ່ໃນທາງຂອງພຣະເຈົ້າ

12ຂະນະທີ່ພວກເຈົ້າຄອຍຖ້າວັນຂອງພຣະເຈົ້າ ແລະ ເຮັ່ງຮີບໃຫ້ວັນນັ້ນມາໂດຍໄວ. ວັນນັ້ນຈະນຳການທຳລາຍມາສູ່ຟ້າສະຫວັນດ້ວຍໄຟ ແລະ ອົງປະກອບຕ່າງໆກໍຈະຖືກລະລາຍໄປໃນຄວາມຮ້ອນ.

13ແຕ່ດ້ວຍການຢຶດໝັ້ນໃນຄຳສັນຍາຂອງພຣະອົງ ພວກເຮົາກຳລັງຄອຍຖ້າຟ້າສະຫວັນໃໝ່ ແລະ ແຜ່ນດິນໂລກໃໝ່ ເຊິ່ງເປັນທີ່ສະຖິດຂອງຄວາມຊອບທຳ.

14ດ້ວຍເຫດນັ້ນ, ເພື່ອນທີ່ຮັກທັງຫລາຍເອີຍ, ໃນເມື່ອພວກເຈົ້າກຳລັງຄອຍຖ້າສິ່ງນີ້ຢູ່, ຈົ່ງພະຍາຍາມທຸກວິທີທີ່ຈະໃຫ້ພຣະອົງເຫັນວ່າພວກເຈົ້າບໍ່ມີດ່າງພອຍ, ບໍ່ມີຕຳໜິ ແລະ ມີສັນຕິສຸກກັບພຣະອົງ.

15ຈົ່ງລະນຶກວ່າທີ່ອົງພຣະຜູ້ເປັນເຈົ້າຂອງພວກເຮົາອົດທົນກໍເພື່ອໃຫ້ຄົນທັງຫລາຍມີໂອກາດໄດ້ຮັບຄວາມພົ້ນ ເໝືອນດັ່ງທີ່ໂປໂລນ້ອງທີ່ຮັກຂອງພວກເຮົາໄດ້ຂຽນຈົດໝາຍມາເຖິງພວກເຈົ້າດ້ວຍສະຕິປັນຍາທີ່ພຣະເຈົ້າໄດ້ໃຫ້ແກ່ເພິ່ນ.

16ຈົດໝາຍທຸກສະບັບຂອງເພິ່ນໄດ້ກ່າວເຖິງເລື່ອງເຫລົ່ານີ້ໄວ້ໃນທຳນອງດຽວກັນ. ໃນຈົດໝາຍຂອງເພິ່ນມີບາງຢ່າງທີ່ເຂົ້າໃຈຍາກ ເຊິ່ງພວກຄົນໂງ່ ແລະ ພວກຄົນບໍ່ໜັກແໜ້ນໄດ້ບິດເບືອນໄປ, ເໝືອນດັ່ງທີ່ພວກເຂົາໄດ້ບິດເບືອນພຣະຄຳພີຂໍ້ອື່ນໆທີ່ນຳການທຳລາຍມາສູ່ພວກເຂົາເອງ.

17ເຫດສະນັ້ນ ເພື່ອນທີ່ຮັກທັງຫລາຍເອີຍ, ໃນເມື່ອພວກເຈົ້າໄດ້ຮັບການເຕືອນລ່ວງໜ້າຢ່າງນີ້ແລ້ວ ກໍຈົ່ງລະມັດລະວັງເພື່ອພວກເຈົ້າຈະບໍ່ຖືກຊັກຈູງໃຫ້ຫລົງຜິດໄປຕາມຄົນຂາດສິນທຳ ແລະ ບໍ່ຕົກຈາກບ່ອນອັນໝັ້ນຄົງຂອງພວກເຈົ້າ.

18ແຕ່ຈົ່ງຈະເລີນຂຶ້ນໃນພຣະຄຸນຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ພົ້ນຂອງພວກເຮົາ ແລະ ຮູ້ຈັກພຣະອົງໃຫ້ຫລາຍຂຶ້ນ. ຂໍໃຫ້ກຽດສະຫງ່າລາສີຈົ່ງມີແກ່ພຣະອົງທັງບັດນີ້ ແລະ ຕະຫລອດໄປ. ອາແມນ.

← Chapter 2 Jump to: