Isaiah 22

Lao Bible (ฉบับอักษรลาว)

← Chapter 21 Jump to: Chapter 23 →

1ນ້າຍ ເຊ ກ໊ອງ ຫິ່ນ ຢ້າງ ເຍີຍ ຮ໌ອງ ເຍີຍ ຫວ່າ. ເມີ່ຍ ບົວ ມ່າຍ ຫາຍ ຫຍູ່ງ ສີ່ ທສວດ ເມີ່ຍ ບົວ ຢຽດ ຕສູ໊ງ ຖສີງ ຝາວ ເປຢົ໊າ-ງໍ່?

2ເມີ່ຍ ບົວ ເຍີຍ ມູ້ງ ມ່າຍ ບຸຍ ເຍີຍ ເຖຈຍ ປວັ໊ງ ເດສ່ງ. ມ່າຍ ບ້ຽວໆ, ເໜົ່າ ຫຍິດ ເຍີຍ ຕສີ້ງ ອ້າ! ຢຽມ ເມີ່ຍ ບົວ ບຸດົ໋ງ ຕສຸ ໄຕ໋ ເຍີຍ ມ່ຽນ, ໄມ້ ເຕສີ໌ຍ ຕສຸ ດສຸ ດ໊າວ ໄຕ໋, ຢ່າ ໄມ້ ເຕສີ໌ຍ ເຫວີ່ຍ ເບ໊າະ ຈ໋າ ໄຕ່.

3ເມີ່ຍ ບົວ ເຍີຍ ຢຽດ ຕສູ໊ງ ຈຽນ ລົ່ມ ດສ້ອຍ ເປຢົ໋າ, ລ່ຽມ ຈວັງ-ຕສິ໋ນ ໄມ້ ຕຸ໊ ປ໊ວນ ຢ່າ ຕສຸ ເຕສ໊າະ ໝີ່ ອ໊ະ. ໄມ້ ກຸ໊ນ ເປຢົ໋າ ມີ່ງ ດົ່ງ ຫາຍ ໂກ, ຕະຟ່ານ ລໍ໌ ປວັດ ເຍີຍ, ເມີ່ຍ ບົວ ຢຽດ ຕສູ໊ງ ຕສຸ ເຕສ໊າະ ໝີ່ ອ໊ະ.

4ເຫວີ່ຍ ນ້າຍ ເຢຍ ກ໊ອງ, “ໄມ້ ຕູ໋ງ ໝັ່ງ ເຢຍ ອ໊ະ. ເຫວີ່ຍ ເຢຍ ເຍີຍ ແປະ ຝີງ ຕສຸ ໝຽດ, ປຸນ ເຢຍ ໂຮຍ້ວ ມຸນ ເຍີຍ ຍ້ຽມ. ໄມ້ ຕູ໋ງ ກວັ່ງ ທຈະ ອອນ ເຢຍ ເຍີຍ ໂຮຍ້ວ ອ໊ະ.”

5ເຫວີ່ຍ ຕສຸ ຕສ໊ຽວ, ເນິ່ນ ເຈ໋ຍ ເຍີຍ ທິນ-ຮູ່ງ, ມ່າຍ ນອມ ຮນອຍ ປຸນ ຫິ່ນ ຢ້າງ ເຍີຍ ຮ໌ອງ ມ່າຍ ມ່ຽນ ບ້ຽວໆ ເຍີຍ, ມ່າຍ ເຖສວ ຫລຸ່ນ ເຍີຍ, ມ່າຍ ທສ້າຍ ເຍີຍ ສີ່. ຕສີ້ງ ຫລາດ ອ໋ອຍ ຕສຸ ເບ໊າະ ບາງ, ມ່າຍ ເຫ່ວ ເຍີຍ ເຖຈຍ ບຸຍ ແອ໊ງ ເຖົາ ບົງ.

6ເອລາມ ຕໍ້ ຈ໊ຽນ ຟອງ-ດົ້ງ, ແອ໋ງ ມ່າຍ ເບ໊າະ ຈ໋າ ເຍີຍ ມ໌າ-ເທສຍ ເຖສົາ ເກ້ ມ໌າ ແປງ. ຄີອາ ເຕສ໊າະ ທສວດ ທ້ອງ-ປ້າຍ.

7ເມີ່ຍ ບົວ ເກົ້າ ຫລົງ ເຈ໋ຍ ເຍີຍ ຮ໌ອງ ມ່າຍ ເບ໊າະ ຈ໋າ ເຍີຍ ມ໌າ-ເທສຍ ປວັ໊ງ ເດສ່ງ. ເກ້ ມ໌າ ແປງ ຢ່າ ມີ່ງ ຢຽມ ຈ໊ຽນ ຕສີ້ງ ແກ້ງ ດ່າງ.

8ທິນ-ຮູ່ງ ເຕສ໊າະ ອກອຍ ທ້ອງ ຢູດາ ເຍີຍ ກະນ້າຍ. ເຖົາ ວົ້ວ ຮນອຍ ເມີ່ຍ ບົວ ຕສ່ຽວ ຢຽມ ມ່າຍ ບົ໋ວ ເຫ່ວ ເກ້ມ ວົ້ວ ນອມ ເປຢົ໊າ, ເຕສ໊າະ ເບ໊າະ ຈ໋າ ເຍີຍ ຫວົວະ ກິ່ນ ທສວດ.

9ເມີ່ຍ ບົວ ປວັດ ດາວິດ ເຍີຍ ຕສີ້ງ ເຍີຍ ຕສີ້ງ ຫລາດ ທົງ ເຕສ໋ຍ ນອມ ຕ໋ອງ. ເມີ່ຍ ບົວ ຢ່າ ຊຽວ ວວມ ຢຽມ ວົ້ວ ເດ໊ຍ ເຍີຍ ວວມ-ຕົ້ມ.

10ເມີ່ຍ ບົວ ຊ້າວ ຢຽມ ເຢລູຊາເລມ ເຍີຍ ເປຢົ໊າ, ຢ່າ ແທສະ ເປຢົ໊າ ເຫວີ່ຍ ຫລົ່ງ ຕສໍ່ ຕສີ້ງ ຫລາດ.

11ຢຽມ ອີ ປູງ ຕສີ້ງ ຫລາດ ບຸດົ໋ງ ນິ່ນ ບົວ ໂຕສ໋ວ ນອມ ຕ໋ອງ ເຫວີ່ຍ ຊຽວ ໂລ໌-ວວມ-ຕົ້ມ ເຍີຍ ວວມ. ມປ່າ ເມີ່ຍ ບົວ ໄມ້ ເຂົາ ໂຕສ໋ວ ທສວດ ນ້າຍ ເຕີ໋ຍ ສີ່ ເຍີຍ ທິນ-ຮູ່ງ. ເມີ່ຍ ບົວ ໄມ້ ຈັ໋ງ ໂລ໌-ຮນອຍ ຕ໊າ ທສວດ ນ້າຍ ຫຍູ່ງ ຕສະເອີ໋ຍ ວົ້ວ ເຕົ້າ.

12ຢຽມ ວົ້ວ ຮນອຍ, ຕສ໊ຽວ, ເນິ່ນ ເຈ໋ຍ ເຍີຍ ທິນ-ຮູ່ງ, ເຫ່ວ ເມີ່ຍ ບົວ ຍ້ຽມ ຕຸ໊ ເດສົ້າ ເຍີຍ, ເຖີຍ ມອກ໊ອງ ອຈັງ, ຕສຸ໊ ຫລະມ່າ ເດຍ-ໂທສວ.

13ຕ໋າວ ດສ໋ວນ, ມ່າຍ ອຈຽນ-ໂຢ້ວ ເໜົ່າ ຫຍິດ, ໄຕ໋ ງົ່ງ ໄຕ໋ ປະກີ ຢູ້ງ, ຫຍັ່ນ ອໍ໊, ຮົບ ອະຫງຸ່ນ ຕິ໊ວ. ເມີ່ຍ ບົວ ກ໊ອງ, “ກຸ໊ນ ຫຍັ່ນ ກຸ໊ນ ຮົບ ເຫວີ່ຍ ຕສຸ ອຈັງ ຮນອຍ ເຢຍ ບົວ ໄຕ່ ອ໊ະ.”

14ເນິ່ນ ເຈ໋ຍ ເຍີຍ ຕສ໊ຽວ ກັ້ນ ຮນັ້ງ ນ້າຍ ນໍ ກ໊ອງ ປຸນ ເຢຍ ໝວັງ, “ນ້າຍ ເຕີ໋ຍ ຕສຸ໌ຍ ເຢຍ ດົ່ງ ຫາຍ ຕສູ໊ງ ໄມ້ ກວັ່ງ ເຖົາ ເມີ່ຍ ບົວ ໄຕ່.” ນ້າຍ ເຊ ຕສ໊ຽວ, ເນິ່ນ ເຈ໋ຍ ເຍີຍ ທິນ-ຮູ່ງ, ກ໊ອງ ເຍີຍ ຫວ່າ.

15ຕສ໊ຽວ, ເນິ່ນ ເຈ໋ຍ ເຍີຍ ທິນ-ຮູ່ງ, ຮນັ້ງ ນ້າຍ ນໍ ກ໊ອງ, “ມີ່ງ ອ໊ະ. ມີ່ງ ລໍ໌ ກຸ໊ນ ຮູ່ງ ຕິ່ນ ເຍີຍ ຕົ້ມ ຈຽນ, ເຊ ມີ່ງ ລໍ໌ ເຊບນາ ກ໊ອງ ບົ໋ວ ນິ່ນ,

16‘ເມີ່ຍ ມ່າຍ ຫາຍ ຫຍູ່ງ ເລີ໌ຍ ຢຽມ ນ້າຍ? ມ່າຍ ເມີ່ຍ ເຍີຍ ຫາຍ ເຕົ້າ ມ່ຽນ ຢຽມ ນ້າຍ ເມີ່ຍ ຖສີງ ຢຽມ ນ້າຍ ເຫວີ່ຍ ກັ້ນ ຕສຸ ນອມ ໂຕສ໊ວ? ເມີ່ຍ ຢຽມ ນ້າຍ ຮລັງ ເຍີຍ ຕ໋ອງ ຕສຸ ໂຕສ໊ວ, ເຊ ຕສຸ ຫລະເປຢີ໊ຍ ເຫວີ່ຍ ໂຕສ໋ວ ເມີ່ຍ ກັ້ນ ເຍີຍ ໂຕສ໊ວ.

17“‘ໂອ ເມີ່ຍ ນ້າຍ ເຕົ້າ ມ່ຽນ ເຮ້ນ ມ່ຽນ ອ້າ! ຕສ໊ຽວ ອ໋ອຍ ຫລົ່ງ ຕົ້ມ ທຈະ ຕສອຍ ເມີ່ຍ ກວັ່ງ. ນິ່ນ ອ໋ອຍ ເຕສ໊າະ ເມີ່ຍ ນັ້ນ ຕສຽດ,

18ເຕສ໊າະ ເມີ່ຍ ອຈຸ້ນ ຈ໊ຽນ ຮນັ້ງ ນອມ ກະນ້າຍ ຈຸ້ນ ເຍີຍ, ແອ໋ງ ຕສອຍ ເປັຍ ນອມ ໂຮລ, ຈັ໊ງ ເຍີຍ ເຕີ່ຍ-ປູງ. ຢຽມ ໜ່າຍ ເມີ່ຍ ຕສ່ຽວ ໄຕ່, ເມີ່ຍ ເຍີຍ ອຈັງ-ຫລ່າງ ເຍີຍ ມ໌າ-ເທສຍ ຢ່າ ອ໋ອຍ ຕສຸ ກວັ່ງ ຈ໊ຽນ ໜ່າຍ. ເມີ່ຍ ເຊ ປຸນ ເມີ່ຍ ເຍີຍ ຕສ໊ຽວ ເຍີຍ ເປຢົ໊າ ຕສົງ ມ່ຽນ ຕສຸ ໄຍ້.

19ເຢຍ ອ໋ອຍ ຕສຸ່ນ ເມີ່ຍ ທສວດ ໂຕສ໋ວ ຈຽນ ເຍີຍ ເມ່ງ, ອ໋ອຍ ຖຸຍ ເມີ່ຍ ທສວດ ໄມ້ ຕຸ໊ ໂຕສ໋ວ ຈຽນ.’

20“ວົ້ວ ຮນອຍ ເຢຍ ອ໋ອຍ ເຫ່ວ ເຢຍ ເຍີຍ ໂປວ, ຮິນຄີຢາ ເຍີຍ ຕອນ, ເອລີຢາຄິມ, ຕ້າຍ.

21ເຢຍ ອ໋ອຍ ເຕສ໊າະ ເມີ່ຍ ເຍີຍ ລຸຍ-ດ໊າວ ປຸນ ນິ່ນ ຕສຸ໊, ແອ໋ງ ເຕສ໊າະ ເມີ່ຍ ໄຊ ຈ໊າຍ ເຍີຍ ເດຍ ເຖງ ນິ່ນ ໄຊ ຈ໊ຽນ. ເຢຍ ຢ່າ ອ໋ອຍ ເຕສ໊າະ ເມີ່ຍ ເຍີຍ ຫັດ ມ໌າ ຈິວ ປຸນ ນິ່ນ, ນິ່ນ ຕສ່ຽວ ໂຕສ໋ວ ຮນັ້ງ ເຕຍ ເຫວີ່ຍ ເຢລູຊາເລມ ມ່ຽນ ເຖສົາ ຢູດາ ເຍີຍ ເຕສີ໊ຍ-ຟຸນ.

22ເຢຍ ອ໋ອຍ ເຕສ໊າະ ດາວິດ ເຍີຍ ເຕສີ໊ຍ-ຟຸນ ເຍີຍ ຟໍ້-ເຕສີ້ຍ ຈິວ ປຸນ ນິ່ນ. ນິ່ນ ຄອຍ, ໄມ້ ມ່າຍ ຫາຍ ເຕົ້າ ກວນ. ນິ່ນ ກວນ, ໄມ້ ມ່າຍ ຫາຍ ເຕົ້າ ຄອຍ.

23ເຢຍ ອ໋ອຍ ປຸນ ນິ່ນ ຢຽມ ຕຸ໊ ວ້ວນ ເຍີຍ, ຮນັ້ງ ຫລົ່ງ ດຢັ໋ງ-ຕີງ ຕີງ ຈ໊ຽນ ວ້ວນ ເຍີຍ ຕ໋ອງ ນໍ. ເຫວີ່ຍ ນິ່ນ ໂຕສ໋ວ ເຍີຍ ສີ່, ມ່ຽນ ຕສ່ຽວ ທ່າຍ ນິ່ນ ເຍີຍ ໂຕ້ວ ຕສົງ.

24ນິ່ນ ເຍີຍ ໂຕ້ວ ຕສົງ ມ່ຽນ ຢຽດ ຕສູ໊ງ ຕອນ ເຊັຍ ເຕສີ໊ຍ-ຟຸນ ອ໋ອຍ ປັ່ງ ນິ່ນ ຮນັ້ງ ຟິ້ວ-ຈາ-ຕ໋ອງ, ເຊ ຕິ໊ວ-ຕສ໊ານ ເຖສົາ ຕິ໊ວ-ກ່ອງ, ຂວັງ ຈ໊ຽນ ນິ່ນ.”

25ເນິ່ນ ເຈ໋ຍ ເຍີຍ ຕສ໊ຽວ ກ໊ອງ, “ເຖົາ ວົ້ວ ຮນອຍ, ຕີງ ຈ໊ຽນ ວ້ວນ ເຍີຍ ຕ໋ອງ ເຍີຍ ດຢັ໋ງ-ຕີງ ຕສ່ຽວ ຕສຸ ກ໊າດ ດຸ໊ດ ມີ່ງ, ດ໊ອດ ກະເດ໊ຍ ເດົາ. ຂວັງ ຈ໊ຽນ ດຢັ໋ງ-ຕີງ ເຍີຍ ກະນ້າຍ ຕສ່ຽວ ຕສຸ ໄພ ເອຈ່ຍ ເດສ່ງ.” ເຫວີ່ຍ ຕສຸ ນ້າຍ ເຊ ຕສ໊ຽວ ກ໊ອງ ເຍີຍ ຫວ່າ.

← Chapter 21 Jump to: Chapter 23 →