Isaiah 65

Lao Bible (ฉบับอักษรลาว)

← Chapter 64 Jump to: Chapter 66 →

1ຕສ໊ຽວ, ກ໊ອງ, “ເຢຍ ຫລິ່ວ ເລີ໌ຍ ຕສຢັ໋ງ ປຸນ ໄມ້ ໜ່າຍ ເຖົາ ເຢຍ ວົ້ວ ເຕີ໋ຍ, ຮິ້ວ ຕຸ໊ ເຢຍ, ຢ່າ ຫລິ່ວ ເລີ໌ຍ ຕສຢັ໋ງ ປຸນ ໄມ້ ລໍ໌ ເຢຍ ວົ້ວ ເຕີ໋ຍ, ຕຸ໊ ລໍ໌ ປວັດ ເຢຍ. ເຢຍ ກ໊ອງ, ‘ເຢຍ ຢຽມ ນ້າຍ. ເຢຍ ຢຽມ ນ້າຍ,’ ບົ໋ວ ໄມ້ ເຕົ໋າ ເກົ໋າ ໂຈ້ວ ເຢຍ ເຍີຍ ເມ່ງ ເຍີຍ ຢຽດ ກົ໊ວະ ມ່ຽນ.’

2ເຢຍ ຕສຢັ້ງ ຮນອຍ ຊູງ ຈ໊ຽນ ເຢຍ ເຍີຍ ປົ໌ວ ປຸນ ຢຽດ ຝີງ ໂຮຍ້ວ ແຫງ່ງ ເຍີຍ ມ່ຽນ. ນິ່ນ ບົວ ເຊວີ່ຍ ນິ່ນ ບົວ ກັ້ນ ເຍີຍ ໂຮຍ້ວ ຮນ້ຳ ທສວດ ເຍີຍ ສີ່, ຢັ້ງ ໄມ້ ຫອບ ເຍີຍ ເຈົ໊າ.

3ນ້າຍ ເຕີ໋ຍ ແປະ ຝີງ ຕອງ ຈ໊ຽນ ເຢຍ ຕສັ່ນໆ ທສົວະ ເຢຍ. ນິ່ນ ບົວ ຢຽມ ຫຮວີງ ເຕສ໊າະ ກະນ້າຍ ຝົ່ງ ຫໍ່ ເຕສ່ຍ, ຢ່າ ຢຽມ ຮວີ-ຕສຸນ ດຸຍ ກູ້ ຫງວ່າຍ ປົ໊ວ ຮູງ.

4ນິ່ນ ບົວ ມີ່ງ ເຕສວີ໌ຍ ຈ໊ຽນ ໂຕສ໊ວ ບຸດົ໋ງ, ຢຽມ ວົ້ວ ໂຕສ໊ວ ກະຍົ໌ວ ເຈ໋ຍ ມ໌ວນ. ນິ່ນ ບົວ ຫຍັ່ນ ຕູ໌ງ-ອໍ໊. ນິ່ນ ບົວ ເຍີຍ ແທສງ-ຢ໊ຽນ ກະຍົ໌ວ ມ່າຍ ກ້ຳ ເດສ໊ຍ ໄຫ່ ເຍີຍ ອໍ໊-ທອງ.

5ນິ່ນ ບົວ ກ໊ອງ, ‘ຊິ້ມ ອກອຍ, ໄມ້ ຕູ໋ງ ຕ້າຍ ຟັດ ອ໊ະ, ເຫວີ່ຍ ຕສຸ ເຢຍ ເກົ້າ ທສີງ-ເດສ່ງ ເມີ່ຍ.’ ນ້າຍ ເຕີ໋ຍ ມ່ຽນ ເປ໋ນ ຢຽມ ເຢຍ ເຍີຍ ບະຕສອງ ເຍີຍ ສຽວ, ເປ໋ນ ຕສຢັ້ງ ຮນອຍ ເຕສັຍ ຈ໊ຽນ ເຍີຍ ໂຕ໌ວ.

6“ໝັ່ງ ມ່າະ! ມ່າຍ ຫວ່າ ເຟ້ຍ ຈ໊ຽນ ເຢຍ ເຍີຍ ດສະຮມຽນ ກ໊ອງ, ເຢຍ ໄມ້ ເຊກ. ເຢຍ ອ໋ອຍ ວິ່ນ ເດສ່ງ ປຸນ ນິ່ນ ບົວ, ເຢຍ ຕສູ໊ງ ອ໋ອຍ ວິ່ນ ດສ໋ວນ ປຸນ ນິ່ນ ບົວ,

7ລ່ຽມ ນິ່ນ ບົວ ເຍີຍ ຕສຸ໌ຍ ເຖສົາ ນິ່ນ ບົວ ເຍີຍ ອົງ-ຖາຍ ເຍີຍ ຕສຸ໌ຍ. ເຫວີ່ຍ ຕສຸ ນິ່ນ ບົວ ຢຽມ ບົງ ກູ້ ຫງວ່າຍ ປົ໊ວ ຮູງ, ຢ່າ ຢຽມ ບົງ-ໄອ໊ ກ໊ອງ ໂຕະ ຄີ ເຢຍ. ເຢຍ ຕສ່ຽວ ຕສິ໋ວ ນິ່ນ ບົວ ໂຕສ໋ວ ເຈ໋ຍ ຕ້າຍ ເຍີຍ ສີ່ ຮລາວ ດສ໋ວນ ປຸນ ນິ່ນ ບົວ.” ນ້າຍ ເຊ ຕສ໊ຽວ ກ໊ອງ ເຍີຍ ຫວ່າ.

8ຕສ໊ຽວ ຮນັ້ງ ນ້າຍ ນໍ ກ໊ອງ, “ອະຫງຸ່ນ ຕິ໊ວ ຢຽມ ອະຫງຸ່ນ ປ໊ຽວ-ຈ້ອຍ ທສວດ ຢ່າ ມ່າຍ ມ່ຽນ ກ໊ອງ, ‘ໄມ້ ຕູ໋ງ ໂຕສ໋ວ ຫວ່າຍ. ຖສໍ່ ມ່າຍ ລ່ຳ ຫລົ່ງ ເຍີຍ.’ ເຢຍ ຕສ່ຽວ ເຫວີ່ຍ ເຢຍ ເຍີຍ ໂປວ ຮນັ້ງ ນ້າຍ ນໍ ໂຕສ໋ວ. ເຢຍ ໄມ້ ໝຽດ ນິ່ນ ບົວ ຢຽດ ຕສູ໊ງ.

9ເຢຍ ອ໋ອຍ ປຸນ ຢາໂຄບ ມ່າຍ ໂຮ໌ ຕ່ອຍ ເຕສີ໊ຍ-ຟຸນ, ຢ່າ ປຸນ ຢຽມ ຢູດາ ທສວດ ເຍີຍ ມ່ຽນ ຕຸ໊ ດສິບ ເຢຍ ເຍີຍ ຕສວັ໋ງ ບົງ. ເຢຍ ກິ໊ນ ຕ້າຍ ເຍີຍ ມ່ຽນ ຢ່າ ຕຸ໊ ດສິບ. ເຢຍ ເຍີຍ ຕສວັ໋ງ ໂປວ ຢ່າ ຕຸ໊ ຢຽມ ໜ່າຍ.

10ຊາລົນ ເດົາ-ແປ້ງ ອ໋ອຍ ເປ໋ນ ປະກີ ຢູ້ງ ເຖສົາ ຢູ້ງ ກວັ້ນ ເຍີຍ ເມ້ຍ-ທສຢັ້ງ, ອາໂຄ ຮ໌ອງ ອ໋ອຍ ເປ໋ນ ງົ່ງ ກວັ້ນ ເປວີ໋ຍ ເຍີຍ ຕ໋ອງ ເຫວີ່ຍ ເຢຍ ເຍີຍ ແປະ ຝີງ, ຕົ້ງ ລໍ໌ ເຢຍ ວົ້ວ ເຕີ໋ຍ.

11“ມປ່າ ເມີ່ຍ ບົວ ກວັ່ງ ຕສ໊ຽວ ເຍີຍ ມ່ຽນ, ເຊ ເມີ່ຍ ບົວ ຫລະຄຸ ເຢຍ ເຍີຍ ທສີງ-ເດສ່ງ ບົງ ຢ່າ ເບ່ນ ເຕ້ຍ ເຫວີ່ຍ ກາດ ຕສ້ຽນ, ຫລົ່ງ ດສ່ອມ ເຜວ ເຕສ໋ຍ ຫຍູ່ງ ຕິ໊ວ ເທສ້ຍ ເຕສ່ຍ ປຸນ ເມນີ ຕສ້ຽນ.

12ເຢຍ ຕສ່ຽວ ຕີ່ງ ປຸນ ເມີ່ຍ ບົວ ເຍີຍ ໂຮ໌ ອກາງ ຕສຸ ດສຸ ດ໊າວ, ເມີ່ຍ ບົວ ຢຽດ ຕສູ໊ງ ອ໋ອຍ ຕສຸ ບ໊າບ ເອຈ່ຍ ຕສຸ ໄຕ໋. ເຫວີ່ຍ ຕສຸ ເຢຍ ເຫ່ວ ເມີ່ຍ ບົວ ມປ່າ ເມີ່ຍ ບົວ ໄມ້ ເຕົາ, ເຢຍ ກ໊ອງ ມປ່າ ເມີ່ຍ ບົວ ໄມ້ ໝວັງ. ຕ໋າວ ດສ໋ວນ ເມີ່ຍ ບົວ ຢຽມ ເຢຍ ເຍີຍ ດສະຮມຽນ ໂຕສ໋ວ ເອ໊າະ ສີ່, ຢ່າ ກິ໊ນ ຕົ້ງ ເຢຍ ໄມ້ ອະເຮນີ້ຍ ເຍີຍ ສີ່.”

13ເຫວີ່ຍ ນ້າຍ ຕສ໊ຽວ ທິນ-ຮູ່ງ ຮນັ້ງ ນ້າຍ ນໍ ກ໊ອງ, “ໝັ່ງ ມ່າະ! ເຢຍ ເຍີຍ ຕສວັ໋ງ ໂປວ ຕສູ໊ງ ຕຸ໊ ຫຍັ່ນ, ມປ່າ ເມີ່ຍ ບົວ ອ໋ອຍ ຕສຸ ໂຮຍ້ວ ເຊຍ. ເຢຍ ເຍີຍ ຕສວັ໋ງ ໂປວ ຕຸ໊ ຮົບ, ມປ່າ ເມີ່ຍ ບົວ ອ໋ອຍ ຕສຸ ຈາງ ອກ໊າດ. ເຢຍ ເຍີຍ ຕສວັ໋ງ ໂປວ ອ໋ອຍ ຕຸ໊ ອຈຽນ-ໂຢ້ວ, ມປ່າ ເມີ່ຍ ບົວ ອ໋ອຍ ຕສຸ ໄຍ້.

14ເຢຍ ເຍີຍ ຕສວັ໋ງ ໂປວ ອ໋ອຍ ປ໋າວ ດສູງ ເຫວີ່ຍ ໂຮຍ້ວ ກະຍົ໌ວ ອຈຽນ-ໂຢ້ວ, ມປ່າ ເມີ່ຍ ບົວ ອ໋ອຍ ເຫ່ວ ທສວດ ເຫວີ່ຍ ເມີ່ຍ ບົວ ໂຮຍ້ວ ປະຫລະ ເດສົ້າ. ເມີ່ຍ ບົວ ອ໋ອຍ ຍ້ຽມ ໂຄ້ວ ເຫວີ່ຍ ໂຮຍ້ວ ມຸນ ຕຸ໊ ຊຢັງ.

15ເມີ່ຍ ບົວ ຕສຸ ກວັ່ງ ເມີ່ຍ ບົວ ກັ້ນ ເຍີຍ ບົ໋ວ, ປຸນ ເຢຍ ກິ໊ນ ຕ້າຍ ເຍີຍ ມ່ຽນ ຫລົ່ງ ເປ໋ນ ຕສ໋ຽວ ເຍີຍ ຫວ່າ. ຕສ໊ຽວ ທິນ-ຮູ່ງ ອ໋ອຍ ປຸນ ເມີ່ຍ ບົວ ຕສຸ ໄຕ໋, ມປ່າ ນິ່ນ ອ໋ອຍ ເຕສ໊າະ ກັ້ນ ນອມ ບົ໋ວ ປຸນ ນິ່ນ ເຍີຍ ໂປວ ບົວ.

16ຮນັ້ງ ໜ່າຍ, ຫາຍ ເຕົ້າ ຢຽມ ເຕີ່ຍ-ປູງ ເຫວີ່ຍ ກັ້ນ ໂທ້ ຟຸ, ຕສ່ຽວ ຫລົ່ງ ຕສຽນ ເລີ໌ຍ ເຍີຍ ທິນ-ຮູ່ງ ເຍີຍ ບົ໋ວ ໂທ້. ຫາຍ ເຕົ້າ ຢຽມ ເຕີ່ຍ-ປູງ ໂຮ້ວ ຫວ່າ, ຕສ່ຽວ ຕສຢັ໊ງ ຈ໊ຽນ ຕສຽນ ເລີ໌ຍ ເຍີຍ ທິນ-ຮູ່ງ ເຍີຍ ບົ໋ວ ໂຮ້ວ. ເຫວີ່ຍ ຕສຸ ຕສິ້ນ ດ່າງ ຕສຸ ເຍີຍ ເຕສະ ໜ່ານ ຕສູ໊ງ ຫລະຄຸ ໝີ່ ອ໊ະ, ເຢຍ ເຍີຍ ມຕສີງ ຢ່າ ໄມ້ ປວັດ ໝີ່ ອ໊ະ.

17“ໝັ່ງ ມ່າະ! ເຢຍ ອ໋ອຍ ເຕສີ໋ຍ ຊຢັງ-ລູ່ງ ຊຢັງ-ເດົາ. ຕສິ້ນ ດ່າງ ເຍີຍ ສີ່ ຕສູ໊ງ ໄມ້ ຈັ໋ງ, ລ່ຽມ ໄມ້ ຮນ້ຳ ເຖົາ.

18ມປ່າ ອ໋ອຍ ຕສຸ ອະເຮນີ້ຍ, ອອນ-ເຫລາະ ເຫວີ່ຍ ເຢຍ ເຕສີ໋ຍ ຕ້າຍ ເຍີຍ ກະນ້າຍ. ເຫວີ່ຍ ຕສຸ ເຢຍ ອ໋ອຍ ເຕສີ໋ຍ ເຢລູຊາເລມ ເປ໋ນ ມ່ຽນ ອະເຮນີ້ຍ ເຍີຍ ຕ໋ອງ. ຕສີ້ງ ກະຍົ໌ວ ເຍີຍ ແປະ ຝີງ ຢ່າ ອ໋ອຍ ອອນ-ເຫລາະ.

19ເຢຍ ຕສ່ຽວ ເຫວີ່ຍ ເຢລູຊາເລມ ອຈຽນ-ໂຢ້ວ, ຢ່າ ເຫວີ່ຍ ເຢຍ ເຍີຍ ແປະ ຝີງ ອອນ-ເຫລາະ. ຢຽມ ຕສີ້ງ ກະຍົ໌ວ ໄມ້ ມ່າຍ ຫາຍ ເຕົ້າ ແອ໋ງ ໄຮ໌ ຍ້ຽມ ເຍີຍ ເຖຈຍ ໄຟ ເຫ່ວ ຕຸ໊ ເດສົ້າ ເຍີຍ ເຖຈຍ.

20“ຢຽມ ໜ່າຍ ກະຍົ໌ວ ຢຽດ ລິ໌ວ ໄມ້ ແອ໋ງ ມ່າຍ ກູ້ ງວ໌າ ຕສຢັ້ງ ອີ ເຕສ໋ຍ ຮນອຍ ຮນັ້ງ, ໄຟ ມ່າຍ ມ່ຽນ ໂກ໋ ມ່ຽນ ໄມ້ ຕສຢັ້ງ ປວັ໊ງ ໂສວ ໂໝ່ວ. ຕຸ໊ ຢຽດ ແປ໊ະ ຫຮຍັງ ໄຕ່ ເຍີຍ ມ່ຽນ ຝຸນ ເປ໋ນ ມ່ຽນ ຫລຸນ ມ່ຽນ, ຕສຢັ້ງ ໄມ້ ເຖົາ ຢຽດ ແປ໊ະ ຫຮຍັງ ໄຕ່ ວົ້ວ ເຕີ໋ຍ, ຝຸນ ເປ໋ນ ຕສຸ ຕສ໋ຽວ ເຍີຍ ມ່ຽນ.

21ນິ່ນ ບົວ ອ໋ອຍ ໂຕສ໋ວ ເປຢົ໊າ ເຫວີ່ຍ ກັ້ນ ເປັຍ ມີ່ງ ຢຽມ. ນິ່ນ ບົວ ອ໋ອຍ ໂຕສ໋ວ ຫຮວີງ ຕສວັ໋ງ ອະຫງຸ່ນ ປ໊ຽວ ຢ່າ ຫຍັ່ນ ຫຮວີງ ເຍີຍ ປ໊ຽວ.

22ນິ່ນ ບົວ ໄມ້ ໂຕສ໋ວ ເປຢົ໊າ ປຸນ ກັ້ນ ເຕົ້າ ຢຽມ. ນິ່ນ ບົວ ໄມ້ ໂຕສ໋ວ ຫຮວີງ ຕສວັ໋ງ ອະຫງຸ່ນ ປ໊ຽວ ປຸນ ກັ້ນ ເຕົ້າ ຫຍັ່ນ. ເຫວີ່ຍ ຕສຸ ເຢຍ ເຍີຍ ແປະ ຝີງ ຕສຢັ້ງ ເຍີຍ ຮນອຍ ຕສູ໊ງ ຮນັ້ງ ດຢັ໋ງ ຕສຢັ້ງ ເຍີຍ ຮນອຍ-ເຫຍັຍ. ເຢຍ ກິ໊ນ ຕ້າຍ ເຍີຍ ມ່ຽນ ຕສ່ຽວ ອະເຮນີ້ຍ ນິ່ນ ບົວ ເຍີຍ ປົ໌ວ ໂຕສ໋ວ ເຍີຍ ກົງ ເລົ່າ ເຍີຍ.

23ນິ່ນ ບົວ ໂຕສ໋ວ ເຍີຍ ກົງ ນິ່ນ ບົວ ໄມ້ ແປະໆ ໂຕສ໋ວ, ນິ່ນ ບົວ ຢູ໌ງ ເຍີຍ ກູ້ ງວ໌າ ຢ່າ ໄມ້ ຕສຸ ເຕສະ ໜ່ານ, ເຫວີ່ຍ ຕສຸ ນິ່ນ ບົວ ຕຸ໊ ໂຕສ໋ວ ຕສ໊ຽວ ເຖສີຍ ຟຸ ເຍີຍ ມ່ຽນ, ລ່ຽມ ນິ່ນ ບົວ ກັ້ນ ເຖສົາ ນິ່ນ ບົວ ເຍີຍ ໂຮ໌ ຕ່ອຍ ເຕສີ໊ຍ-ຟຸນ.

24ນິ່ນ ບົວ ໄມ້ ແກ້ງ ໂທ້, ເຢຍ ຕສ່ຽວ ເຕົາ. ນິ່ນ ບົວ ຖສໍ່ ກ໊ອງ ຈ໊ຽນ ຫວ່າ ເຍີຍ ຕສຢັ້ງ ໂຫ່ ເຢຍ ຕສ່ຽວ ໄຮ໌.

25ເຮ່ຍ ຈູ໊ ເຖສົາ ປະກີ ຢູ້ງ ຕອນ ອ໋ອຍ ຈວັ່ງ ຈ໊ຽນ ຫຍັ່ນ. ຊ່ຽນ ອ໋ອຍ ຫຍັ່ນ ເບຢົ້າ ອກ໊າວ ຮນັ້ງ ງົ່ງ. ເນຍ-ບູງ ເປ໋ນ ນາງ ເຍີຍ ຫຍັ່ນ ຮົບ. ຕະຟ່ານ ຢຽມ ເຢຍ ເຍີຍ ທສີງ-ເດສ່ງ ບົງ ເຍີຍ ຕ໋ອງ, ນິ່ນ ບົວ ຢຽດ ຕສູ໊ງ ໄມ້ ຫ່ອຍ, ໄມ້ ໂຕສ໋ວ ໝຽດ.” ຕສ໊ຽວ ຮນັ້ງ ນ້າຍ ກ໊ອງ.

← Chapter 64 Jump to: Chapter 66 →